ينۆەستيتسيالىق ساياساتتىڭ جاڭا تۇجىرىمداماسى بەكىتىلدى

تۇجىرىمدامادا كوزدەلگەن نەگىزگى نىسانالى ينديكاتورلار تۋرالى ۇلتتىق ەكونوميكا ءبىرىنشى ۆيتسە-ءمينيسترى تيمۋر جاقسىلىقوۆ ايتىپ بەردى. قۇجاتتا 2026 جىلى نەگىزگى كاپيتالعا ينۆەستيتسيالار دەڭگەيىن ءىجو-ءنىڭ 25,1%-ىنا دەيىن جەتكىزۋ جانە تىكەلەي شەتەلدىك ينۆەستيتسيالار كولەمىن 2026 جىلى $25,5 ملرد-قا دەيىن ۇلعايتۋ كوزدەلگەن.

«وسى ماقساتتارعا قول جەتكىزۋ ءۇشىن تۇجىرىمداما جوباسى ينۆەستيتسيالار تارتۋ ساياساتىن قايتا قاراۋ جونىندەگى شارالار كەشەنىن كوزدەيدى. ينۆەستيتسيالىق دامۋدىڭ نەگىزگى پايىمى ءاربىر سالانىڭ ەكونوميكانى دامىتۋعا قوسقان ۇلەسىن ەسكەرە وتىرىپ, ينۆەستيتسيالار تارتۋعا تەڭدەستىرىلگەن تاسىلدەن تۇرادى. وڭدەۋ ونەركاسىبى باسەكەگە قابىلەتتىلىكتى ارتتى­رۋدىڭ ءتۇيىندى درايۆەرى بولىپ تابىلادى» دەدى بۇل جونىندە تيمۋر جاقسىلىقوۆ.

مۇندا ەڭبەك ونىمدىلىگىنىڭ وسۋىنە, ەكسپورتتىڭ كولەمىن ۇلعايتۋعا جانە كۇردەلىلىگىن ارتتىرۋعا, نەعۇرلىم جوعارى قايتا ءبولۋ ءونىمىنىڭ جاڭا ءوندىرىسىن يگەرۋگە جانە ءوندىرىستى كەزەڭ-كەزەڭىمەن وقشاۋلاۋعا باسا نازار اۋدارىلادى.

بۇل رەتتە مەملەكەتتىك قولداۋ جەكە كاپيتالدىڭ جەتىسپەۋشىلىگى بار جوعارى تەحنولوگيالىق كاپيتالدى قاجەت ەتەتىن جوبالاردى ىسكە اسىرۋ ءۇشىن باسىم كور­سەتىلەدى.

ەكىنشى ماڭىزدى درايۆەر – قىزمەت كورسەتۋ سەكتورى.

فوكۋس وڭىرلىك جانە جاھاندىق جەتكىزۋ تىزبەكتەرىنە ءتيىمدى ينتەگراتسيا­لاۋ ءۇشىن قاجەتتى ينفراقۇرىلىمدى دا­مىتۋعا, سونداي-اق ستراتەگيالىق ما­ڭىزدى ينۆەستيتسيالىق جوبالاردى ىسكە اسىرۋ ءۇشىن تەحنولوگيالار ترانسفەرتى مەن كاسىبي قۇزىرەتتەردى ىلگەرىلەتۋگە شوعىرلاندىرىلماق.

«مەملەكەتتىڭ قاتىسۋى ستراتەگيالىق جانە ماڭىزدى الەۋمەتتىك سالاداعى جوبالاردا باسىم بولادى. ەل ەكونو­ميكاسىنداعى ۇلكەن ۇلەسكە بايلانىس­تى شيكىزات سەكتورى ينۆەستيتسيالار اعىنىنىڭ ماڭىزدى باعىتى, سونداي-اق وڭدەۋ ونەركاسىبىن دامىتۋ ءۇشىن رەسۋرستىق بازا بولىپ قالا بەرەدى. بۇل جەردە نەگىزگى سالالاردى دامىتۋ ءۇشىن جالپى جۇيەلىك جاعدايلار جاساۋعا, ونىڭ ىشىندە جاڭا قايتا ءبولۋدى دامىتۋعا, نەگىزگى قۇرالداردى جاڭعىرتۋعا, تەحنولوگيالار ترانسفەرتىنە, تيىمدىلىك پەن ەكولوگيانى جاقسارتۋعا باسا نازار اۋدارىلادى», دەدى ت.جاقسىلىقوۆ.

