جۋىردا پەتروپاۆل قالاسىنا پرەزيدەنتتىڭ باستاماسىمەن وسىدان جارتى جىل بۇرىن قۇرىلعان «قازاقستان حالقىنا» قوعامدىق قورىنىڭ توراعاسى بولات جامىشەۆ باستاعان وكىلدەرى كەلىپ, قالا جۇرتشىلىعى, وبلىس كاسىپكەرلەرى, ءماسليحات دەپۋتاتتارى, باق وكىلدەرىمەن كەزدەسۋ وتكىزدى.
حالىقتىڭ اسا مۇقتاج بولىگىنە كومەك قولىن سوزۋدى ماقسات ەتكەن قور ءالى كۇنگە ىسكە قاۋىرت كىرىسىپ, ءوزىنىڭ لايىقتى ورنىنا جەتە الماي وتىرعانى ب.جامىشەۆتىڭ كوپ ءسوزىنىڭ اراسىنان كورىنىپ قالدى.
ء«بىز التى اي بويى قوردىڭ تۇجىرىمىن جاساۋمەن, جوبالارىن انىقتاۋمەن بەلسەندى تۇردە جۇمىس ىستەدىك. وسى جۇمىستاردىڭ بارىسىندا ءبىز قوردىڭ تۇجىرىمى پرەزيدەنتتىڭ قوردى قۇرۋ باستاماشىلدىعىندا بەلگىلەگەن ماسشتابىن قامتي المايتىنىن تۇسىندىك. وسىعان بايلانىستى ءبىز ازاماتتىق قوعام وكىلدەرىن تارتاتىن ۇلكەن كونفەرەنتسيا وتكىزۋ كەرەك دەگەن شەشىم قابىلدادىق», دەدى ول.
توراعانىڭ سوزىنە سۇيەنسەك, التى ايدا قورعا 130 ملرد تەڭگەدەي قاراجات قۇيىلعان ەكەن, بىراق سونىڭ يگەرىلگەنى تۋرالى اقپاراتتار كوڭىلدى كونشىتە قويمادى. جارتى جىلدا قوردان كومەك سۇراپ 38 مىڭداي ادام ءوتىنىش تۇسىرگەن ەكەن. سونىڭ 8 مىڭى دەنساۋلىق ساقتاۋ, 2 مىڭى ءبىلىم الۋ جانە باسقالارى نەسيەنى جابۋعا كومەك, تۇرعىن-ءۇي ساتىپ الۋعا جاردەم, بيزنەستى دامىتۋعا قولقابىس, ءتىپتى كيىم-كەشەك پەن ءدارى-دارمەك الۋعا قولۇشىن بەرۋ سياقتى الەۋمەتتىك كومەكتەر سۇراپتى.
بەرىلگەن كومەكتەر قاتارىندا 304 ادامعا كوز اۋرۋىنان ەمدەلۋگە كومەك جاساۋعا 370 ملن تەڭگە, تۇرمىسى تومەن وتباسىلارداعى 128 بالانىڭ تامىر پاتولوگياسىن ەمدەۋگە 21 ملن تەڭگە بولىنگەنى العا تارتىلدى.
ء«بىز ايرىقشا نازارداعى بالالارعا جاردەم بەرەمىز. «قامقورلىق» قورىمەن بىرلەسە وتىرىپ, ءارتۇرلى ايماقتاردا ەرەكشە وتباسىلارعا كومەك جاساۋ ءۇشىن 13 وڭالتۋ ورتالىقتارىن قاجەتتى قۇرال-جابدىقتارمەن قامتاماسىز ەتەمىز. 29 جاسقا دەيىنگى بالالار مەن جاسوسپىرىمدەردى زاماناۋي پروتەزدەرمەن قامتاماسىز ەتۋ باعدارلاماسىن بەكىتتىك», دەدى ب.جامىشەۆ.
سونىمەن بىرگە قورعا قازاقستاندا ەمدەلمەيتىن اۋرۋى بار 8200 ادام جۇگىنىپتى. ونداي ناۋقاستىڭ كەيبىرىن ەمدەۋدىڭ جولدارى بىزدە ءالى كۇنگە انىقتالماعان دا ەكەن. مىسالى, بالالاردىڭ ورفاندى ناۋقاستارى سەكىلدى اۋرۋ تۇرلەرى بار. قور وسىنداي ناۋقاستارعا قاجەتتى دارىلەردى الدىرۋ جولىندا ەلشىلىكتەردىڭ كومەگىمەن كەلىسسوزدەر جۇرگىزۋدە كورىنەدى.
«مۇنداي ناۋقاستارعا ءبىز «سق-فارماتسيا» كاسىپورنىنىڭ كومەگىمەن قول جەتكىزىپ, سول مەكەمەنىڭ گرانتىمەن ەمدەۋگە قول جەتكىزۋگە تىرىسامىز», دەدى ب.جامىشەۆ.
ءبىلىم الۋ سالاسىنا جاسالاتىن كومەكتەر قاتارىندا تۇرمىسى تومەن وتباسىلاردىڭ بالالارىنا 360 ءبىلىم بەرۋ گرانتتارى قاراستىرىلعانى ايتىلدى. بۇل جوبا الدىمىزداعى وقۋ جىلىنان باستالىپ, وعان 350 ملن تەڭگە قاراستىرىلىپتى. سونىمەن بىرگە اۋىل مەكتەپتەرىنىڭ ساپاسىن جاقسارتۋعا دا قاراجات ءبولۋ قاراستىرىلاتىنى ايتىلدى.
قوردىڭ قولعا الاتىن جۇمىسىنىڭ ءبىرى – ءاربىر ايماقتا ءبىر-بىردەن جوعارى دارەجەدە قامتاماسىز ەتىلەتىن تىرەك مەكتەپتەرىن اشۋ. وعان 250 ملن تەڭگەدەن قاراجات ءبولۋ قاراستىرىلعان.
كەزدەسۋ بارىسىندا بىرنەشە ادام سويلەپ, قوردىڭ پايداسىن ارتتىرۋ جونىندە وزدەرىنىڭ ۇسىنىس-پىكىرلەرىن ايتتى. سونىڭ ىشىندە زەينەتكەرلەر مەن ارداگەرلەرگە دە قور تاراپىنان كومەك كورسەتىلۋ ۇسىنىلدى. ب.جامىشەۆ كەيبىر ۇسىنىستاردى ىسكە اسىرۋدى قاراستىرۋعا بولاتىنىن جەتكىزدى.
سولتۇستىك قازاقستان وبلىسى