ماسكەۋدە دۇركىرەپ وتكەن «نانو-وپەرا» V حالىقارالىق جاس وپەرا رەجيسسەرلەرى بايقاۋىنان «استانا وپەرا» تەاترىنىڭ رەجيسسەرى ەرەنباق تويكەنوۆ جۇلدەمەن ورالدى.
ءدۇبىرلى دوداعا 200-دەن استام جاس رەجيسسەر قاتىسىپ, سولاردىڭ اراسىنان 10 ۇمىتكەر ىرىكتەلىپ الىندى. بايقاۋ ءۇش كەزەڭنەن تۇردى: قاتىسۋشىلار بىرىنشىسىندە اريامەن, ەكىنشىسىندە دۋەتپەن, ۇشىنشىسىندە كوپشىلىك كورىنىسپەن جۇمىس ىستەدى. ىرىكتەۋ كەزەڭىنەن ءوتۋ ءۇشىن ەرەنباق تويكەنوۆ دج.ءپۋچچينيدىڭ «تۋراندوت» وپەرالىق سپەكتاكلىنىڭ مازمۇنىن ءوز پايىمىمەن پاراساتتى جەتكىزە ءبىلدى. ال ءبىرىنشى كەزەڭدە ول دج.ءروسسينيدىڭ «سەۆيلدىك شاشتاراز» وپەراسىنان فيگارونىڭ كاۆاتيناسىن, ەكىنشى كەزەڭدە ج.بيزەنىڭ «كارمەن» وپەراسىنان حوزە مەن ەسكاميلونىڭ دۋەتىن, ءۇشىنشى كەزەڭدە كورنەكتى فرانتسۋز كومپوزيتورىنىڭ حور مەن مۋزىكالىق شىعارماسىن ۇسىندى. سونداي-اق ونەر سايىسى باستان-اياق «روسسيا-ك» تەلەارناسىندا تىكەلەي ەفيردەن كورسەتىلدى.
ايتا كەتەيىك, ماسكەۋلىك «نانو-وپەرا» بايقاۋىنا كورنەكتى رەجيسسەر دميتري بەرتمان توراعالىق ەتسە, ونىڭ قۇرامىنا حالىقارالىق وپەرا تەاترلارىنىڭ كوركەمدىك جەتەكشىلەرى, ديرەكتورلارى مەن رەجيسسەرلەرى, تانىمال تەاتر مەنەدجەرلەرى مەن پروديۋسەرلەرى ەندى.
سونىمەن سوڭعى مارەدە باق سىناعان ون ۇمىتكەردىڭ اراسىنان ءبىرىنشى ورىندى رەسەيلىك ماريا فوميچەۆا جەڭىپ السا, ەكىنشى ورىن ءبىزدىڭ جەرلەسىمىزگە بۇيىردى. ءۇشىنشى ورىندى دا رەسەيلىك يرينا گاۋداسينسكايا يەلەندى. سونىمەن قاتار ەرەنباق تويكەنوۆكە مەديا تورەشىلەردىڭ قۇرامىنداعى ءىرى باسىلىمداردىڭ باسشىلارى تاعايىنداعان «كورەرمەن كوزايىمى» سىيلىعى تابىس ەتىلدى. بايقاۋ سوڭى گالا-كونتسەرتكە ۇلاسىپ, وندا جۇلدەگەرلەردىڭ ۇزدىك دەگەن جۇمىستارى كورەرمەنگە تارتۋ ەتىلدى.
ايتپاقشى, جەرلەسىمىز جاقىندا Digital Opera فەستيۆالىنىڭ سوڭعى دوداسىنا قاتىسادى. وعان شاقىرتۋدى فەستيۆال پروديۋسەرى ءارى باس ديرەكتورى نادەجدا ابراموۆا تاپسىردى.