پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى ديپلوماتيالىق قىزمەتتىڭ 30 جىلدىق مەرەيتويىنا وراي الماتى قالاسىندا وتكەن سالتاناتتى جينالىستا ءسوز سويلەدى. جيىندا وتاندىق ديپلوماتيالىق قىزمەت ارداگەرلەرىنە قۇرمەت كورسەتىلىپ, ساياسات جانە ديپلوماتيا ورتالىعى اشىلدى.
سالتاناتتى ءىس-شارادا پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى مەملەكەت باسشىسى قاسىم-جومارت توقاەۆتىڭ ىستىق ىقىلاسىن جەتكىزىپ, قۇتتىقتاۋ حاتىن وقىپ بەردى.
«حالىقارالىق قاتىناستاردىڭ قازىرگى زامانعى جۇيەسىندەگى قازاقستان رەسپۋبليكاسى» اتتى حالىقارالىق كونفەرەنتسيا قاتىسۋشىلارىنا جولداعان قۇتتىقتاۋ حاتىندا پرەزيدەنت ەلىمىزدىڭ ديپلوماتيالىق قىزمەتىنىڭ وتىز جىلدىق مەرەيتويى حالقىمىز جاڭا قازاقستان قۇرۋعا كىرىسكەن سىندارلى ساتپەن تۇسپا-تۇس كەلگەنىن اتاپ ءوتتى. «قۇرمەتتى قازاقستان رەسپۋبليكاسى ديپلوماتيالىق قىزمەتىنىڭ ارداگەرلەرى مەن قىزمەتكەرلەرى! سىزدەردى ەلىمىزدىڭ ديپلوماتيالىق قىزمەتىنىڭ 30 جىلدىق مەرەيتويىمەن شىن جۇرەكتەن قۇتتىقتايمىن. ءبىز وسىناۋ تاريحي مەجەگە ۇلكەن جەتىستىكتەرمەن جەتتىك», دەلىنگەن سىرتقى ىستەر ءمينيسترى مۇحتار تىلەۋبەردى وقىپ بەرگەن مەملەكەت باسشىسىنىڭ حاتىندا.
ەل پرەزيدەنتىنىڭ اتاپ وتۋىنشە, ەلىمىز 186 ەلمەن قارىم-قاتىناس ورناتىپ, 50 حالىقارالىق ۇيىمنىڭ مۇشەسى بولدى. ء«بىز وڭىرلىك جانە جاھاندىق پروتسەستەرگە بەلسەندى قاتىساتىن ورنىقتى ءارى بەدەلدى مەملەكەتكە اينالدىق. سىزدەر تاۋەلسىزدىگىمىزدىڭ العاشقى كۇنىنەن ەلىمىزدىڭ مۇددەسىن حالىقارالىق ارەنادا قورعاپ كەلەسىزدەر. قازىرگى گەوساياسي تۇراقسىزدىق جاعدايىندا سىزدەر جاھاندىق الەمدە قازاقستاننىڭ ۇستانىمىن نىعايتۋعا جانە شەت مەملەكەتتەرمەن ىنتىماقتاستىقتى دامىتۋعا ۇلكەن ۇلەس قوساسىزدار», دەدى قاسىم-جومارت توقاەۆ.
مەملەكەت باسشىسى ەلىمىزدىڭ ديپلوماتيالىق قىزمەتىنىڭ وتىز جىلدىق مەرەيتويى حالقىمىز جاڭا قازاقستان قۇرۋعا كىرىسكەن سىندارلى ساتپەن تۇسپا-تۇس كەلگەنىن باسا اتاپ وتەدى.
«وسىعان وراي سىرتقى ىستەر مينيسترلىگىنە ۇلكەن جاۋاپكەرشىلىك جۇكتەلەدى. ديپلوماتتاردىڭ باستى مىندەتى – مەملەكەتىمىزدىڭ الەمدەگى مارتەبەسىن ودان ارى ارتتىرۋ, سىرتقى قاۋىپسىزدىكتى قامتاماسىز ەتۋ, شەتەلدەگى ازاماتتارىمىزدىڭ قۇقىقتارى مەن مۇۇددەلەرىن قورعاۋ», دەدى پرەزيدەنت.
سالتاناتتى جيىندا مينيستر ارداگەرلەردىڭ قازاق ديپلوماتيا مەكتەبىنىڭ قالىپتاسۋىنا قوسقان ۇلەسىن جوعارى باعالادى. سونداي-اق ول سىرتقى ىستەر مينيسترلىگىنىڭ العاشقى عيماراتى ورنالاسقان الماتىدا قازاقستان سىرتقى ساياساتىنىڭ باستى قاعيداتتارى مەن ىرگەتاسى «تازا پاراقتان» جازىلعانىن, سىرتقى قاتىناستار ورگاندارى قىزمەتىنىڭ ۇيىمدىق-قۇقىقتىق نەگىزدەرىن جاساۋ بويىنشا ماڭىزدى جۇمىس اتقارىلعانىن اتاپ ءوتتى. «سىزدەر شەتەلدىك ديپلوماتيالىق كورپۋسپەن كاسىبي شەبەرلىكپەن بايلانىس ورناتتىڭىزدار. قوسقان ۇلەستەرىڭىزدىڭ ارقاسىندا بۇگىن قازاق ديپلوماتتارى كەز كەلگەن حالىقارالىق الاڭداردا مەملەكەتىمىزدىڭ مۇددەلەرىن سەنىمدى قورعاپ, ودان ءارى ىلگەرىلەتە الاتىن دەڭگەيگە جەتتى», دەدى م.تىلەۋبەردى.
