پرەمەر-ءمينيستردىڭ ورىنباسارى ەرالى توعجانوۆ اسكەري بورىشىن وتەۋشىلەردىڭ اراسىندا ءولىم جاعدايى جيىلەپ كەتۋىنە بايلانىستى پىكىر ءبىلدىردى, دەپ حابارلايدى Egemen.kz.
«بۇل ماسەلە بويىنشا مەملەكەت باسشىسىنىڭ تۇتاستاي توزىمسىزدىك تانىتۋ كەرەكتىگى تۋرالى تاپسىرماسى بار ەكەنىن كورىپ وتىرسىزدار. بۇكىل مەملەكەتتىك ورگاندار, سونىڭ ىشىندە قورعانىس مينيسترلىگى ول ءۇشىن قاجەتتى شارالاردىڭ ءبارىن قابىلدايدى دەپ ويلايمىن. سىزبەن كەلىسەمىن, ولىممەن اياقتالعان جاعدايلار بار. مۇنداي ساتتەر تىڭعىلىقتى زەرتتەلىپ, ءتيىستى باعا بەرىلۋى كەرەك», دەدى ۆيتسە-پرەمەر.
ونىڭ پايىمىنشا, قازاقستان ارمياسىنىڭ كەلىسىمشارتپەن قىزمەت ىستەيتىن ساربازداردىڭ سانىن كوبەيتۋگە الەۋەتى جەتەدى.
«ورتاشا الساق, جىل سايىن ءبىز 35 مىڭ ادامدى اسكەري قىزمەتكە جىبەرەمىز. بۇل مەنىڭشە كەلىسىمشارت بويىنشا اسكەري قىزمەتكە تارتۋ ماسەلەسىن جوققا شىعارمايدى دەپ ويلايمىز. ەگەر قازاقستان ارمياسى كەلىسىمشارت بويىنشا اسكەري قىزمەتكە تارتىلعانداردىڭ سانىن كوتەرمەكشى بولسا, بۇل باعىتتا ءوزىن قامتاماسىز ەتە الادى. ۆەدومستۆو قازىردىڭ وزىندە ءتيىستى شەشىم قابىلداپ جاتىر. اسكەرگە شۇعىل شاقىرۋ جۇيەسىنەن تولىقتاي باس تارتۋ دۇرىس ەمەس دەپ ەسەپتەيمىن. جاستار اسكەري قىزمەتتە بولۋى كەرەك. ال مەملەكەتتىك ورگانداردىڭ وعان مۇددەلى بولۋى باسقا ماسەلە. ءبىرىنشى كەزەكتە قورعانىس مينيسترلىگى اسكەري بورىشىن وتەۋشىلەردىڭ قاجەتتى قاۋىپسىزدىگىن قامتاماسىز ەتۋى قاجەت», دەدى ەرالى توعجانوۆ.
ەسكە سالا كەتەيىك, 4 ماۋسىم كۇنى ماڭعىستاۋ وبلىسىندا شەكارا قىزمەتىندە اسكەري بورىشىن وتەپ جۇرگەن سارباز ءوز-وزىنە قول سالعانى حابارلانعان بولاتىن.