وسى باعىتتاعى مەملەكەتتىك قولداۋ تەك دەڭگەيلەس شارالارعا عانا جۇرگىزىلەدى. ولار – ينجەنەرلىك ينفراقۇرىلىمدى جۇرگىزۋ, جەر قويناۋىن پايدالانۋ قۇقىعى, مەملەكەتتىك كەپىلدىكتەر.

ەلدىڭ ودان ءارى ينۆەستيتسيالىق دامۋى بارلىق ينۆەستيتسيا ءۇشىن, اسىرەسە ەڭبەك ونىمدىلىگى مەن ەكسپورتقا باعدارلانعان ينۆەستيتسيالار ءۇشىن ءتيىستى ورتا قۇرۋمەن بايلانىستى. وسىعان وراي تۇجىرىمداما جوباسى نەگىزگى ءۇش باعىت بويىنشا قۇرىلعان 45 ناقتى ءىس-شارادان تۇراتىن ءىس-قيمىل جوسپارىن قامتيدى.

ءبىرىنشى – اشىق جانە بولجامدى ينۆەستيتسيالىق ساياساتتى قالىپتاستىرۋعا باعىتتالاتىن ينۆەستيتسيالىق ەكوجۇيەنى ودان ءارى دامىتۋ. وسى باعىت شەڭبەرىندە قۇقىقتىق رەجىمدى جەتىلدىرۋ, سوت تورە­لىگىنە سەنىم مەن اقپاراتقا قول جەت­كى­زۋدى جاقسارتۋ, ۆەدومستۆوارالىق ۇيلەستىرۋدى نىعايتۋ, سونداي-اق جوبالار مەن وندىرۋشىلەردى ىلگەرىلەتۋدىڭ تسيفرلى قۇرالدارىن جاساۋ ارقىلى ينۆەستورلار ءۇشىن ينستيتۋتسيونالدىق ورتا مەن ينفراقۇرىلىم جەتىلدىرىلمەك.

ەكىنشى – نارىقتارعا قولجەتىمدىلىكتى جاقسارتۋ جانە كومپانيالاردىڭ قالىپ­تاسۋى ءۇشىن تۇراقتى جانە اۋىرتپالىق سالىنبايتىن جاعدايلار جاساۋدى كوز­دەيتىن جەكە سەكتوردىڭ ينۆەستيتسيالىق بەلسەندىلىگىنىڭ وسۋىنە جاردەمدەسۋ.

ءۇشىنشى – ەكونوميكانىڭ ينۆەس­تيتسيالىق الەۋەتىن اشۋ. بۇل باعىتتا مىناداي ءىس-شارالاردى ىسكە اسىرۋ كوزدەلگەن: ءتيىمسىز مەنشىك يەلەرىن اۋىستىرا وتىرىپ, دارمەنسىز كاسىپورىنداردىڭ نارىقتان جەدەل شىعۋى ءۇشىن بانكروتتىق راسىمدەرىن وڭايلاتۋ; كاپيتالدار ەل ەكونوميكاسىنا قايتارىلعان جاعدايدا ولارعا راقىم­شىلىق جاساۋ; قازاقستاندىق كومپانيا­لاردى شەتەلدىك يۋريسديكتسيالار مەن وفشورلىق ايماقتاردان احقو يۋريسديكتسياسىنا اۋىستىرۋ جانە ت.ب.

