وسكەمەندەگى ۆىسوكوۆولتنايا كوشەسىندەگى ۇيلەردىڭ بىرىنەن ءورت شىعىپ, جالىن لەزدە ءۇيدىڭ ءىشىن شارپىپ ۇلگەرگەن. ءورتتى كورشى جەردە تۇراتىن سەرجانت ريزابەك قاناپيانوۆ بايقاپ قالىپ, بىردەن قۇتقارۋعا كىرىسكەن, دەپ حابارلايدى Egemen.kz «شىعىس» وڭىرلىك قولباسشىلىعىنىڭ ءباسپاسوز قىزمەتىنە سىلتەمە جاساپ.
«ول ەش ويلانباستان وقيعا ورنىنا جەتىپ, ءوزىنىڭ تۋىسى ماناربەك اۋعانباەۆپەن بىرگە دەرەۋ ءتىلسىز جاۋدىڭ بەتىن قايتارۋعا كىرىسەدى. كەنەت ءۇي ىشىنەن كومەك سۇراپ ايقايلاعان داۋىستى ەستىگەن ريزابەك جالىن شارپىعان ۇيگە كىرىپ, ديۆاننان تۇرۋعا شاماسى جەتپەي جاتقان جاسى 65 شاماسىنداعى ەر ادامدى كورەدى. ولار ەسىككە قاراي بەتتەگەندە ماناربەك كومەككە كەلىپ, ەر ازاماتتى سىرتقا امان-ەسەن الىپ شىققان», دەلىنگەن مالىمەتتە.
بەلگىلى بولعانداي, ورتتەن ۋلانعان ءۇي يەسى دەرەۋ اۋرۋحاناعا جەتكىزىلگەن. ال ءورت سوندىرۋشىلەر جالىندى تولىعىمەن ءسوندىرىپ ۇلگەرگەن.
ريزابەك قاناپيانوۆ – ۇلتتىق ۇلاننىڭ «شىعىس» وڭىرلىك قولباسشىلىعىنا قاراستى 3477 اسكەري ءبولىمىنىڭ سەرجانتى, ال ماناربەك اۋعانباەۆ – №46 قالالىق مەكتەپتىڭ العاشقى اسكەري دايىندىق ءپانىنىڭ جەتەكشىسى.