سەناتتىڭ قارجى جانە بيۋدجەت كوميتەتىنىڭ توراعاسى راشيت احمەتوۆ جاپونيانىڭ قازاقستانداعى ەلشىسى ماساەسي كاموحارامەن كەزدەستى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
جۇزدەسۋشىلەر مەملەكەتارالىق ءوزارا ءىس-قيمىلدىڭ ماڭىزدى ءتۇرى بولىپ تابىلاتىن قازاقستان-جاپونيا پارلامەنتارالىق بايلانىستارىن دامىتۋ تۋرالى پىكىر الماستى. ر.احمەتوۆ اتاپ وتكەندەي, قازىرگى كەزدە ەكىجاقتى پارلامەنتارالىق ۇنقاتىسۋدى كەڭەيتۋ ءۇشىن جاقسى نەگىز جاسالدى. قازاقستان پارلامەنتىنىڭ قوس پالاتاسىندا دا جاپونيا پارلامەنتىمەن ىنتىماقتاستىق توپتارى جۇمىس ىستەيدى. جاپونيانىڭ جوعارى زاڭ شىعارۋ ورگانىندا دا قازاقستانمەن دوستىق ليگاسى بار. سەناتتاعى ىنتىماقتاستىق توبىنا جەتەكشىلىك ەتەتىن ر.احمەتوۆتىڭ پىكىرىنشە, وسى بىرلەستىكتەردىڭ الەۋەتىن مەيلىنشە تولىق كولەمدە پايدالانۋ قاجەت.
كەزدەسۋدە, سونداي-اق, ەكى ەلدىڭ ىسكەر توپتارى اراسىنداعى بايلانىستاردى قالىپتاستىرۋ جولدارى, استانادا وتەتىن ەكسپو-2017 حالىقارالىق كورمەسىنە جاپون كومپانيالارىنىڭ قاتىسۋى جانە مادەني-گۋمانيتارلىق الماسۋلاردى نىعايتۋ جونىندە ءسوز بولدى.
كەزدەسۋگە سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ حاتشىسى بىرعانىم ءايتىموۆا قاتىسىپ, سەمەي يادرولىق پوليگونى اۋماعىن ساۋىقتىرۋعا حالىقارالىق ءجاردەم, سونداي-اق, اەروعارىش سالاسىنداعى ىنتىماقتاستىقتىڭ كەلەشەگى تۋرالى ماسەلەلەردى كوتەردى.