ۆەدومستۆونىڭ مالىمدەۋىنشە, بۇل فاكت قر قك-ءنىڭ 296-بابى «ەسىرتكى قۇرالدارىمەن, پسيحوتروپتىق زاتتارمەن, ولاردىڭ انالوگتارىمەن ساتۋ ماقساتىنسىز زاڭسىز جۇمىس ىستەۋ» بويىنشا سدتبت-عا ەنگىزىلىپ, قىلمىستىق ءىس قوزعالدى.
«جەدەل ۋاكىلدەر سايرام اۋدانىنا قاراستى رەسپۋبليكالىق «الماتى-تاشكەنت» تاس جولىنىڭ بويىندا ورنالاسقان جانارماي قۇيۋ بەكەتىنىڭ ماڭىندا كۇدىكتى رەتىندە جاياۋ كەتىپ بارا جاتقان جولاۋشىنى ۇستادى», دەدى تۇركىستان وبلىسىنىڭ پد ءباسپاسوز قىزمەتى.
پوليتسەيلەردىڭ حابارلاۋىنشا, كۇدىكتىنىڭ جەكە باسىن ءتىنتۋ كەزىندە قولىنداعى سومكەسىنىڭ ىشىنەن 14 دانا پوليەتيلەن پاكەتكە سالىنعان قوڭىر-جاسىل ءتۇستى ايرىقشا ءيىسى بار ەسىرتكىگە ۇقساس زات تابىلدى. ول ءوز ەركىمەن وزىنە تيەسىلى ءاميانىنان 1 دانا پاكەتكە سالىنعان, سونداي-اق 1 دانا قاعازعا ورالعان ەسىرتكىگە ۇقساس ۇنتاق جانە «ترامادول» جازۋى بار 5 دانا پسيحوتروپتىق ءدارىسىن تاپسىردى.
«زەرتتەۋ قورىتىندىسىنا سايكەس سومكەدەن الىنعان زاتتىڭ سالماعى 1 كەلىگە جۋىق «گاشيش» بولىپ شىقتى. ال ءامياننان الىنعان پاكەتتەگى زات 1,5 گرامم سينتەتيكالىق ەسىرتكى, قاعاز وراماداعى زات 1 گرامم «گەروين» ەكەنى راستالدى», دەپ قوستى پد ءباسپاسوز قىزمەتى.
قازىر سوتقا دەيىنگى تەرگەۋ امالدارى جۇرگىزىلۋدە.
ايانا توعانبەك