جۋىقتا بىلعارى قولعاپ كيگەن جاس سپورتشىلار التاي اۋدانىندا وتكەن جەكپە-جەكتە جۇدىرىقتاستى. بالالار جىلىنا وراي وتكەن وبلىستىق تۋرنيرگە اۋداندار مەن قالالاردان جۇزدەن استام سپورتشى كەلدى, دەپ حابارلايدى Egemen.kz.
بۇرىنعىداي ەمەس, قازىر بالالار ءۇشىن ۇيىرمەنىڭ, سپورتتىق سەكتسيالاردىڭ سانداعان ءتۇرى بار. بالانىڭ يكەمىنە قاراي يتەرمەلەپ, باعىت-باعدارىن بەرىپ وتىرساڭىز بولعانى.
ايتا كەتسەك, وبلىستا ءوتىپ جاتقان بۇل جولعى جارىستىڭ ءبىر ەرەكشەلىگى, جەكپە-جەك تۇڭعىش رەت تابيعات اياسىندا, بۇقتىرمانىڭ جاعاسىندا ءوتتى. جاتتىقتىرۋشىلاردىڭ ايتۋىنشا, جارىس كوپشىلىكتىڭ كوڭىلىنەن شىقتى. بالالار دا ۇلكەن دايىندىقپەن كەلگەن.
– جەكپە-جەك بۇقتىرما جاعاسىندا, «ساياحات» دەمالىس بازاسىندا ۇيىمداستىرىلدى. بالالار جۇدىرىقتاسىپ قانا قايتقان جوق, سۋ جاعاسىندا دەمالىپ, سەرگىپ قالدى. اتا-انالار دا ريزا. سايىستى ۇيىمداستىرۋدا قولداۋ كورسەتكەن اۋدان باسشىلىعىنا, كاسىپكەرلەرگە العىس ايتامىن, – دەدى جارىستى ۇيىمداستىرۋشى ءارى التايدىڭ «ارلان» جەكپە-جەك كومانداسىنىڭ جاتتىقتىرۋشىسى داۋرەن شوماتوۆ.
شارشى الاڭعا شىققان بالالاردىڭ باسىم بولىگى جارىس مادەنيەتىن, جارىس ءتارتىبىن قاتاڭ ساقتادى. جەڭىسكە جەتكەندەرى قارسىلاستارىنا سىيلاستىقتارىن ءبىلدىرىپ, قۇشاقتارىنا قىسىپ جاتتى. جەكپە-جەكتە ريددەردەن, سەمەيدەن, ءۇرجاردان, كوكپەكتىدەن, ساماردان, وسكەمەننەن جانە التايدان كەلگەن سپورتشىلار ونەر كورسەتتى. ەڭ باستىسى, ەشكىم جاراقات العان جوق.
– جەكپە-جەك جانىما جاقىن سپورت. توبەلەسۋ ءۇشىن ەمەس, توبەلەسپەۋ ءۇشىن جاتتىعامىن. ويتكەنى جاتتىقتىرۋشىم جاسۇلان بەكبولات ۇلى كۇشتەرىڭدى جارىستا عانا كورسەتىڭدەر دەپ ۇنەمى ايتادى. بۇگىنگى جارىستا جەڭىسكە جەتتىم, – دەيدى وسكەمەندىك «نامىس» كومانداسىنىڭ جاس سپورتشىسى ءاليحان بولات.
ءاليحان بولات 4-سىنىپتا وقىعانىمەن, سوققىسى جويقىن. وسى ۋاقىتقا دەيىنگى قاتىسقان جارىستارىندا قارسىلاس شاق كەلتىرمەگەن. الداعى ۋاقىتتا وتەتىن حالىقارالىق جارىسقا دايىندالىپ ءجۇر. ءيا, جەكپە-جەك ەركەلىكتى, ەرىنشەكتىكتى كوتەرمەيتىن سپورت. سوندىقتان دا سپورتشىلار جاس تا بولسا, ۇنەمى دايىندىقتا جۇرۋلەرى ءتيىس. ەڭبەكتەنسە عانا جەتىستىككە جەتەدى. بۇگىنگى جەڭىسكە جەتكەن سپورتشىلار تاباندى جاتتىعۋدىڭ, بويداعى رۋحتىڭ ارقاسىندا جەڭىس تۇعىرىنان كورىندى.