استانادان بۋراباي كۋرورتى جانە قاراعاندى قالا ماڭى ارالىعىنداعى تەمىر جول قاتىناسى جاڭا ساپالىق دۇنيەگە كوتەرىلدى. «قازاقستان تەمىر جولى» كومپانياسىنىڭ تاپسىرىسى نەگىزىندە رەسەي فەدەراتسياسىنىڭ دەميحوۆ ماشينا جاساۋ زاۋىتى شىعارعان ەد9ە سەرياسىنداعى «وقجەتپەس» جانە «سارىارقا» اتالاتىن قازىرگى زامانعى ەكى ەلەكترپويىزى وتكەن جۇمادا وزدەرىنىڭ العاشقى جولاۋشىلارىن قابىلداپ الىپ, ولاردى جايلى جاعدايدا قاجەتتى جەرلەرىنە جەتكىزدى.
بۇل قتج مەن رەسەيلىك تەمىر جول جىلجىمالى قۇرامىن شىعارۋشى اراسىنداعى ءبىرىنشى جوبا ەمەس. 2003 جىلى قازاقستان پرەزيدەنتى نۇرسۇلتان نازارباەۆ ءدال وسىنداي العاشقى ەلەكتر پويىزىنىڭ ەلوردادان ەلىمىزدىڭ كۋرورتتى وڭىرىنە باستالعان العاشقى ساپارىنا ساتتىلىك تىلەپ, شىعارىپ سالعان بولاتىن. سودان بەرگى ۋاقىتتا رەسەيلىك جىلجىمالى قۇرام شىعارۋشىمەن اراداعى بۇل جۇمىس توقتاپ كورگەن جوق. بۇل زاۋىتتان «قالاماڭى تاسىمالى» اق ءۇشىن ەلەكترپويىزدارىنا ارنالعان 32 ۆاگون ساتىپ الدى. ونىڭ 20 ۆاگونىن 2010 جىلى, 2 ۆاگونىن 2011 جىلى, 10 ۆاگونىن 2013 جىلى ساتىپ الىپ, قاتارعا قويدى.
– ءبىز جولاۋشىلاردى وسىناۋ وتە جايلى قازىرگى زامانعى ۆاگوندارمەن ساپارعا شىعۋعا شاقىرامىز. بۇل ۆاگونداردا جولاۋشىلار قولايىنا جاعاتىن بىرقاتار جاعىمدى دۇنيەلەر قاراستىرىلعان. ۆاگوندار كونديتسيونەرلەرمەن, جايلى كرەسلولارمەن قامتىلعان. ۆاگونارالىق وتپەلى جولداردان بۇرىنعىداي جەل كەۋلەپ تۇرعان جوق. ونىڭ ۇستىنە پويىزدىڭ قاي جەردە كەلە جاتقانى جۇگىرتپە جولدار ارقىلى جولاۋشىلارعا تۇراقتى تۇردە حابارلانىپ وتىرادى. ۆاگوندا Wi-Fi جۇيەسى جۇمىس ىستەيدى, – دەيدى «قالاماڭى تاسىمالى» اق پرەزيدەنتى بايان سۋنناتوۆا.
جىلجىمالى قۇرامدى شىعارۋشى ونىڭ ۇستىنە ونىڭ ەلەكتر قۋاتىن مەيلىنشە از تۇتىنۋىن دا قاراستىرعان. مۇنىڭ ءوزى «جاسىل ەكونوميكا» تۇرعىسىنان العاندا توتەنشە ماڭىزدى ماسەلە بولىپ تابىلادى.
– قۋات ۇنەمدەۋ تەحنولوگيالارى ارناۋلى ازىرلەنگەن ەلەكتر قۇرال-جابدىقتارىن قولدانۋ ەسەبىنەن ەلەكتر قۋاتىن ەداۋىر دارەجەدە, اتاپ ايتقاندا, 20 پايىزعا دەيىن ۇنەمدەيدى, – دەيدى «دەميحوۆ ماشينا جاساۋ زاۋىتى» ااق كوممەرتسيالىق ديرەكتورى الەكساندر لوشمانوۆ.
ۇستىمىزدەگى جىلدىڭ ەكىنشى توقسانىندا قتج ءۇشىن ەد9ە ەلەكترپويىزىنىڭ 40 ۆاگونىن جەتكىزۋ كۇتىلۋدە. بۇل ارقايسىسى 8 ۆاگوننان تۇراتىن 5 جىلجىمالى قۇرام «استانا – بۋراباي كۋرورتى» جانە «استانا – قاراعاندى» باعىتتارىنا قويىلماق. مۇنىڭ ءوزى وسى ارالىقتارداعى پويىزدىڭ قوزعالىسىنىڭ جيىلىگىن كۇنىنە سايكەسىنشە 2 جانە 3 رەتكە دەيىن جەتكىزەتىن بولادى.
وسى رەتتە تەمىرجولشىلار مەملەكەت باسشىسىنىڭ استانا مەن الماتىنى اگلومەراتسيالار ورتالىقتارىنا اينالدىرۋ جونىندەگى بەرگەن تاپسىرماسىن جۇزەگە اسىرۋعا وزدەرىنىڭ دە وسىلايشا ۇلەس قوسىپ وتىرعاندىقتارىن ماقتانىش قىلاتىنداي. ارينە, جاڭادان پايدا بولاتىن اگلومەراتسيالىق ورتالىقتار وزدەرىنىڭ ەكونوميكالىق قۋاتى ارقىلى ماڭىنداعى وڭىرلەرگە دە ءتيىمدى ىقپال ەتەتىندىگى تۇسىنىكتى. ءماسەلەن, حالىق قوزعالىسىنىڭ كۇشەيۋىمەن قاتار, وسى ماسەلەدە ۇتقىرلىقتىڭ دا پايدا بولۋى, پويىزدارعا قىزمەت كورسەتەتىن جاڭا جۇمىس ورىندارىنىڭ اشىلۋى بۋراباي مەن قاراعاندى وڭىرلەرىنىڭ ەكونوميكاعا تارتىلىسىن ودان ءارى كۇشەيتە تۇسەتىندىگى انىق.
ايتپاقشى, جاڭا پويىزدار بيلەتتەرىنىڭ باعاسى قىزمەت ساپاسىنىڭ الدەقايدا جاقسارا تۇسكەندىگىنە قاراماستان, وسى باعىتتاعى قالعان مارشرۋتتار دەڭگەيىندە قالىپ وتىر. ماسەلەن, ءبىرىنشى سىنىپتى ۆاگون باعاسى – 1 088 تەڭگە, ەكىنشى سىنىپتى ۆاگوندىكى – 1 013 تەڭگە, ءۇشىنشى سىنىپتى ۆاگوندىكى – 842 تەڭگە.
سۇڭعات ءالىپباي,
«ەگەمەن قازاقستان».