حالقى تىعىز ورنالاسقان اۋىلدىڭ دەموگرافيالىق ءوسىمى دە جاقسى. سوندىقتان وقۋشىلار ءۇشىن مەكتەپ ماسەلەسى قاشان دا وزەكتى. ءبىلىم نىسانىنىڭ قوسىمشا عيماراتى ابدەن توزىپ, قابىرعاسىنان جىلۋ كەتسە دە ءالى پايدالانىپ وتىر.
بۇل عيمارات وتكەن عاسىردىڭ 70-جىلدارى جۇمىسشىلارعا ارناپ سالىنعان جاتاقحانا ەدى. بالا سانى ارتقاسىن ەكى مىڭىنشى جىلدارى مەكتەپ كابينەتتەرىنە لايىقتالىپ, جابدىقتاۋ ءىسى جۇرگىزىلگەن. اپاتتى جاعدايدا دەپ تۇرعىندار الاڭداعانمەن بۇل نىساندا 100-دەن استام بالا وقىپ ءجۇر.
«اجارى قاشقان ەسكى نىساننىڭ ەكىنشى قاباتى ادام ومىرىنە قاۋىپ توندىرگەسىن ەسىگىنە ق ۇلىپ قويىلدى. بىراق ءبىرىنشى قاباتىندا باستاۋىش سىنىپ وقۋشىلارى ءالى دە وقىپ جاتىر», دەيدى تۇرعىندار.
شاتىرىنان سۋ كەتىپ, قابىرعاسى قاقىراپ تۇرعاندىقتان اتا-انانىڭ كوڭىلىنە الاڭ كىردى.
اۋداندىق ادامي الەۋەتتى دامىتۋ ءبولىمىنىڭ وكىلدەرى ەسكى نىساننىڭ كۇردەلى جوندەۋ جۇمىستارىنا قارجى قارالعانىن كۇتىپ وتىرمىز دەيدى. تۇرعىنداردىڭ تالابى ەسكەرىلىپ, ەسكى عيماراتتا بالا وقىتۋ توقتاتىلىپتى.
«الدىندا سىيماعان كەزدە وقىپ جاتقان. قازىر ەندى كۇردەلى جوندەۋدەن وتكىزەمىز دەپ جوبالاۋ-سمەتالىق قۇجاتتارىن دايىندادىق. سمەتالىق قۇجاتقا وبلىستان قارجى سۇراتتىق. قارجى بەرىلگەن جاعدايدا كەلەسى جىلى كۇردەلى جوندەۋدەن وتەدى. سودان كەيىن پايدالاناتىن بولامىز», دەيدى كەلەس اۋداندىق ادامي الەۋەتتى دامىتۋ ءبولىمىنىڭ باسشىسى باقتيار ابديەۆ.
ءبولىم باسشىسىنىڭ سوزىنشە جاڭا مەكتەپتىڭ قۇرىلىسى تەك كورشى اۋىلعا جوسپارلانعان.ىرگەسى قۇيىلىپ, قۇرىلىسى اياقتالسا قوس اۋىلدىڭ وقۋشى سىيىمدىلىعى شەشىمىن تابادى دەپ وتىر. ال وقۋشىلار وعان دەيىن ءۇش ءجۇز ورىندىق مەكتەپتە ءۇش اۋىسىممەن وقۋىنا تۋرا كەلەدى.