مەملەكەت باسشىسى ۇلتتىق قۇرىلتايدىڭ باستى مىندەتتەرىن اتادى

ءبىرىنشى. جالپىۇلتتىق بىرلىكتى نىعايتۋ

ء«بىز دەموكراتيا ءداستۇرى جەتىلگەن, مىقتى ازاماتتىق قوعام قۇرامىز. بۇل – ستراتەگيالىق باعىتىمىز. وسى باعداردى بەرىك ۇستانۋىمىز كەرەك. سوڭعى ءۇش جىلدا بۇل سالادا ءبىراز ناتيجەگە جەتتىك. بيلىك پەن حالىق اراسىندا مازمۇندى ديالوگ ورناتتىق. بۇعان ۇلتتىق قوعامدىق سەنىم كەڭەسى زور سەپتىگىن تيگىزگەنىن اتاپ وتكىم كەلەدى. سول ارقىلى بىرقاتار وزىق يدەيالار ۇسىنىلدى.

ميتينگىلەر تۋرالى دەموكراتيالىق زاڭ شىقتى. پارتيالىق سايلاۋ تىزىمىنە ايەلدەر مەن جاستار ءۇشىن وتىز پايىزدىق كۆوتا ەنگىزىلدى. قوعامدىق كەڭەستەردىڭ جۇمىسى جاندانا ءتۇستى. ساياسي جاڭعىرۋ باعدارلاماسى ارقىلى وڭ باستامالار لايىقتى جالعاسىن تابارى ءسوزسىز»

ەكىنشى. رەفورمالاردىڭ ءمان-ماڭىزىن حالىققا ءتۇسىندىرۋ

ەڭ باستىسى, ءبىزدىڭ باعدارىمىزدى حالىقتىڭ باسىم كوپشىلىگى قولداپ وتىر. ازاماتتارىمىز ەلىمىزدە تۇبەگەيلى وزگەرىس بولاتىنىنا سەنەدى. دەگەنمەن, رەفەرەندۋم تابىستى ءوتتى ەكەن دەپ, بوساڭسۋعا بولمايدى. ناعىز جۇمىس ەندى باستالدى.

رەفورمانى جۇزەگە اسىرۋ بارىسىن ەلگە ۇدايى ءتۇسىندىرىپ وتىرۋىمىز كەرەك. قازىردىڭ وزىندە جاڭعىرۋ ۇدەرىسى بىرتىندەپ جالپىۇلتتىق سيپاتقا يە بولا باستادى. شىن مانىندە, جاڭعىرۋدىڭ اسەرىن ءاربىر ازاماتىمىز سەزىنۋى قاجەت. ەلدەگى وزگەرىسكە اركىم ءوز ىسىندەي قاراسا, شىن مانىندە, جاڭارۋ جولىنا تۇسەمىز. مۇنى ەلىمىزدىڭ ءاربىر ازاماتى تەرەڭ تۇسىنگەنى ءجون»

ء«بىز ۇلتتى ۇيىستىراتىن پاراساتتى, تىڭ يدەيالار مەن ۇسىنىستارعا ايرىقشا ءمان بەرۋىمىز قاجەت. بۇل – ۇلتتىق قۇرىلتايدىڭ ەڭ باستى مىندەتى. سوندىقتان, مىناداي باعىتتارعا نازار اۋدارۋ قاجەت دەپ ويلايمىن.

ءۇشىنشى. جاڭا تەحنولوگيالار ارقىلى حالىقتى اۋقىمدى رەفورمالارعا قاتىستىرۋ

قۇرىلتايعا قانشا ادام كىرسە دە, قوعامدى تولىق قامتي المايدى دەگەن پىكىر ايتىلىپ ءجۇر. بىراق, قۇرىلتاي مۇشەلەرىن كوبەيتە بەرسەك, ودان پايدا بولمايدى. بۇدان جۇمىستىڭ بەرەكەسى قاشىپ, ۇيىمداستىرۋ ءىسى قيىنداپ كەتۋى مۇمكىن.

قۇرىلتاي – بەلگىلى ءبىر ادامدار عانا باس قوساتىن جەر ەمەس. ول, شىن مانىندە, جالپىۇلتتىق جيىنعا اينالۋى كەرەك. بۇل – وتە ماڭىزدى مىندەت», دەدى پرەزيدەنت.