جالپى تۇجىرىمداما جاڭا ينۆەستي­تسيالىق تسيكلدى قالىپتاستىرۋعا جانە جاڭا ترەندتەردى ەسكەرە وتىرىپ, ينۆەس­تيتسيالار تارتۋ ساياساتىن قايتا قاراۋعا مۇمكىندىك بەرەدى.

ناتيجەسىندە, جاھاندىق ەنەرگەتيكالىق جانە تەحنولوگيالىق كوشۋ ESG تالاپتارىن كۇشەيتۋ جاعدايلارىندا ەلدىڭ تارتىمدىلىعىن ارتتىرۋعا باعىتتالعان جۇيەلى شارالار ىسكە اسىرىلادى.

تۇجىرىمداما جوباسى بارلىق مۇد­دەلى مەملەكەتتىك ورگاندارمەن جانە ۇيىم­دارمەن كەلىسە وتىرىپ جاسالعان.

شەتەلدىك ينۆەستيتسيالاردى تارتۋ بو­يىن­شا جۇرگىزىلىپ جاتقان جۇمىستار تۋرالى سىرتقى ىستەر ءمينيسترىنىڭ ورىنباسارى الماس ايداروۆ باياندادى. وڭىرلەردەگى ينۆەستيتسيالىق جاعداي تۋرالى شىمكەنت قالاسىنىڭ اكىمى مۇرات ايتەنوۆ, اقمولا وبلىسىنىڭ اكىمى ەرمەك مارجىقپاەۆ ايتىپ بەردى.

سىرتقى ىستەر ءمينيسترىنىڭ ورىنباسارى الماس ايداروۆ قازاقستاننىڭ شەتەلدىك ينۆەستيتسيالار اعىنى بويىنشا 46% ۇلەسىمەن ورتالىق ازيادا بۇرىنعىسىنشا كوش باستاپ تۇرعانىن ايتتى.

«سوڭعى 5 جىل ىشىندە ءبىزدىڭ ەلىمىز جىل سايىن 20 ملرد دوللاردان اسا ينۆەس­تيتسيا تارتۋدا. جاھاندىق پاندەمياعا بايلانىستى 2020 جىل ەرەكشە جاعداي بولىپ, بۇل كەزدە الەمدىك ينۆەستيتسيالار اعىمى 35%-عا ازايدى. 2021 جىلى ينۆەستيتسيالىق اعىندار قالپىنا كەلىپ, قازاقستان $23,7 ملرد تارتىپ, 37,7%-عا ءوسۋ كورسەتتى. ينۆەستيتسيالىق ساياساتتىڭ جاڭا تۇجىرىمداماسىنا سايكەس تىكەلەي شەتەلدىك ينۆەستيتسيالار جىل سايىنعى اعىنى 2026 جىلعا قاراي $25,5 ملرد-تى قۇراۋى قاجەت», دەدى ا.ايداروۆ.

جالپى, 2021 جىلى قازاقستانعا نەگىزگى ينۆەستورلار رەتىندە نيدەرلاندى, اقش, شۆەيتساريا, رەسەي فەدەراتسياسى, قىتاي, بەلگيا, ۇلىبريتانيا, وڭتۇستىك كورەيا, تۇركيا جانە فرانتسيا كىردى. فرانتسۋز رەسپۋبليكاسىن قوسپاعاندا, ولاردىڭ بارلىعىندا ءوسىم بايقالدى.

سونداي-اق بارلىق نەگىزگى سالالار بويىنشا دا ءوسىم بار: تاۋ-كەن ونەركاسىبى – 18,3%-عا, وڭدەۋ ونەركاسىبى – 65,4%-عا, ساۋدا – 46,7%-عا, قارجى جانە ساقتاندىرۋ قىزمەتى – 57,2%-عا, قۇرىلىس – 37,8%-عا ءوستى. بۇل رەتتە ينۆەستيتسيالاردىڭ تومەن­دەۋى ءبىلىم بەرۋ, دەنساۋلىق ساقتاۋ (61,6%), سۋمەن جابدىقتاۋ (74,4%) سالالارىندا بايقالدى.

