سەناتتا جۋرناليستەر اراسىنداعى «پاراسات» بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى, دەپ حابارلايدى Egemen.kz.
باق وكىلدەرىن كاسىبي مەرەكەلەرىمەن قۇتتىقتاعان سەنات توراعاسى ماۋلەن اشىمباەۆ مەملەكەت باسشىسىنىڭ رەفورمالارىن جانە «جاڭا قازاقستان» تۇجىرىمداماسىن ىسكە اسىرۋدى زاڭنامالىق تۇرعىدان قامتاماسىز ەتۋ جولىنداعى سەناتورلاردىڭ جۇمىسىنا توقتالدى. بۇل باعىتتا پالاتانىڭ اقپاراتتىق اشىقتىعىنا باسا ءمان بەرىلەدى.
«سەنات جۇمىسىندا قىزمەتىمىزدىڭ اشىقتىعىنا جانە باق وكىلدەرىمەن تىعىز بايلانىسقا ءاردايىم ەرەكشە كوڭىل بولەمىز. بۇل – ءبىز ءۇشىن ماڭىزدى باعىت. ءبىز سەناتتىڭ زاڭ شىعارۋ قىزمەتىن حالىققا جان-جاقتى جەتكىزۋگە مۇددەلىمىز», دەدى ماۋلەن اشىمباەۆ.
سەنات سپيكەرى دەپۋتاتتار قابىلداناتىن زاڭداردىڭ ساپاسىنا تەرەڭ ءمان بەرەتىنىن ايتتى. سونداي-اق ولار ازاماتتاردى الاڭداتقان ماسەلەلەردى ۇنەمى كوتەرىپ كەلەدى. وسى جۇمىستاردى جۇرتقا جەتكىزۋ ءۇشىن سەنات ءداستۇرلى بۇقارالىق اقپارات قۇرالدارىمەن جانە ماسس-مەديامەن بىرلەسىپ جۇمىس ىستەۋدى جالعاستىرا بەرەدى.
سونىمەن قاتار پالاتا توراعاسى سەناتتىڭ زاڭ شىعارۋ قىزمەتىن حالىققا دارىپتەپ جۇرگەن جۋرناليستەردىڭ پارلامەنتتىك پۋلىن, ەلىمىزدەگى تەلەارنا, راديو, ءباسپاسوز رەداكتسيالارىنا العىس ءبىلدىردى.
ايتا كەتەيىك, بيىل «پاراسات» بايقاۋىنا 100-دەن استام جۇمىس كەلىپ ءتۇستى. اۆتورلاردىڭ قاتارىندا ەلوردامىزبەن بىرگە وڭىرلەردەگى تەلەارنا, راديو, گازەت, اقپاراتتىق پورتال جانە باسقا دا بۇقارالىق اقپارات قۇرالدارىنىڭ قىزمەتكەرلەرى بار.