ەلىمىزدىڭ جۇرەگى – استانا بۇگىندە ءتۇرلى حالىقارالىق شارالاردىڭ باستاماشىسى عانا ەمەس, سونىمەن قاتار ءتۇرلى مادەني قۇندىلىقتارىمىزدى دارىپتەپ ناسيحاتتايتىن ورتالىققا اينالۋدا. بۇعان وڭىرلەردە ونەرگە تەر توگىپ جۇرگەن ازاماتتاردىڭ ءىس-ارەكەتى دالەل دەسەك, سونداي شىعارماشىلىق يەسىنىڭ ءبىرى رەتىندە ەلۋباي ومىرزاقوۆ اتىنداعى قوستاناي وبلىستىق فيلارمونياسىنىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى, كۇيشى-ديريجەر نازىمبەك مولداحمەتوۆتى اتاعان ءجون. جاقىندا كۇيشى ەلوردادا «دۋماندى توبىل» اتتى شىعارماشىلىق كەشىن وتكىزدى.
بۇكىل سانالى عۇمىرىن ونەرگە ارناپ كەلە جاتقان جاننىڭ كەشىن استانا قالاسى فيلارمونياسىنىڭ حالىق اسپاپتار وركەسترى (كوركەمدىك جەتەكشىسى ءارى ديريجەرى قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ) سۇيەمەلدەپ وتىردى. كونتسەرتتىڭ شىمىلدىعىن ا.جايىموۆتىڭ «دۋماندى توبىل» شىعارماسى اشتى. رازدىقتىڭ كۇيى «اڭشىنىڭ زارى» وتە شەبەر ورىندالدى.
اۆتوردىڭ وزىنەن بولەك ونەردەگى زامانداستارى مەن ءىزباسارلارى دا ءوز ونەرلەرىن ورتاعا سالدى. باتىربەك باينازاروۆ ابىزدىڭ كۇيى «تولعاۋدى» قوبىزبەن تەبىرەنتسە, جازيرا قاليەۆا ن.تىلەنديەۆتىڭ «بالاپاندارىم» شىعارماسىن سازسىرنايمەن كەرەمەت ۇلگىدە جەتكىزدى. سونداي-اق, دارىندى انشىلەر جاناتبەك كادىروۆ پەن گۇلبانۋ ابدۋللينا شىرقاعان قاليبەك دەربىسالديننىڭ «قوستاناي» ءانى دە تىڭدارماندى تامسانتپاي قويمادى.
ەرمۇرات ۇسەنوۆتىڭ «شاقشاق جانىبەك» تۋىندىسى وركەستردە ءتىپتى قۇلپىرا تۇسسە, ايتباي مۇزداحانوۆتىڭ «قوس قارلىعاش» كۇيىن ورىنداعان انار مۇزداحانوۆانى دا جيىلعان جۇرت ەرەكشە ىلتيپاتپەن قابىلدادى. سۇلتانبەك مولداحمەتوۆ ورىنداعان شال اقىننىڭ تەرمەسىنە تىڭدارماننىڭ ريزا بولعانى سونشالىق, تەرمەشىدەن تاعى ءبىر تەرمە سۇراپ زالدان جىبەرمەدى. كونتسەرتتى قۇرمانعازىنىڭ «اداي» كۇيى قورىتىندىلادى.
كەش سوڭىندا ءسوز العان ەلۋباي ومىرزاقوۆ اتىنداعى قوستاناي وبلىستىق فيلارمونياسىنىڭ ديرەكتورى الەكساندر ەۆسيۋكوۆ العاشقى كەزەكتە استانا قالاسى فيلارمونياسىنىڭ حالىق اسپاپتار وركەسترىنە ءوزىنىڭ شەكسىز العىسىن ايتا كەلىپ, كيەلى تورعاي توپىراعىنان تۇلەپ ۇشقان نازىمبەك مولداحمەتوۆتىڭ شىعارماشىلىعىنا توقتالدى. سونداي-اق, ول اتالعان شاراعا ۇلى دالا سازىنىڭ سارقىلماس كورىنىسى دەپ باعا بەردى.
ءابدىراحمان قىدىربەك,
«ەگەمەن قازاقستان».
––––––––––––––––––––––
سۋرەتتى تۇسىرگەن
ەرلان وماروۆ.