مينيستر ارداگەرلەر مەن قىزمەتكەرلەرگە زور دەنساۋلىق پەن ۇزاق عۇمىر تىلەپ, كاسىبي مەرەكەگە وراي مەملەكەتتىك جانە ۆەدومستۆولىق ناگرادالار تابىس ەتتى. جيىنعا قۇرمەتتى قوناق رەتىندە شاقىرىلعان ديپلوماتيا ارداگەرى, اقىن ولجاس سۇلەيمەنوۆ تاۋەلسىز قازاق ديپلوماتياسىنىڭ العاشقى كەزەڭدەرىن ەسكە الدى. «تاجىريبەمىز مەن مۇمكىندىگىمىزدى قازاق ەلىن الەمگە تانىتۋعا جانە ينۆەستيتسيا تارتۋعا جۇمىلدىردىق. تاۋەلسىز قازاق ديپلوماتياسىنىڭ 30 جىلدىعىنا ارنالعان مەدال مەن ءۇشىن ەرەكشە. بۇل مەنىڭ يۋنەسكو-دا, يتاليادا ديپلوماتيالىق قىزمەتپەن وتكەن 20 جىلدىق ءومىرىمدى ەسكە تۇسىرەدى», دەدى و.سۇلەيمەنوۆ.
سونداي-اق مينيستر م.تىلەۋبەردى ءال-فارابي اتىنداعى قازۇۋ-دا «جاڭا گەوساياسي جاعدايداعى قازاقستان ديپلوماتياسى» تاقىرىبىندا وتكەن دوڭگەلەك ۇستەلدە ءسوز سويلەدى. «وتىز جىل ىشىندە ءبىز وڭىرلىك جانە جاھاندىق پروتسەستەرگە بەلسەندى قاتىساتىن تۇراقتى جانە بەدەلدى مەملەكەتكە اينالدىق. ديپلوماتيامىز ەگەمەندىك العان كۇننەن باستاپ مەملەكەتتىك شەكارانىڭ بۇكىل پەريمەترى بويىنشا حالىقارالىق-قۇقىقتىق تانىلۋىن جانە بارلىق كورشىلەرىمىزبەن جانە الەمنىڭ باسقا مەملەكەتتەرىمەن بەيبىت جانە تەڭ قۇقىقتى بايلانىستار ورناتۋدى قامتاماسىز ەتتى», دەپ اتاپ ءوتتى مينيستر ءوز سوزىندە.
ونىڭ ايتۋىنشا, قازاقستان ەۋرازيالىق كەڭىستىكتەگى ينتەگراتسيالىق پروتسەستەردىڭ قوزعالتقىش كۇشىنە اينالدى جانە بىرقاتار ءىرى حالىقارالىق ۇيىمعا تابىستى توراعالىق ەتتى. وسى تۇرعىدا ەلىمىزدىڭ سىرتقى ساياسي ۆەدومستۆوسى ءۇشىن كاسىبي ديپلوماتيالىق كادرلاردى دايارلاۋعا قازۇۋ-دىڭ قوسقان ەلەۋلى ۇلەسى ەرەكشە اتاپ ءوتىلدى.
دوڭگەلەك ۇستەلدە ۋنيۆەرسيتەت رەكتورى ج.تۇيمەباەۆ, ديپلوماتيالىق قىزمەتتىڭ ارداگەرلەرى تىلەۋحان قابدراحمانوۆ پەن ءادىل احمەتوۆ بايانداما جاسادى. سونىمەن قاتار ءىس-شارا شەڭبەرىندە مينيستر مەن رەكتور قازۇۋ جانىنان سىرتقى ساياسات جانە ديپلوماتيا ورتالىعىن سالتاناتتى تۇردە اشتى.
ءوز كەزەگىندە وقۋ ورداسىنىڭ رەكتورى جانسەيىت تۇيمەباەۆ ديپلوماتيالىق كورپۋس وكىلدەرىن كاسىبي مەرەكەمەن قۇتتىقتادى. ء«بىزدىڭ حالىقارالىق دارەجەدەگى تۇلەكتەرىمىز زاڭ شىعارۋشى جانە اتقارۋشى بيلىك ورگاندارىندا پارلامەنت پەن ۇكىمەت اپپاراتىندا, ءسىم-دە جانە شەتەلدەردەگى وكىلدىكتەردە جەمىستى ەڭبەك ەتۋدە. ولاردىڭ كوپشىلىگى ەلىمىزدى ديپلوماتيالىق وكىلدىكتەردە تانىستىرادى, اكادەميالىق مەكەمەلەر مەن ىسكەرلىك ورتالاردا جوعارى سۇرانىسقا يە», دەپ اتاپ ءوتتى رەكتور.
سونداي-اق كەزدەسۋ بارىسىندا بۇۇ جاھاندىق كوممۋنيكاتسيالار دەپارتامەنتىنىڭ وكىلى جانە قازاقستانداعى بۇۇ اقپاراتتىق بيۋروسىنىڭ باسشىسى ۆلاستيميل سامەك, قحر-دىڭ الماتىداعى باس كونسۋلى تسزيان ۆەي, تۇركيا رەسپۋبليكاسىنىڭ الماتىداعى باس كونسۋلى الي رىزا اكىنجى ءسوز سويلەپ, ءوزارا ىنتىماقتاستىقتىڭ جارقىن بولاشاعى مەن ديپلوماتيالىق كادر دايارلاۋداعى قازۇۋ-دىڭ ءرولىن ەرەكشە اتاپ ءوتتى.
الماتى