«استانا بالەت» تەاترى ەلوردا كۇنىنە ارناپ قالا تۇرعىندارى مەن قوناقتارىنا مۋزىكالىق تاماشا تارتۋ جاساماق. دالىرەك ايتقاندا, 2 شىلدەدە قازاقستاننىڭ ەڭبەك سىڭىرگەن قايراتكەرلەرى ايگۇل ءتاتي مەن مۋكارام اۆاحري قويعان « ۇلى دالا مۇراسى» اتتى كونتسەرتتىك باعدارلاماسىن ۇسىنادى. بۇل باعدارلاما ەۋروپا مەن امەريكانىڭ ءىرى قالالارىندا كورسەتىلىپ, كورەرمەندەردىڭ ىقىلاسىنا بولەنگەن.
ۇلتتىق بىرەگەيلىكتى وزىندىك بي تىلىمەن جەتكىزەتىن ەتنوگرافيالىق سيپاتتاعى باعدارلاما – تەاتردىڭ ايشىقتى دۇنيەسىنە اينالعان. وندا قازاق حورەوگرافياسىنىڭ سوڭعى جەتىستىكتەرىن تاماشالاپ, ءداستۇرلى بي مەن زاماناۋي بالەتمەيستەرلىك شەشىمدەردىڭ ۇيلەسىمىنە كۋا بولا الاسىز.
قويۋشى-بالەتمەيستەر ايگۇل ءتاتيدىڭ ايتۋىنشا, « ۇلى دالا مۇراسى» بي سيۋيتالارىنىڭ جيناعى مادەنيەتىمىزدىڭ قۇندى دۇنيەلەرىن بويىنا سىڭىرگەن. بي, پلاستيكا ءتىلى ارقىلى حالقىمىزدىڭ جان دۇنيەسىن اشۋعا تىرىسقان. سونىمەن قاتار وتاندىق بالەتمەيستەرلەردىڭ حورەوگرافيالىق مينياتيۋرالارى كەڭ-بايتاق دالامىزدىڭ كوركەم تابيعاتىن عانا ەمەس, حالقىمىزدىڭ ءداستۇرى مەن تاريحىن بي تىلىمەن اسەم جەتكىزەدى. تەاتر ارتىستەرىنىڭ ورىنداۋىنداعى ۇلتتىق بيلەرىمىز حالقىمىزدىڭ ۇلىلىعى مەن پاراساتىن, اشىق-جارقىن بولمىسىن شەبەر بەينەلەيدى.
سونداي-اق 5-6 جانە 8-9 شىلدەدە اتالعان ونەر ورداسىنىڭ ساحناسىندا سيمفونيالىق وركەستردىڭ سۇيەمەلدەۋىمەن ەۋروپا حورەوگرافياسىنىڭ كەشى وتەدى. مازمۇندى كەشتىڭ ءبىرىنشى بولىمىندە كورەرمەندەر «ورفەي مەن ەۆريديكا» ءبىر اكتىلى بالەتىنىڭ پرەمەراسىن تاماشالاسا, ەكىنشى بولىمدە ستيۆەن رايحتىڭ داۋىلپاز ىرعاعىنداعى اۋەنىنە زاماناۋي بي الىبى يرجي كيليان قويعان «جولدان تايعاندار» حورەوگرافيالىق مينياتيۋراسىن كورسەتەدى.
ايتا كەتەيىك, مازمۇندى ءىس-شارا مادەنيەت جانە سپورت مينيسترلىگىنىڭ قولداۋىمەن وتەدى.