2021 جىلدىڭ قورىتىندىسى بويىنشا شەتەلدىك ينۆەستيتسيالاردى تارتۋ بويىنشا نىسانالى كورسەتكىشتەر 11 ءوڭىر بويىن­شا ورىندالدى جانە اسىرا ورىندالدى. ەڭ جوعارى ءوسىمدى تۇركىستان, ماڭعىستاۋ وبلىستارى جانە نۇر-سۇلتان قالاسى كورسەتتى. جامبىل, سولتۇستىك قازاقستان جانە اقمولا وبلىستارى نىسانالى كور­سەت­كىشكە قول جەتكىزە المادى.

«ينۆەستورلارمەن جۇمىس ىستەۋدە ناقتى ءتاسىلدى قامتاماسىز ەتۋ ءۇشىن ينۆەستيتسيالاردى تارتۋدىڭ ءۇش دەڭگەيلى جۇيەسى قۇرىلدى جانە ولار تابىستى جۇمىس ىستەۋدە. سىرتقى دەڭگەي – بۇل ءبىزدىڭ جالپى سانى 104 بىرلىكتى قۇرايتىن قازاقستان رەسپۋبليكاسىنىڭ شەت ەلدەردەگى مەكەمەلەرى جانە KAZAKH INVEST وكىلدەرى. 2021 جىلدىڭ قورىتىندىسى بويىن­شا ولار 1,5 مىڭنان استام كومپانيامەن جۇمىستار جۇرگىزدى. ورتالىق دەڭگەي – بۇل بارلىق مينيسترلىك پەن كۆازيمەملەكەتتىك ۇيىمدار. ولار 2 700-دەن استام كەزدەسۋ وتكىزدى. وڭىرلىك دەڭگەي – بۇل بارلىق اكىمدىك. وتكەن جىلى وڭىرلەرگە شىعۋمەن شەتەلدىك دەلەگاتسيالاردىڭ 615 ساپارى ۇيىمداستىرىلدى. وسى جۇمىستاردىڭ قورىتىندىسىندا جىل سايىن كەم دەگەندە شەتەلدىكتەردىڭ قا­تىسۋىمەن 40 ءىرى جوبا ىسكە قوسىلادى», دەدى ا.ايداروۆ.

پرەزيدەنتتىڭ تاپسىرماسى بويىنشا بيىل ءساۋىر ايىندا ەلىمىزدە ىسكە اسىرىلىپ جاتقان بارلىق ينۆەستيتسيالىق جوبانىڭ بىرىڭعاي پۋلى قالىپتاستىرىلدى. اتالعان پۋل توقسان سايىن جاڭارتىلىپ, مينيسترلىكتەر مەن اكىمدىكتەردىڭ سايتتارىندا جاريالاندى. بۇگىنگى تاڭدا پۋلدىڭ جالپى كولەمى 24,4 ترلن تەڭگەنى قۇرايتىن 765 جوبادان تۇرادى جانە 112 مىڭ جاڭا جۇمىس ورنىن قۇرۋدى كوزدەيدى. كوپتەگەن جوبانى ىسكە اسىرۋ 2025-2026 جىلدارعا دەيىنگى كەزەڭدەردى قامتيدى. وسى جىلى 3,2 ترلن تەڭگە سوماسىنا 306 جوبا پايدالانۋعا بەرىلەدى دەپ كۇتىلۋدە. ونىڭ ىشىندە شەتەلدىك كومپانيالاردىڭ قاتىسۋىمەن 40 جوبا بار.

