ەلوردادا Amanat پارتياسىنىڭ ۇيىمداستىرۋىمەن Amanat CUP ءبىرىنشى رەسپۋبليكالىق شاحمات ءتۋرنيرى ءوتتى. سايىسقا 8-35 جاس ارالىعىنداعى ەكىنشى جانە ودان جوعارى رازريادتاعى 200-دەن استام قاتىسۋشى ەلوردانىڭ باستى سيمۆولى – «بايتەرەك» مونۋمەنتىنىڭ الاڭىندا باق سىنادى.
چەمپيونات جەڭىمپازدارىن قۇتتىقتاعان پارتيانىڭ اتقارۋشى حاتشىسى اسحات ورالوۆ بۇل ءتۋرنيردىڭ بالالار جىلىنا وراي جانە ەلىمىزدە شاحماتتى كەڭىنەن ناسيحاتتاۋعا باعىتتالعانىن اتاپ ءوتتى.
«بۇگىندە قازاقستان الەمدىك شاحمات رەيتينگىندە 37-ورىندا تۇر. وتاندىق شاحماتشىلار الەمدىك دەڭگەيدە توپ جارىپ, ەلىمىزدىڭ داڭقىن اسقاقتاتىپ ءجۇر. پارتيا ءداستۇرلى تۇردە اشىق رەسپۋبليكالىق تۋرنير وتكىزۋدى قولعا الىپ وتىر. كەلەسى جىلدان باستاپ بۇل باستاما ەلىمىزدىڭ بارلىق وڭىرىندە جالعاسىن تابادى. مەملەكەت باسشىسى قاسىم-جومارت توقاەۆ شاحمات سپورتىن دامىتۋ مەن ونى قولداۋعا ەرەكشە كوڭىل ءبولىپ كەلەدى. ءبىز جاستاردىڭ, بالالاردىڭ قابىلەت-قارىمىن بايقاپ وتىرمىز جانە ەلىمىزدەگى شاحمات سپورتىنىڭ دامۋىنا ءوز ۇلەسىمىزدى قوسقىمىز كەلەدى», دەدى اسحات ورالوۆ.
ءوز كەزەگىندە حالىقارالىق گروسسمەيستەر جانسايا ابدىمالىك مۇنداي چەمپيوناتتاردىڭ جاس شاحماتشىلار ءۇشىن ماڭىزى زور ەكەنىن اتاپ ءوتتى.
«بىرىنشىدەن, بۇل شاحمات سپورتىن دارىپتەۋ بولسا, ەكىنشىدەن, بالالار ءۇشىن ۇلكەن تاجىريبە. ولار ەلدەن شىقپاي-اق ءتۇرلى دەڭگەيدەگى قارسىلاستارمەن باسەكەگە تۇسۋگە مۇمكىندىك الادى. مۇندا قاتىسۋشىلار كوپ, دەمەك باسەكەلەستىك بار. ءتۋرنيردى جوعارى دەڭگەيدە ۇيىمداستىرعانى ءۇشىن Amanat پارتياسىنا العىسىمدى بىلدىرەمىن», دەدى جانسايا ابدىمالىك.
تۋرنير جەڭىمپازدارىنىڭ ءبىرى كونستانتين كازاكوۆتىڭ ايتۋىنشا, بۇگىندە ەلىمىزدە شاحماتقا دەگەن قىزىعۋشىلىق ارتقان.
«وسىنداي تۋرنيرلەردىڭ وتكىزىلە باستاعانى قۋانتادى. ويتكەنى جاس كەزىمدە مۇنداي ءىس-شارالار سيرەك وتەتىن ەدى. قازىر بۇل سپورت ءتۇرىن دامىتۋعا مەملەكەت تاراپىنان قولداۋ كورسەتىلۋدە, پارتيا دا ءوز ۇلەسىن قوسىپ وتىر. الداعى ۋاقىتتا باسەكە دەڭگەيى ارتا تۇسەدى دەگەن ويدامىن», دەدى كونستانتين كازاكوۆ.
تۋرنير قورىتىندىسىنا سايكەس «جاستار» كاتەگورياسى بويىنشا ءبىرىنشى ورىندى كونستانتين كازاكوۆ, ەكىنشى ورىندى باقتيار نۇعىمانوۆ جانە ءۇشىنشى ورىندى تالعات عۇبايدۋللين يەلەندى. ال «بالالار» كاتەگورياسىندا الديار اڭسات ۇزدىك دەپ تانىلسا, ەكىنشى ورىندى ماديار التىنبەك ۇلى جانە ءۇشىنشى ورىندى ءابۋالى سقاق قانجىعاسىنا بايلادى.
سايىستىڭ جالپى جۇلدە قورى 5 ملن تەڭگەدەن استى. جەڭىمپازدار مەن جۇلدەگەرلەردى بەلگىلى قازاقستاندىق شاحماتشىلار جانسايا ابدىمالىك, ءبيبىسارا اساۋباەۆا, دارمەن سادۋاقاسوۆ جانە مەرۋەرت كاماليدەنوۆا ماراپاتتادى.
ايتا كەتسەك, تۋرنير فيدە رەيتينگتىك ەسەبىمەن شۆەيتساريالىق جۇيە بويىنشا ءوتتى. قاتىسۋشىلاردىڭ جەرەبەسى Swiss Manager باعدارلاماسىن قولدانۋ ارقىلى وتكىزىلدى. Amanat CUP ءتۋرنيرى الداعى ۋاقىتتا جىل سايىن وتكىزىلمەك.