ۇلىتاۋدان التايعا جەتتى...

جەتپىستىڭ جەلكەسىندەگى اقساقال قىزىلوردا, تۇر­كىستان, شىمكەنت, تاراز, الماتى, تالدىقورعان قالا­لارىن باسىپ ءوتىپ, 3 000 شاقىرىمدى ارتقا تاستاعان ەكەن. الدا ءالى التايدان اقتاۋعا دەيىنگى 5 000 شاقىرىم جا­تىر. شاپسا, تۇلپاردىڭ تۇياعى توزاتىن, ۇشسا, سۇڭ­قاردىڭ قاناتى تالاتىن – قازاق دالاسىن جاياۋ-جالپى باسىپ ءوتۋ وڭاي ەمەس. ونىڭ ۇستىنە سۇيرەگەن قول ارباسى بار. جاياۋعا اربانى قويىپ, قولساعاتتىڭ ءوزى جۇك. سونىڭ وزىندە, كۇنىنە قىرىق كيلومەتردى باعىندىرىپ جىبەرەدى ەكەن. كۇننىڭ جارىعىندا ەلدى مەكەنگە ىلىنسە, ءىلىندى, ايتپەسە, دالادا شاتىرىن تىگىپ, قونا كەتەدى. اقساقال ءۇشىن جەتى قاراڭعىدا ايدالادا قونىپ جاتۋ ەمەس, جول بويىنداعى جوسىلعان كولىكتەر قاۋىپتى.

– قيىندىقتار كەزدەسسە دە, مويىماي العا باسىپ كەلەمىن. ەڭ قورقىنىشتىسى, جانىڭنان گۋ ەتىپ, وتە شى­عاتىن جۇك كولىكتەرى ۇشىرىپ كەتە جازدايدى. ونى قويشى, باستىسى, بارعان جەرىمدە حالقىم قۇشاق جايا قارسى الىپ, قوناقجايلىق تانىتىپ جاتىر, – دەيدى سار­سەنباي وسپان ۇلى.

ءيا, جاياۋلاپ كەلە جاتقان اربالى اقساقالدى كورگەن جۇرگىزۋشىلەر سىيلاستىق تانىتىپ, اقىرىنداۋ كەرەك تە شىعار... قارا جولدىڭ بويى قالاي دەگەنمەن, قاۋىپتى. قيىندىق دەمەكشى, اقساقالعا ۇلىتاۋدان قىزىلورداعا, تالدىقورعاننان وسكەمەنگە دەيىنگى جول وڭاي سوقپاعان كورىنەدى. ويدىم شۇڭقىر, شاڭ-توزاڭ دەيدى. جوندەۋى ساعىزداي سوزىلعان وسكەمەن – تالدىقورعان تاس جولى اربانى قويىپ, اياقكيىمدى توزدىرادى ەكەن. تەمىر سىنىپ, ەتىك توزىپ جاتقاندا, ادام جانى نەتكەن ءسىرى دەيسىڭ. ءتىل-كوز تاسقا. قارياعا قۇداي قۋات بەرىپ, مەجەلى جەرىنە جەتسە ەكەن دەپ تىلەيمىز. سوڭعى نۇكتەسى – اقتاۋ. وعان سار­سەنباي وسپان ۇلى بيىلدىڭ قازان ايىندا جەتەمىن دەپ جوسپارلاپ وتىر.

وسكەمەنگە ءبىر كۇن ايالداعان اقساقال ولكەتانۋ مۇراجايىندا بولىپ, شىعىستىڭ تاريحىمەن, كورىكتى جەرلەرىمەن تانىستى. « ۇلىتاۋعا باردىڭ با؟» اتتى ساپاردى اياقتاعان سوڭ اقساقالدىڭ ارمانى – مەككەگە جاياۋ بارۋ. ءيا, سارسەنباي قوتىراشوۆتىڭ قايتپاس قايسارلىعىنا قاراساق, ەرتەڭ-اق قاعبانىڭ قاقپاسىنان تابىلاتىن سياقتى.  

شىعىس قازاقستان وبلىسى