وتانىمىز تۇگىلى وزىق ەلدەردىڭ ءوزىن وماقاسا قۇلاتقان ىندەت ىرگەمىزدەن كەتتى دەگەندە بوركىمىزدى اسپانعا اتىپ قۋانعانىمىز راس. ساۋ ادامدى سارساڭعا سالعان سول ءبىر ساتتەردە دەرتكە شالدىقپاۋدىڭ جولىن ىزدەپ, دەنساۋلىعىمىزدى ويلاپ دەگبىرىمىز قاشقانى دا شىندىق. بىراق كوروناۆيرۋستان تۇبەگەيلى قۇتىلدىق ەكەن دەپ ارقانى كەڭگە سالۋعا ءالى ەرتە. ساقتىق شارالارىن ۇمىتۋعا بولمايدى. سەبەبى ەلدەگى ەپيدەميالىق جاعداي كۇردەلەنىپ, سىرقاتتانعاندار سانى ءوسىپ جاتىر.
مامانداردىڭ ايتۋىنشا, ماۋسىم ايىندا مامىرمەن سالىستىرعاندا اۋرۋ دەڭگەيى 6,3 ەسە – 94-تەن 595 جاعدايعا دەيىن وسكەن. ماسەلەن, سىرقاتتانۋشىلىقتىڭ ءوسۋى ماۋسىم ايىنىڭ ورتاسىنان باستاپ بايقالادى جانە قازىرگى ۋاقىتتا ورتاشا تاۋلىكتىك سانى تاۋلىگىنە 130 جاعدايدى قۇرايدى. شىلدەنىڭ العاشقى 6 كۇنىندە 773 جاعداي تىركەلگەن, بۇل ماۋسىم ايىنداعى سىرقاتتانۋشىلىق دەڭگەيىنەن 1,3 ەسە جوعارى. ەپيدەميالىق جاعدايدى باعالاۋ ماتريتساسىنا سايكەس بيىل 4 شىلدەدەن باستاپ الماتى قالاسى «سارى ايماقتا» ورنالاسقان.
دەنساۋلىق ساقتاۋ مينيسترلىگىنىڭ 11 شىلدەدەگى مالىمەتتەرىنە سۇيەنسەك, قازاقستاندا 2 837 ادام كوروناۆيرۋس ينفەكتسياسىنان ەمدەلىپ جاتىر. ونىڭ ىشىندە 291 پاتسيەنت ستاتسيوناردا, 2 546 ناۋقاس امبۋلاتوريالىق دەڭگەيدە ەم قابىلداۋدا.
«كەيىنگى تاۋلىكتە ەل اۋماعىندا 454 تۇرعىننان پتر تەستى ارقىلى كۆي انىقتالعان. كوروناۆيرۋسقا شالدىققانداردىڭ اراسىندا 14 ادامنىڭ جاعدايى اۋىر. ونىڭ ىشىندە نۇر-سۇلتان قالاسىندا – 118, الماتى قالاسىندا – 200, شىمكەنت قالاسىندا – 23, اقمولا وبلىسىندا – 7, الماتى وبلىسىندا – 30, اتىراۋ وبلىسىندا – 16, شىعىس قازاقستان وبلىسىندا – 3, جامبىل وبلىسىندا – 17, باتىس قازاقستان وبلىسىندا – 1, قاراعاندى وبلىسىندا – 11, قوستاناي وبلىسىندا – 3, قىزىلوردا وبلىسىندا – 12, ماڭعىستاۋ وبلىسىندا – 2, پاۆلودار وبلىسىندا – 5, سولتۇستىك قازاقستان وبلىسىندا – 3, تۇركىستان وبلىسىندا – 3. مۇنىمەن وسى ۋاقىتقا دەيىن ەلىمىزدە كوروناۆيرۋس ينفەكتسياسىن جۇقتىرعاندار سانى 1 309 888 ادامعا جەتتى», دەپ جازدى ۆەدومستۆو.
