پرەمەر-مينيستر ءاليحان سمايىلوۆ الماتىعا جۇمىس ساپارى اياسىندا قالانىڭ IT-كلاستەرىنىڭ, مەديتسينالىق جانە ءبىلىم بەرۋ سالالارىنىڭ دامۋىمەن تانىستى, دەپ حابارلايدى Egemen.kz ۇكىمەتتىڭ رەسمي سايتىنا سىلتەمە جاساپ.
ءاليحان سمايىلوۆ وسى جىلدىڭ مامىر ايىندا ىسكە قوسىلعان MOST IT Hub Almaty يننوۆاتسيالىق كاسىپكەرلىكتى دامىتۋ ورتالىعىنا باردى.
جالپى اۋدانى 5 200 شارشى مەترلىك ورتالىقتا كەڭسەلەر, كوۆوركينگ-كەڭىستىكتەر, يۆەنت جانە بيزنەس-كەزدەسۋلەر وتكىزۋگە ارنالعان ايماقتار ورنالاسقان. سونداي-اق ورتالىق بازاسىندا تەحنولوگيالىق ستارتاپتاردى قولداۋ باعدارلامالارى جۇزەگە اسىرىلادى, ينۆەستورلار مەن ۆەنچۋرلىك قورلار وكىلدەرىنىڭ قاتىسۋىمەن تاقىرىپتىق ءىس-شارالار وتكىزىلەدى.
پرەمەر-مينيستر IT-كلاستەردى دامىتۋ قازاقستاندىقتار ءۇشىن جاڭا ەكونوميكالىق مۇمكىندىكتەر اشاتىنىن اتاپ ءوتتى.
«قالادا جەكەمەنشىك يننوۆاتسيالىق حابتار مەن بيزنەس-ينكۋباتورلار كوبەيىپ كەلەدى, ءىرى IT جانە كرەاتيۆتى كومپانيالار قۇرىلدى. الماتىنى ۇلگى ەتىپ, ەلىمىزدىڭ بارلىق وبلىس ورتالىقتارىندا IT-حابتار ىسكە قوسىلۋى ءتيىس. وڭىرلەردىڭ اكىمدىكتەرى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, وسى باعىتتاعى جۇمىستى كۇشەيتۋى قاجەت», دەدى ءاليحان سمايىلوۆ.
سونىمەن قاتار پرەمەر-مينيستر ەرەسەكتەر مەن بالالارعا امبۋلاتوريالىق-ەمحانالىق كومەك كورسەتەتىن Mediker Hospital International جاڭا كوپ بەيىندى مەديتسينالىق ورتالىعىنىڭ قىزمەتىمەن تانىستى.
ورتالىقتا ستوماتولوگيالىق كابينەت, سپورتتىق مەديتسينا, فيزيوتەراپيا جانە وڭالتۋ ءبولىمى, مرت, كت, رەنتگەن دياگنوستيكا جانە مامموگرافيا كابينەتتەرى, تەلەمەديتسينا كابينەتى, ەكى وپەراتسيالىق زال جانە تاۋلىك بويى جۇمىس ىستەيتىن ستاتسيونار بار.
«قازاقستاندا مەديتسينانىڭ بىرقاتار باعىتى حالىقارالىق دەڭگەيدە تابىستى باسەكەگە تۇسە باستادى. جوعارى تەحنولوگيالىق مەديتسينالىق قىزمەتتەردىڭ قولجەتىمدىلىگى قامتاماسىز ەتىلىپ, دەنساۋلىقتىڭ نەگىزگى كورسەتكىشتەرى جاقسارۋدا. تەلەمەديتسينانىڭ ارقاسىندا ازاماتتار ءوز ەلدى مەكەندەرىنەن شىقپاي-اق جوعارى كاسىبي كومەك الا الادى», دەدى ءاليحان سمايىلوۆ.
پرەمەر-مينيستر دارىگەرلەردى الداعى كاسىبي مەرەكە – مەديتسينا قىزمەتكەرى كۇنىمەن قۇتتىقتادى.
سونداي-اق ۇكىمەت باسشىسى «جاس مامان» جوباسى اياسىندا ءتۇرلى وقۋ-وندىرىستىك شەبەرحانالارمەن جابدىقتالعان الماتى جولاۋشىلار كولىگى جانە تەحنولوگيالار كوللەدجىنە باردى.
بۇل — ماشينا جاساۋشىلار وداعى, Hyundai Center جانە Allur Auto سياقتى سەرىكتەستەرمەن بىرگە قالالىق كولىك ءۇشىن كادرلار دايارلايتىن جالعىز كوللەدج.
«پرەزيدەنتتىڭ تاپسىرماسىمەن ەلىمىزدە كاسىپتىك-تەحنيكالىق ءبىلىم بەرۋدى دامىتۋ بويىنشا جۇيەلى شارالار قابىلدانىپ جاتىر. بۇل كوللەدج – قالانىڭ جەتەكشى وقۋ ورىندارىنىڭ ءبىرى. مۇندا جاستار اۆتوسلەسار, ەلەكترومونتەر, توكار, دانەكەرلەۋشى جانە قازىرگى تاڭدا سۇرانىسى جوعارى باسقا دا ماماندىقتاردى مەڭگەرەدى. قالا اكىمدىگى قالادان تىس جەرلەردەن كەلگەن ستۋدەنتتەردى جاتاقحانامەن قامتاماسىز ەتۋ, سونداي-اق تۇلەكتەردىڭ جۇمىسقا ورنالاسۋىنا جاردەمدەسۋ بويىنشا ناقتى شارالار قابىلداۋى قاجەت», دەدى اليحان سمايىلوۆ.
پرەمەر-مينيستر ستۋدەنتتەردىڭ سبب ستانوكتارىندا توكارلىق, فرەزەرلىك جۇمىستار, اۆتوموبيلدەردى جوندەۋ جانە قىزمەت كورسەتۋ بويىنشا Worldskills قالالىق جانە رەسپۋبليكالىق چەمپيوناتتارىنداعى جەڭىسى كوللەدجدىڭ ءسوزسىز جەتىستىگى ەكەنىن ايتتى.