ءبىلىم جانە عىلىم ءمينيسترى اسحات ايماعامبەتوۆ مينيسترلىكتى ەكى ۆەدومستۆوعا ءبولۋ تۋرالى ۇسىنىسقا قاتىستى پىكىر ءبىلدىردى, دەپ حابارلايدى Egemen.kz.
«قازىر بۇل شەشىمدى وتە ءتيىمدى جۇزەگە اسىرۋ مىندەتى تۇر, ويتكەنى ءبىلىم مەن عىلىم جۇيەسىنىڭ تيىمدىلىگى ەڭ باستى دۇنيە. ءبىز قاجەتتى جۇمىستاردى اتقارامىز», دەدى مينيستر.
ونىڭ ايتۋىنشا, مينيسترلىكتى ءبولۋ تۋرالى شەشىم قازىردىڭ وزىندە قابىلدانعان.
«شەشىمدى ءبارىڭىز ەستىدىڭىزدەر. شەشىم بار, ايتىلدى, ءتيىستى تۇردە قابىلداندى. ەندى وسى شەشىمنىڭ ورىندالۋىن ويلاستىرۋ كەرەك. ءبىلىم بەرۋ جۇيەسى وسىدان پايدا كورۋى كەرەك. سوندىقتان قازىر جۇمىس ىستەيمىز جانە جۇمىس ىستەپ جاتىرمىز.
ءتيىستى شەشىمدى كىم قابىلدايتىنىن ناقتى رەتتەيتىن زاڭناما بار. بۇل رەتتە ۇكىمەت دەڭگەيىندە جانە ەل باسشىلىعى دەڭگەيىندە مينيسترلىكتەردى قۇرۋدىڭ قۇرىلىمى, ناقتى جوباسى تۋرالى شەشىم قابىلدانادى. سوندىقتان ءتيىستى دەڭگەيدە شەشىم قابىلدانىپ, مۇنىڭ ءبارى ودان ءارى جۇرتشىلىق نازارىنا جەتكىزىلەدى دەپ ويلايمىن», دەدى ا.ايماعامبەتوۆ.
ايتا كەتەيىك, پرەزيدەنت 1 ماۋسىم كۇنى الماتىداعى ۇلتتىق عىلىم اكادەمياسىنىڭ 75 جىلدىعىنا ارنالعان سەسسيادا ءبىلىم جانە عىلىم مينيسترلىگىن ەكى ۆەدومستۆوعا ءبولۋدى ۇسىنعان بولاتىن.