جاقىندا الماتىدا پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن كوروناۆيرۋس ينفەكتسياسىنىڭ تارالۋىنىڭ الدىن الۋ جونىندەگى رەسپۋبليكالىق شتابتىڭ وتىرىسى ءوتتى. جيىندا ەپيدەميالىق احۋال, كۆي تارالۋىنىڭ ءوسۋ سەبەپتەرى, ءتيىستى حالىققا ۆاكتسينالاۋ جانە رەۆاكتسينالاۋ جۇرگىزۋ ماسەلەلەرى قارالدى. وسى جىلدىڭ ماۋسىم ايىندا سىرقاتتانعان ادامداردىڭ ۆاكتسينالاۋ مارتەبەسىن تالداۋ كەزىندە 96%-ى ۆاكتسينا الماعانى جانە ۆاكتسينادان, رەۆاكتسينادان كەيىن 6 ايدان اسا ۋاقىت وتكەن ادامدار ەكەنى انىقتالعان. وتىرىس بارىسىندا ايتىلعانداي, الماتىدا سىرقاتتانۋشىلىقتىڭ ءوسۋ سەبەپتەرى ۆاكتسينالاۋ جانە رەۆاكتسينالاۋ قارقىنىنىڭ تومەندەۋىمەن قاتار وميكرون ستەلس ۆيرۋسىنىڭ ءبىر ءتۇرىنىڭ تارالۋى بولدى. وسىعان بايلانىستى رەسپۋبليكالىق شتاب كوروناۆيرۋس ينفەكتسياسى بويىنشا ەپيدەميالىق جاعدايدى تۇراقتاندىرۋ ماقساتىندا الماتى قالاسىنىڭ اكىمدىگىنە ءتيىستى حالىقتى ۆاكتسينالاۋمەن, رەۆاكتسينالاۋمەن جانە قايتا رەۆاكتسينالاۋمەن قامتۋدى ۇلعايتۋ, مەديتسينالىق-سانيتاريالىق العاشقى كومەكتىڭ, ءموبيلدى بريگادالاردىڭ جانە دايارلانعان كادرلار رەزەرۆىنىڭ ازىرلىگىن قامتاماسىز ەتۋ ۇسىنىلدى.
سونىمەن قاتار ەلىمىزدە سوڭعى تاۋلىكتە 126 ادام كوروناۆيرۋس ينفەكتسياسىنان جازىلىپ شىققانىن ايتا كەتسەك دەيمىز. COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيا ساۋىعىپ, قاتارعا قوسىلعانداردىڭ تۇراتىن ايماقتارىن دا اتاپ ءوتتى. بۇلار نۇر-سۇلتان قالاسىندا – 40, الماتى قالاسىندا – 74, اتىراۋ وبلىسىندا – 9, پاۆلودار وبلىسىندا – 2, تۇركىستان وبلىسىندا – 1. رەسپۋبليكا بويىنشا بارلىعى 1 293 448 ادام COVID-19-دان ەمدەلدى. ال كوروناۆيرۋس ينفەكتسياسىنا قارسى ۆاكتسينانىڭ ءبىرىنشى كومپونەنتىن – 9 532 368 ادام, ەكىنشى كومپونەنتىن – 9 315 917 ادام سالدىردى.
نۇر-سۇلتان قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى سارحات بەيسەنوۆا جۋرناليستەرگە بەرگەن سۇحباتىندا ەلورداعا كىرىپ-شىعۋعا تىيىم ەنگىزۋ قاراستىرىلىپ وتىرماعانىن ايتتى.