ەنگىزىلەتىن جوبالاردىڭ ىشىندە: اراب ينۆەستورلارىنىڭ نۇر-سۇلتان قالا­سىن­دا كوپفۋنكتسيونالدى كەشەن سالۋى, قاراعاندى وبلىسىندا تاتنەفت كوم­پانياسىنىڭ شينالارىن شىعاراتىن زاۋى­ت, اقتوبە وبلىسىندا 48 مۆت جەل ەلەكتر ستانساسىنىڭ ەكىنشى كەزەگىن سالۋ بويىنشا ENI/General Electric جوباسى, بالا­مالى ەلەكتر كوزدەرى بويىنشا شقو, الماتى, تۇركىستان, اقتوبە وبلىستا­رىن­داعى 5 جوبالار جانە ت.ب. بار.

ا.ايداروۆتىڭ ايتۋىنشا, شەتەلدىك ينۆەستورلارعا ناقتى ۇسىنىستار قالىپ­تاستىرۋ ءۇشىن بارلىق سالادان «ينۆەس­تيتسيالارعا تاپسىرىستار» قالىپتاس­تىرىلادى. حالىقارالىق ستاندارتتارعا سايكەس 200-گە جۋىق ينۆەستيتسيالىق ۇسى­نىس دايىندالدى جانە ولار بويىنشا جۇمىس جۇرگىزۋ قولعا الىندى, ولاردىڭ 159-ى بويىنشا جەرگىلىكتى سەرىكتەستەر بار.

سىرتقى ىستەر مينيسترلىگى زاتتاي گرانتتار, كەدەندىك جانە سالىقتىق جەڭىلدىكتەر ۇسىنۋعا ارنالعان ينۆەستيتسيالىق كەلى­سىمشارتتار جاسايدى. پاندەميا مەن باسقا دا داعدارىستىق قۇبىلىستارعا قاراماستان اتالعان مەملەكەتتىك قىزمەتتى تسيفرلاندىرۋ مەن بيزنەس-پروتسەستەردى تۇراقتى جەتىلدىرۋدىڭ ارقاسىندا ينۆەس­تيتسيالىق كەلىسىمشارتتاردىڭ سانى مەن ينۆەستيتسيا كولەمى ارتۋدا. ماسەلەن, ينۆەستيتسيالاردى مەملەكەتتىك قولداۋ شارالارى شەڭبەرىندە ەگەر 2018 جىلى تەك 33 كەلىسىمشارت بولسا, 2021 جىل­دىڭ قورىتىندىسى بويىنشا 85 ينۆەس­تيتسيالىق كەلىسىمشارت جاسالعان.

«وسى جىلى 44 كەلىسىمشارت جاسالدى, ەندى تاعى 100-دەن اسا كەلىسىمشارت جاساۋدى كوزدەپ وتىرمىز. كەلىسىمشارت جاساۋ تۇرعىسىنان نۇر-سۇلتان قالاسى, ماڭعىستاۋ, قاراعاندى جانە الماتى وبلىستارى – نەعۇرلىم بەلسەندى وڭىر­لەر. جاڭا ينۆەستيتسيالىق ساياسات تۇجى­رىمداماسىن, ESG قاعيداتتارىن, سونىمەن قاتار ەلىمىزدىڭ قاجەتتىلىكتەرى مەن الەمدەگى قازىرگى جاعدايدى ەسكەرە وتىرىپ, مىنا سالالارعا ينۆەستيتسيا تارتۋعا نازار اۋدارۋىمىز قاجەت: بۇلار تىكەلەي شەتەلدىك ينۆەستيتسياسىنىڭ ۇلەسى 1%-دان از بولاتىن اگروونەركاسىپ كەشەنى, كولىك جانە لوگيستيكا, قىزمەت كورسەتۋ سەكتورى, فينتەح, جاسىل ەنەرگەتيكا, سيرەك جەر مەتالدارى», دەدى ا.ايداروۆ.

