جەتىسۋ وبلىسىنىڭ اكىمى بەيبىت يساباەۆ اقسۋ اۋدانىنا ىسساپارمەن باردى. ول اۋدانداعى ونەركاسىپ جانە اۋىلشارۋاشىلىق قۇرىلىمدارىن ارالاپ, جاڭا سالىنىپ جاتقان الەۋمەتتىك نىسانداردىڭ جۇمىسىمەن تانىستى. ەگىستىك القاپتارىن دا ارالادى. يرريگاتسيالىق جۇيەلەردىڭ قۇرىلىسىن كورىپ, مۇمكىندىگىنە نازار اۋداردى.
ءوڭىر باسشىسى الدىمەن قىزىلاعاش سۋ قويماسىنا باردى. قويما 42 ملن تەكشە مەتر سۋ جيناۋعا ارنالعان. بۇگىندە مۇندا جينالعان سۋدى ساقتاۋ, ناۋا ارقىلى اعىزۋ, القاپتارعا تاراتۋ كومپيۋتەر ارقىلى اۆتوماتتى تۇردە باسقارىلادى. ازىرگە باسقارۋ مەن سۋ جىبەرۋ جۇيەسى قالىپتى اتقارىلۋدا. قويما جىلدىڭ سوڭىندا تولىعىمەن ىسكە قوسىلماق.
قىزىلاعاش اۋىلىنداعى «اگروحولدينگ اقسۋ» سەرىكتەستىگىنىڭ قاراماعىندا 1 870 گەكتار القاپ بار. مۇندا اۋىلشارۋاشىلىق تەحنيكالارىنىڭ پاركى دە ورنالاسقان. استىق ەگۋگە ارنالعان تەحنيكانىڭ سانى 50 بىرلىكتى قۇرايدى. سەرىكتەستىك بىلتىر 1 300 باس ءىرى قاراعا ارنالعان تاۋارلى ءسۇت فەرماسىنىڭ قۇرىلىسىن باستاعان. وتكەن جىلدان بەرى 617 باس ءىرى قارادان الىناتىن ءسۇت فەرماسىنىڭ ونىمدەرى «فۋدماستەر» كاسىپورنىندا وڭدەلەدى. مال ازىعىن دايىنداۋدى دا وزدەرى قولعا العان. مىسالى, بىلتىر 250 گەكتار القاپقا جوڭىشقا, 320 گەكتارعا جۇگەرى, 220 گەكتارعا كۇزدىك بيداي ەكسە, بيىل ەگىستىك جەر كولەمىن ەداۋىر ۇلعايتىپتى. مۇندا سىر زاۋىتىن سالۋ جوسپارلانۋدا. الداعى ۋاقىتتا 1 300 باسقا ارنالعان تاعى ءبىر تاۋارلى ءسۇت فەرماسىن سالماق. فەرما باسشىسى بارلىق جۇمىسشىنى جەرگىلىكتى جەردەن الاتىنىن ايتتى. اتالعان شارۋاشىلىق الەۋمەتتىڭ الەۋەتىن كوتەرۋ ماقساتىندا اۋىل تۇرعىندارىنا ارناپ باسپانا سالۋ ءىسىن دە قولعا الماق.