«وتكەن اپتادا قازاقستان اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا ەلىمىزدەگى COVID-19-بەن ناۋقاستانۋ ءوسىمىن ەسكەرە وتىرىپ, قانداي دا ءبىر ءوڭىر ەپيدەميالىق تاۋەكەلدىڭ «سارى ايماعىنا» وتكەن جاعدايدا ەنگىزىلەتىن قوسىمشا ءىس-شارالار تۋرالى شەشىم قابىلدادى. ونىڭ ىشىندە ناۋقاسپەن تىعىز قارىم-قاتىناستا بولعانداردى قاشىقتان جۇمىس ىستەۋ فورماتىنا كوشىرۋ, COVID-19-عا قارسى ەكپە سالدىرۋعا بولمايتىن قىزمەتكەرلەر مەن جۇكتى ايەلدەردى قاشىقتان جۇمىس ىستەۋ فورماتىنا اۋىستىرۋ شارالارى بار», دەدى س.بەيسەنوۆا.
ونىڭ اتاپ وتۋىنشە, Ashyq قوسىمشاسىن قايتادان ىسكە قوسۋ, نۇر-سۇلتان قالاسىنا كىرۋگە جانە شىعۋعا تىيىم سالۋ كوزدەلىپ وتىرعان جوق. دەگەنمەن قالا تۇرعىندارىنا ادامدار جاپپاي جينالاتىن جەرگە بارعاندا, قوعامدىق كولىككە وتىرعاندا ماسكا تاعۋ ۇسىنىلادى.
ء«ار ادام, اسىرەسە سوزىلمالى اۋرۋلارى بار جاندار دەنساۋلىعىنا تونەتىن تاۋەكەل مەن قاۋىپتى تۇسىنۋگە ءتيىس. ولاردان ادامدار كوپ جينالاتىن جەرگە بارعاندا ماسكا تاعىپ, بارلىق قاۋىپسىزدىك ءىس-شارالارىن ساقتاۋعا كەڭەس بەرەمىز. ەكپە نەمەسە قايتادان ۆاكتسينا الماعان تۇرعىندارعا ۇجىمدىق يممۋنيتەتتى كوتەرۋ ءۇشىن دەر ۋاقىتىندا ۆاكتسينا الۋ ماڭىزدىلىعىن جانە قاجەتتىلىگىن ەسكە سالامىن», دەدى دەپارتامەنت باسشىسى.
سونىمەن قاتار ول كوروناۆيرۋس ءبىرشاما تومەن اگرەسسيۆتى فورمادا وتەتىنىن جەتكىزدى.
«وسى جىلدىڭ ماۋسىم ايىنىڭ سوڭىنان بەرى ەلورداداعى كوروناۆيرۋس ينفەكتسياسىنا قاتىستى ەپيدەميالىق جاعدايدىڭ كۇردەلەنىپ كەلە جاتقانى بايقالادى. ايتالىق, وسىدان ءبىر اي بۇرىن تاۋلىك ىشىندە بىرنەشە عانا جاعداي تىركەلسە, سوڭعى ەكى اپتادا ورتاشا تاۋلىكتىك تىركەلىم 120 جاعدايعا جەتىپ وتىر. سوڭعى تاۋلىكتە كوروناۆيرۋس ينفەكتسياسىنىڭ زەرتحانالاردا دالەلدەنگەن 118 جاعدايى تىركەلدى. كوروناۆيرۋس ينفەكتسياسىنىڭ دامۋ قارقىنى بويىنشا رەپوردۋكتيۆتىلىك سان 1,958-گە تەڭ», دەدى س.بەيسەنوۆا.
ونىڭ ايتۋىنشا, اۋرۋشاڭدىقتىڭ ارتۋىنا قاراماستان كوروناۆيرۋس ءبىرشاما تومەن اگرەسسيۆتى فورمادا ءوتىپ جاتىر. ەڭ باستىسى, ناۋقاستاردىڭ ىشىندە وكپەنى جاساندى جەلدەتۋ اپپاراتىنا قوسىلعاندار جوق. قازىرگى ۋاقىتتا 118 ناۋقاس ستاتسيونارلاردا, ونىڭ ىشىندە 11 ناۋقاس رەانيماتسيا بولىمشەسىندە ەم الىپ جاتىر. سونىمەن قاتار 338 ادام امبۋلاتورلىق جاعدايدا ەم الۋ ۇستىندە.