شىمكەنت قالاسىنىڭ اكىمى مۇرات ايتەنوۆتىڭ ايتۋىنشا, وسى جىلدىڭ 5 ايىندا قالا ەكونوميكاسىنا 131,1 ملرد تەڭگە ينۆەستيتسيا تارتىلىپ, وتكەن جىلدىڭ ءتيىستى كەزەڭىمەن سالىستىرعاندا 29%-عا ۇلعايدى. جىل سوڭىنا دەيىن 538 ملرد تەڭگە ينۆەستيتسيا تارتۋ جوس­پار­لانۋدا, ونىڭ كولەمى 2021 جىلمەن سا­لىستىرعاندا 16%-عا ارتادى دەپ كۇ­تىلۋدە.

«جالپى, 2022-2025 جىلدارى قالادا جۇزەگە اسىرىلاتىن قۇنى 2,6 ترلن تەڭگەنى قۇرايتىن 242 ينۆەستيتسيالىق جوبا پۋلى قالىپتاستىرىلدى. ونىڭ ىشىندە وڭدەۋ ونەركاسىبى سالاسىندا قۇنى 550 ملرد تەڭگەنى قۇرايتىن 45 جوبا ىسكە اسىرىلادى», دەدى م.ايتەنوۆ.

قالا اكىمى ءىرى جوبالارعا توقتالدى. ءبىرىنشى, KAZALPACK كومپانياسى وسى جىلى قۇنى 23,4 ملرد تەڭگەنى قۇرايتىن اليۋمين بانكىلەرىنىڭ ءوندىرىسى جوباسىن ىسكە قوسىپ, 150 جاڭا جۇمىس ورنىن قۇردى. سونداي-اق بۇل كاسىپورىن 2023-2025 جىلدارى اليۋميني تاقتالارى ءوندىرىسى جوباسىن ىسكە اسىرادى. ونىڭ ينۆەستيتسيا كولەمى – 40 ملرد تەڭگە, 350 جاڭا جۇمىس ورنى اشىلادى.

ەكىنشى, Karlskrona كومپانياسى قۇنى 26 ملرد تەڭگەنى قۇرايتىن گيدراۆليكالىق ناسوستار ءوندىرىسى جوباسىن جۇزەگە اسىرادى. وندا 1 مىڭنان استام جاڭا جۇمىس ورنىن اشۋ جوسپارلانعان.

ءۇشىنشى, وزبەكستاندىق ينۆەستوردىڭ قاتىسۋىمەن Orient Ceramic كومپانياسى قۇنى 13 ملرد تەڭگەگە كەراميكالىق تاقتالار ءوندىرىسى جوباسىن جۇزەگە اسىرۋدى جوسپارلاپ وتىر. 300-دەن استام جاڭا جۇمىس ورنى قۇرىلادى.

ءتورتىنشى, 1 مىڭ ورىندىق كوپبەيىندى ۋنيۆەرسيتەتتىك كلينيكا مەن زاماناۋي ەمحانا جوباسىن ىسكە اسىرۋ كوزدەلگەن. ين­ۆەستيتسيا كولەمى – 120 ملرد تەڭگە.

3 مىڭ­عا جۋىق جۇمىس ورنى قۇرىلاتىن بولادى. قازىرگى تاڭدا جوبالاۋ جۇمىستارى اياق­تالىپ, ساراپتامادان وتۋدە.

بەسىنشى, Asia Trafo كومپانياسىنىڭ قۇنى 7 ملرد تەڭگەنى قۇرايتىن ترانسفورماتور ءوندىرىسى. جوبا اياسىندا ورتالىق ازيادا تەڭدەسى جوق جوعارى كەرنەۋلى رەاكتور­لار شىعارىلادى.

شىمكەنت قالاسىنىڭ اكىمى بيىل وڭ­دەۋ ونەركاسىبى سالاسىندا قۇنى 83 ملرد تەڭگەگە 25 جوبا ىسكە اسىرىلاتىنىن اتاپ ءوتتى. ناتيجەسىندە, 2 مىڭنان استام ادام جۇمىسپەن قامتىلادى.

