ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا مەديتسينالىق جانە فارماتسەۆتيكالىق ونەركاسىپتى دامىتۋ ماسەلەلەرى قارالدى, دەپ حابارلايدى Egemen.kz primeminister.kz-كە سىلتەمە جاساپ.
بۇل تاقىرىپتا بايانداما جاساعان دەنساۋلىق ساقتاۋ ءمينيسترى اجار عينيات فارماتسەۆتيكا سالاسىندا ءوندىرىس كولەمىنىڭ وسكەنىن اتاپ ءوتتى. 2021 جىلى فارماتسەۆتيكا ونەركاسىبى وڭ سەرپىن كورسەتتى. بۇل ورايدا فارماتسەۆتيكالىق ءونىمنىڭ كولەمى الدىڭعى جىلمەن سالىستىرعاندا 123,9%-دى قۇرايدى.
دەنساۋلىق ساقتاۋ مينيسترلىگى باسشىسىنىڭ ايتۋىنشا, ءوسىم «حيمفارم» اق, «نوبەل افف» اق, «ابدي يبراگيم گلوبالفارم» جشس, «كەلۋن-كازفارم» جشس وندىرىستىك الاڭدارىندا دارىلىك زاتتار ءوندىرىسى كولەمىنىڭ ارۋتىمەن بايلانىستى بولدى.
ءوز كەزەگىندە ءاليحان سمايىلوۆ مەملەكەت باسشىسى 2025 جىلعا دەيىن فارماتسەۆتيكا نارىعىنداعى وتاندىق ءوندىرىستىڭ ۇلەسىن 50%-عا دەيىن جەتكىزۋ مىندەتىن العا قويعانىن اتاپ ءوتتى.
پرەمەر-مينيستر بىرىڭعاي فارماتسەۆتيكالىق ديستريبۋتسيا جۇيەسى ەنگىزىلگەننەن بەرى قازاقستاندىقتاردى دارىمەن قامتاماسىز ەتۋگە, ەلىمىزدىڭ فارماتسەۆتيكا سالاسىنىڭ تۇراقتىلىعى مەن باسەكەگە قابىلەتتىلىگىن ارتتىرۋعا باعىتتالعان جوبالار ءساتتى ىسكە اسىرىلىپ جاتقانىن ايتتى.
ۇكىمەت باسشىسىنىڭ پىكىرىنشە, ۇزاق مەرزىمدى شارت جاساسۋ ارقىلى كورسەتىلىپ وتىرعان مەملەكەتتىك قولداۋ ىشكى نارىقتى قامتاماسىز ەتۋمەن قاتار, وتاندىق وندىرۋشىلەردى ەكسپورتقا شىعۋعا دا ىنتالاندىرۋى ءتيىس.
قازاقستاندىق ءونىمنىڭ جاھاندىق نارىقتارعا شىعۋىنا جاردەمدەسۋ ماقساتىندا جاۋاپتى مەملەكەتتىك ورگاندار رەسپۋبليكاعا Big Pharma سياقتى الەمدىك فارماتسەۆتيكالىق وندىرۋشىلەردى تارتۋ ماسەلەسىن پىسىقتاۋى قاجەت.
«وتاندىق وندىرۋشىلەر وزىق تەحنولوگيالاردى الىپ كەلىپ, بىرەگەي, يننوۆاتسيالىق پرەپاراتتاردى وزىمىزدە شىعارۋ ءۇشىن ءونىمنىڭ ساپاسىنا باسا ءمان بەرۋى قاجەت. قازاقستان ءوز ازاماتتارىن وزىمىزدە شىعاتىن ءدارى-دارمەكپەن قامتاماسىز ەتۋى ءتيىس», - دەدى ءاليحان سمايىلوۆ.
بۇل ورايدا دايىن ونىمدەرمەن قاتار, فارماتسەۆتيكالىق كومپونەنتتەر مەن سۋبستانتسيالاردى جاساپ شىعارۋ قاجەت. وتاندىق وندىرۋشىلەر ءۇشىن فارماتسەۆتيكالىق نارىقتىڭ بۇل سالاسىنىڭ كەلەشەگى بار.
اتالعان شارالاردىڭ بارلىعى وزەكتەندىرىلگەن فارماتسەۆتيكا جانە مەديتسينا ونەركاسىبىن دامىتۋدىڭ كەشەندى جوسپارىندا كورىنىس تابۋى ءتيىس.
پرەمەر-مينيستر وزىمىزدە شىعارىلاتىن دارىلەر مەن مەديتسينالىق بۇيىمداردىڭ ۇلەسىن ارتتىرۋ ەلىمىزدىڭ دارىلىك قاۋىپسىزدىگىن قامتاماسىز ەتۋدىڭ كەپىلى ەكەنىن اتاپ ءوتتى.
وسىعان بايلانىستى دەنساۋلىق ساقتاۋ مينيسترلىگىنە مىناداي تاپسىرمالار بەرىلدى:
- بىرىڭعاي ديستريبيۋتورمەن بىرلەسىپ, قازاقستاندا دارىلىك زاتتار ءوندىرىسىن تولىق لوكاليزاتسيالاۋ, ولاردىڭ نومەنكلاتۋراسىن كەڭەيتۋ بولىگىندە ۇزاق مەرزىمدى جەتكىزۋ شارتتارىن بەكىتۋ كريتەريلەرىن جەتىلدىرۋدى پىسىقتاۋ;
- قازاقستاندا ءوندىرىستى جولعا قويۋ ءۇشىن Big Pharma-نىڭ ىشىنەن ءىرى ترانسۇلتتىق كومپانيالاردى تارتۋ جۇمىستارىن جانداندىرۋ;
- وزەكتەندىرىلگەن فارماتسەۆتيكا جانە مەديتسينا ونەركاسىبىن دامىتۋدىڭ 2025 جىلعا دەيىنگى كەشەندى جوسپارىنىڭ جوباسىن ۇكىمەت قاراۋىنا ەنگىزۋ.
ءسوز سوڭىندا ءاليحان سمايىلوۆ دەنساۋلىق ساقتاۋ سالاسىنىڭ بارلىق قىزمەتكەرلەرىن الداعى كاسىبي مەرەكە – مەديتسينا قىزمەتكەرى كۇنىمەن قۇتتىقتادى.