ساعابۇيەن اۋىلىندا 1980 جىلى سالىنعان مەكتەپ كۇردەلى جوندەۋدەن وتۋدە. نىساننىڭ كولەمى – 3 536 تەكشە مەتر. ەكى قاباتتى عيمارات 620 وقۋشىنىڭ ءبىلىم الۋىنا ارنالعان. بۇگىندە وندا ينفراقۇرىلىم تارتۋ, ەدەندى جاڭالاۋ, اكتەۋ-سىرلاۋ جۇمىستارى جۇرگىزىلۋدە. وبلىس اكىمى بەيبىت يساباەۆ نىساننىڭ جان-جاعىن كوگالاندىرۋ شاراسىن دا قاتار جۇرگىزۋ كەرەكتىگىن ەسكەرتتى. اۋىلداعى جاڭادان سالىنىپ جاتقان مەكتەپ قۇرىلىس ماتەريالدارىنىڭ قىمباتتاپ كەتۋىنە بايلانىستى كەستەدەن كەشىكتىرىلۋدە. قۇرىلىس جۇمىسىنىڭ قارجىسى قايتا ەسەپتەلىپ, كەرەكتى قاراجاتقا تۇزەتۋ ەنگىزىلگەن. ءوڭىر باسشىسى قۇرىلىس جۇمىسىن اياقتاپ, نىساندى پايدالانۋعا بەرۋ ۋاقىتىن جىلدىڭ اياعىنا دەيىن سوزدى. اۋداندا «اقسۋ گەس» فورەل شارۋاشىلىعى قۇرىلۋدا. سەرىكتەستىكتىڭ توراعاسى ايباربەك مۇحامەديەۆتىڭ ايتۋىنشا, شارۋاشىلىقتى اشۋعا 515 ملن تەڭگە قارجى جۇمسالعان. بۇگىندە مۇندا ينكۋباتسيا تسەحى سالىنۋدا. بولاشاقتا بالىقتان قىزىل ۋىلدىرىق الۋ جوسپارلانۋدا. سونىمەن بىرگە قايتا وڭدەۋمەن شۇعىلدانىپ, بالىق ءونىمىن كوبەيتپەك.
اقسۋ اۋدانىنداعى ىرگەلى شارۋاشىلىق «اقسۋ قانت» زاۋىتىنىڭ جەتەكشىسى سامات نادىرباەۆ بىلتىر 64 866 توننا قانت قىزىلشاسىنان 7,7 توننا دايىن ءونىم العانىن ايتتى. بيىل جىل سوڭىنا دەيىن قانت قامىسىن وڭدەۋ قولعا الىنباق. زاۋىتتىڭ مۇمكىندىگىن كورگەن ءوڭىر باسشىسى القاپتارعا سۋ جىبەرۋ, اۋىسپالى ەگىس جۇيەسىن ساقتاۋ, سۋبسيديا بەرۋ ارقىلى قانت قىزىلشاسىن وسىرۋگە قولداۋ بىلدىرىلەتىنىن جەتكىزدى. سونداي-اق زاۋىت باسشىسىنا شارۋاشىلىقتارمەن بىرلەسىپ, الداعى ۋاقىتتا اتقاراتىن جۇمىستاردى پىسىقتاۋدى تاپسىردى.
جانسۇگىر اۋىلىندا «قازسۋشار» مەملەكەتتىك مەكەمەسىنىڭ قولداۋىمەن شارۋاىشىلىك كانالىن جۇرگىزۋ قولعا الىنعان. يرريگاتسيالىق جۇيە يسلام بانكى ارقىلى قارجىلاندىرىلۋدا. سۋ جۇيەسى جاڭارتىلعان كەزدە 196,5 گەكتار استىق القابى سۋمەن قامتاماسىز ەتىلەدى. ءوڭىر باسشىسى القاپتارعا سۋ جىبەرۋدىڭ باسقا دا تەحنولوگيالارى جايلى ويىن ايتتى. جاڭبىرلاتقىش اگرەگاتتار قويۋ دا تىعىرىقتان شىعۋعا نەگىز بولماق. بۇل ىستەر الداعى ۋاقىتتا كەزەڭ-كەزەڭىمەن جۇيەگە اسىرىلماق.
اقسۋ اۋدانىنا ارنايى ىسسپارمەن كەلگەن وبلىس باسشىسى ىرگەلى ىستەردى اتقارۋدا بىرلەسىپ قانا ناتيجەگە قول جەتكىزۋگە بولاتىنىن ەسكەرتتى. ءوڭىردى دامىتۋعا بارىنشا قولداۋ جاسايتىنىن دا جاسىرمادى.
جەتىسۋ وبلىسى