بۇگىنگى كۇنى قالادا جالپى اۋماعى 743 گەكتاردى قۇرايتىن 4 يندۋستريالىق ايماقتا 185,3 ملرد تەڭگەگە 130 جوبا ىسكە اسىرىلىپ, 8 مىڭعا جۋىق جۇمىس ورنى اشىل­دى. ايماقتاردىڭ تولىمدىلىعى 90%-دان استى.

«قالا ەكونوميكاسىنىڭ قارقىندى دامۋىنا جانە ينۆەستورلار تاراپىنان سۇرانىستىڭ ارتۋىنا بايلانىستى جاڭادان 4 وندىرىستىك الاڭ اشۋ جۇ­مىس­تارى باستالدى», دەدى مۇرات ايتەنوۆ.

ءبىرىنشى, «جۇلدىز» يندۋستريالىق ايماعى. اۋماعى – 306 گەكتار. بۇگىنگى كۇنى ينجەنەرلىك ينفراقۇرىلىمنىڭ قۇرىلىسى جۇرگىزىلۋدە. بۇل ايماقتا 200 ملرد تەڭگەگە 50-دەن استام ءىرى ين­ۆەستيتسيالىق جوبا ىسكە اسىرىلادى. 5 مىڭعا جۋىق ادام جاڭا جۇمىس ورىندارىمەن قامتىلادى. بۇگىنگى تاڭدا, 17 جوباعا جەر تەلىمدەرى بەرىلىپ, ينۆەستورلار جۇمىستارىن باستاپ كەتتى.

ەكىنشى, «بوزارىق» اگرو-يندۋستريالىق ايماعى. اۋماعى – 132 گەكتار. باستى با­عىتى – اۋىل شارۋاشىلىعى ونىمدەرىن تەرەڭدەتىپ وڭدەۋ. ينفراقۇرىلىم قۇرى­لىسى جۇرگىزىلۋدە. ايماقتا 23 ملرد تەڭ­گەگە 21 ينۆەستيتسيالىق جوبا ىسكە اسىرىلاتىن بولادى. بۇگىنگى تاڭدا 7 ملرد تەڭگەگە 6 جوبانى ىسكە اسىرۋعا جەر تەلىم­دەرى ۇسىنىلدى.

ءۇشىنشى, «وڭتۇستىك» ارنايى ەكونو­ميكالىق ايماعىن كەڭەيتۋ. قازىرگى تاڭدا «وڭتۇستىك» ارنايى ەكونوميكالىق اي­ماعىن كەڭەيتۋ بويىنشا قوسىمشا 175 گەكتار جەر ۋچاسكەسى انىقتالدى. بۇل ايماقتا قۇنى 150 ملرد تەڭگەگە 30-دان استام ءىرى جوبانى جۇزەگە اسىرىپ, 3 مىڭ جاڭا جۇمىس ورنىن قۇرۋ جوسپارلانۋدا.

ءتورتىنشى, «ستاندارت» جەكە مەنشىك يندۋستريالىق ايماعى. اۋماعى 119 گەكتاردى قۇرايدى. بۇل ايماقتىڭ ەرەكشەلىگى – ينۆەستور ءوز قاراجاتى ەسەبىنەن 176 مىڭ شارشى مەتر دايىن وندىرىستىك الاڭدارىن سالىپ, شاعىن جانە ورتا كاسىپكەرلىك سۋبەكتىلەرىنە ۇسىنادى. كاسىپكەرلەرگە قارجى ينستيتۋتتارى مەن مەملەكەتتىك باع­دارلامالار ارقىلى قولداۋ كورسەتىلەدى. بۇگىنگى تاڭدا اۋماقتىڭ قۇرىلىس جۇمىس­تارى جۇرگىزىلۋدە.

