جاڭا ءداۋىردىڭ بەتبۇرىستى كەزەڭى

كەشەگى رەفەرەندۋم ەڭ الدىمەن, اتا زاڭىمىزعا وزگەرىستەر ەنگىزۋدى كوزدەدى. ەلىمىز جاڭا ءداۋىردىڭ بەتبۇرىستى كەزەڭىنە قادام باستى, ايتۋلى كۇنى ءبىرتۇتاس قازاقستان حالقى ءوز بولاشاعى ءۇشىن داۋىس بەردى. وسى كۇنى قازاقستان حالقىنىڭ تولاعاي تۇتاستىعى, پرەزيدەنتكە دەگەن سەنىمى, مىزعىماس بىرلىگى تاعى دا ايقىن كورىندى.

الدا بولاتىن كونس­تي­تۋتسيالىق رەفورمالار – مەم­لەكەتىمىز ءۇشىن, ونداعى ءاربىر ازاماتتىڭ بولاشاعى ءۇشىن اسا ماڭىزدى. كەز كەلگەن دامىعان ەلدە ادام قۇقىعى ءبىرىنشى ورىندا تۇراتىنى راس. ء«ار قازاق – مەنىڭ جالعىزىم» دەگەن قاناتتى ءسوزدىڭ ماعىناسى تەرەڭدە جاتسا كەرەك. قوعامنىڭ ىرگەسىن بەرىك قالايتىن ءاربىر قازاقستاندىق ءوز قۇقىعى­نىڭ ناقتى قورعالاتىنىنا سەنىمدى بولمايىنشا, جارقىن بولاشاققا قارىشتاپ قادام باسا الماسىمىز انىق. بۇدان بىلاي, ادام قۇقىقتارى جونىن­دەگى ۋاكىلدىڭ مارتەبەسى ارتادى, مۇنداي دارەجەدەگى ۋاكىل ازا­مات­تاردىڭ قۇقىقتارى تولىق قورعالاتىنىنا كەپىلدىك بەرەدى.

ەندىگى جەردە اكىمدەردىڭ دەربەستىگىن ارتتىرۋ دا كوزدەلىپ وتىر, حالىق اكىمدەردى دە وزدەرى سايلايتىن بولدى. بۇل ەندى تۇراقتى ۇردىسكە اينا­لادى. قازىردىڭ وزىندە وبلىس, اۋدان, قالا اكىمدەرىن سايلاۋ­عا دا­يىن­دىق جۇرگىزىلىپ جاتىر. «ەلىمىزدە جوعارى ساياسي جاۋاپكەرشىلىك مادەنيەتى ور­نى­عۋى قاجەت. بۇكىلحالىق­تىق رە­فەرەندۋم جاڭا ادىلەتتى قازاق­ستاندى قۇرۋدىڭ ماڭىزدى باستاماسى بولماق» دەگەن مەملەكەت باسشىسىنىڭ سوزىنەن قازاقستاندى العا دامىتۋدا تۇبەگەيلى پايىمى بار, اسا تاجىريبەلى كوشباسشىنىڭ تاباندى كوزقاراسى تايعا تاڭبا باسقانداي كورىنەدى. پرەزي­دەنت قاسىم-جومارت توقاەۆ ستراتەگيالىق ويشىل رەتىندە ۇلكەن رەفورمانىڭ باستاماسىن ۇسىنىپ, ونى حالقىمىز ءبىر اۋىزدان قولدادى. بيىلعى جىلدىڭ 12 ماۋسىمىندا قاسىم-جومارت كەمەل ۇلىنىڭ مەملەكەت باسشىلىعىنا كەلگەنىنە ءۇش جىل تولادى. رەفەرەندۋم سول ايتۋلى كۇننىڭ قارساڭىنا تۇسپا-تۇس كەلىپ وتىر. وسى ۋاقىت ىشىندە ول كىسىنىڭ ەل ەگەمەندىگىن قۇرمەت تۇتاتىنى, جوعارى باعالايتىنى جانە ەل مۇددەسىن جانىن سالىپ قورعايتىنى كورىندى. قاڭتار وقيعاسى كەزىندە ەل تاۋەلسىزدىگىنە قانشالىقتى قاۋىپ تونگەنىنە ءبارىمىز كۋا بولدىق, سول كەزدە مەملەكەت مۇددەسى ءۇشىن ناقتى شەشىم قابىلداي بىلگەن ەل باسشىسىنىڭ تاباندىلىعى مەن قايسارلىعىن قازاقستاندىقتار ۇمىتقان جوق.

ساياساتتا شالت قيمىلعا جول بەرىلمەيدى, اسىرەسە قازىرگىدەي كۇردەلى گەوساياسي جاعدايلاردا ءار قادامىمىزدى اقىلمەن, بايىپپەن قاراۋىمىز كەرەك. باسقاشا بولعاندا, ونىڭ ارتى وراسان زور قاتەرگە, زارداپقا اكەلىپ سوعۋى مۇمكىن.

كەشەگى رەفەرەندۋم ساياسي ترانسفورماتسياسىنىڭ باس­تاماسى عانا. بۇدان بىلاي سۋپەرپرەزيدەنتتىك باسقارۋ ۇلگىسى كەلمەسكە كەتىپ, ىقپالدى پارلامەنتى مەن ەسەپ بەرەتىن ۇكىمەتى بار پرەزيدەنتتىك رەسپۋبليكا ورناماق.

ەل باسشىسى قوعامدا ورىن العان ەسكىرگەن ستەرەوتيپتەر مەن جالعان عىلىمي يدەيالارعا بايلانىستى قۇبىلىستارعا سىن ايتىپ, دامۋدىڭ شىنايى زاڭدىلىقتارىن عىلىمي تۇرعىدان تۇسىنەتىن قوعامدا تەرىس كوزقاراستارعا ورىن جوق ەكەنىن ايتقان بولاتىن. «ەلىمىزدە ءبىلىم مەن دامۋ ۇستەمدىك ەتۋى كەرەك. جاڭا يدەيالاردى تۋدىراتىن ەركىندىك پەن شىعارماشىلىق اتموسفەراسى – قازىرگى الەمدەگى نەگىزگى تابىستى فاكتوردىڭ ءبىرى بولۋى ءتيىس», دەگەن مەملەكەت باسشىسىنىڭ ءسوزىن ءار قازاقستان ازاماتى قولدايتىنىنا سەنەمىن.

ءسات توقپاقباەۆ,

زاپاستاعى گەنەرال-پولكوۆنيك