مەملەكەت باسشىسى قاسىم-جومارت توقاەۆ «قازاقستان حالقىنا» قورىنىڭ توراعاسى بولات جامىشەۆتى قابىلدادى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
پرەزيدەنتكە قوردىڭ ازاماتتارعا كورسەتكەن كومەگى بويىنشا ەسەبى, سونداي-اق قايىرىمدىلىق قىزمەتتى ۇيىمداستىرۋ جولدارى جونىندە اقپارات بەرىلدى.
بولات جامىشەۆتىڭ ايتۋىنشا, قازىر قور 10 قايىرىمدىلىق باعدارلاما مەن جوبانى جۇزەگە اسىرىپ جاتىر. اتاپ ايتقاندا, ولاردىڭ سەگىزى مەديتسينالىق كومەك كورسەتۋگە, بىرەۋى اۋىل بالالارى ءۇشىن سپورت سالاسىنداعى الەۋمەتتىك جاعدايدى جاقسارتۋعا باعىتتالسا, تاعى ءبىرى اۋىلدىق جەرلەردەن شىققان تالاپكەرلەر مەن از قامتىلعان وتباسىلاردىڭ ستۋدەنت بالالارىنا ءبىلىم گرانتتارىن بەرۋدى قاراستىرادى.
قاسىم-جومارت توقاەۆ قوردىڭ ماقساتتى باعىتتارىن انىقتاۋعا قوعام مەن قوعامدىق ينستيتۋتتاردى بەلسەندى تۇردە تارتۋ قاجەت ەكەنىنە باسا ءمان بەردى.
بولات جامىشەۆتىڭ ايتۋىنشا, قور جاڭادان تولىقتىرىلعان تۇجىرىمدامانى جانە قايىرىمدىلىق باعىتىنداعى باعدارلامالار مەن جوبالار ازىرلەۋدى قولعا الدى.
قور توراعاسىنىڭ ايتۋىنشا, بارلىق اتقارىلىپ جاتقان جۇمىستار تۋرالى تولىق اقپارات قوعام نازارىنا ۇسىنىلادى.