«شىمكەنت قالاسىنىڭ اكىمدىگى 2025 جىلعا دەيىنگى ينۆەستيتسيا تارتۋ جوس­پارىنا سايكەس جۇمىستار جۇر­گىزۋدە. ءبىزدىڭ جوسپارىمىز بۇگىنگى قازاق­ستان رەسپۋبليكاسىنىڭ ۇلتتىق ەكونو­ميكا مينيسترلىگى ۇسىنعان 2026 جىلعا دەيىنگى ينۆەستيتسيالىق ساياسات تۇجىرىم­دا­ماسىنا سايكەس كەلەدى», دەدى قالا اكىمى.

جيىندى قورىتىندىلاعان پرەمەر-مينيستر ءاليحان سمايىلوۆتىڭ ايتۋىنشا, ينۆەستيتسيالىق ساياساتتىڭ جاڭا تۇجىرىمداماسى مەملەكەت باسشى­سىنىڭ تاپسىرماسىمەن ازىرلەنگەن. قۇجات ەل ەكونوميكاسىنا تارتىلاتىن ينۆەستي­تسيا­لاردىڭ وسۋىنە ايتارلىقتاي ىقپال ەتەدى دەگەن سەنىم بار.

جالپى, قازاقستان ينۆەستيتسيالار ءوسىمىنىڭ پاندەمياعا دەيىنگى دەڭگەيىنە جەتتى. ماسەلەن, بيىلعى 5 ايدا نەگىزگى كاپيتالعا سالىنعان ينۆەستيتسيالار كو­لەمى 2,5%-عا ءوسىپ, 4,1 ترلن تەڭگەنى قۇرا­دى.

اقمولا وبلىسى, شىمكەنت جانە الماتى قالالارى نەگىزگى كاپيتالعا سالىن­عان ينۆەستيتسيالار ءوسىمىنىڭ جوعارى قار­قىنىن كورسەتىپ وتىر. تۇركىستان جانە قاراعاندى وبلىستارىندا بۇل كورسەتكىش ايتارلىقتاي تومەندەپ كەتكەن.

ءا.سمايىلوۆ قازاقستاننىڭ تىكەلەي شەتەلدىك ينۆەستيتسيالار ءۇشىن تارتىمدى ەل ەكەنىن جانە بۇل جاعىنان ورتا­لىق ازيا وڭىرىندە كوش باستاپ تۇرعا­نىن اتاپ ءوتتى. «قازىرگى جاعدايدا ءبىز وسى ۇس­تانىمىمىزدى ودان ءارى نىقتاي ءتۇسىپ, شەتەلدىك ينۆەستيتسيالار ءۇشىن كۇرەستە بەلسەندى قيمىلداۋىمىز كەرەك جانە ينۆەستورلارعا بارىنشا وڭتايلى جاعداي جاساۋىمىز قاجەت. سونداي-اق ەكونوميكانىڭ شيكىزاتتىق ەمەس سەكتورلارىندا ينۆەستيتسيالىق جوبالاردى قارجىلاندىرۋ كوزدەرىن كەڭەيتۋ كەرەك. بۇگىن ۇسىنىلىپ وتىرعان ينۆەستيتسيالىق ساياسات تۇجىرىمداماسى ەكونوميكانى دامىتۋدىڭ جانە حالىقتىڭ ءال-اۋقاتىن ارتتىرۋدىڭ درايۆەرىنە اينالاتىن جاڭا ينۆەستيتسيالىق تسيكلدىڭ باستاۋى بولۋعا ءتيىس», دەدى ۇكىمەت باسشىسى.

تالقىلاۋ قورىتىندىسى بويىنشا ۇكىمەت ەلدىڭ ينۆەستيتسيالىق ساياساتىنىڭ 2026 جىلعا دەيىنگى تۇجىرىمداماسىنىڭ جوباسىن بەكىتتى.

پرەمەر-مينيستر ورتالىق مەملە­كەتتىك ورگاندار مەن اكىمدىك­تەرگە ينۆەس­تيتسيالىق ساياسات تۇجىرىم­دا­ما­سىنداعى ءىس-شارالاردىڭ ساپالى ءارى ۋاقتىلى ورىندالۋىن قامتاماسىز ەتۋدى تاپسىردى.