بيىل قوستاناي مەملەكەتتىك پەداگوگيكا ينستيتۋتىنىڭ قۇرىلعانىنا 75 جىل تولادى. ينستيتۋت باسشىلىعى ءبىلىم ورداسىنىڭ وسى مەرەكەسىن جاس ۇرپاق ءۇشىن پايدالى, ءىز قالارلىق ىسپەن اتاپ ءوتۋدى ويلاستىرىپ وتىر.
ينستيتۋت رەكتورى, پروفەسسور قۋات بايمىرزاەۆتىڭ باستاماسىمەن ۇلتتىق مەكتەپتىڭ نەگىزىن قالاعان, قازاق دالاسىنا ءبىلىم ءدانىن سەپكەن اعارتۋشى ۇستاز ىبىراي ءالتىنساريننىڭ ءومىرى مەن مۇرالارىن زەرتتەي ءتۇسۋ جانە ناسيحاتتاۋ ماقساتىمەن ىبىرايتانۋ عىلىمي ورتالىعى قۇرىلعان بولاتىن. از ۋاقىتتىڭ ىشىندە ورتالىق جۇمىسىن قىزۋ باستاپ تا كەتتى. ەندى التىنسارين ءدارىسحاناسىن اشتى. ءدارىسحانادا ىبىراي ءومىربايانى, ۇستازدىق جولى, ۇلى ۇستازدىڭ اتاقتى شاكىرتتەرىنىڭ سۋرەتتەرى ىلىنگەن.
– ينستيتۋتىمىزدىڭ ەرەكشەلىگى – ءبىز مەكتەپكە مۇعالىمدەر دايىندايمىز. ورتا ءبىلىم بەرۋ سالاسىن بىلىكتى كادرلارمەن قامتاماسىز ەتۋ ماسەلەسى وتە وزەكتى قويىلىپ وتىر. ال ۇلى ۇستاز «مۇعالىم – مەكتەپتىڭ جۇرەگى» دەگەن بولاتىن. ءبىزدىڭ بولاشاق مۇعالىمدەر ىبىراي ءالتىنساريننىڭ ءومىرىن, شىعارمالارىن, ادىستەمەلەرىن ءبىلۋى ءتيىس. سوندىقتان پەداگوگيكا عانا ەمەس, جالپى ءبىلىم بەرۋ ىسىندەگى ءىرى تۇلعانىڭ اتىندا ءدارىسحانا بولۋى كەرەك, – دەدى ينستيتۋت رەكتورى قۋات بايمىرزاەۆ. ءدارىسحانا تۇساۋكەسەرىندە ۇستازدار, قالاداعى زيالى قاۋىم وكىلدەرى كەمەڭگەر ۇستاز اتىنداعى ءدارىسحانانىڭ اشىلۋىندا پروفەسسور امانجول كۇزەمباي ۇلى, اقىندار اقىلبەك شاياحمەت, ءاسيا بەركەنوۆا, ناعاشىباي مۇقاتوۆ, ولكەتانۋشى قۋانىش ورمانوۆ ىبىرايدى جاس ۇرپاققا ناسيحاتتاي بەرۋ كەرەكتىگىن تىلگە تيەك ەتتى. سونىمەن قاتار, وسى شارا اياسىندا بەلگىلى اقىن, فيلولوگيا عىلىمدارىنىڭ كانديداتى سەرىكباي وسپانوۆتىڭ ىبىرايتانۋ عىلىمي ورتالىعىندا دايىندالعان « ۇلى ۇستاز ۇلاعاتى» اتتى كىتابىنىڭ تۇساۋكەسەرى ءوتتى.
ءنازيرا جارىمبەتوۆا,
«ەگەمەن قازاقستان».
قوستاناي.