بۇگىن قوستاناي وبلىسىنداعى سايلاۋ ۋچاسكەلەرىنىڭ ءبارى تاڭعى ساعات 7.00-دەن باستاپ جۇمىسقا كىرىسىپ كەتتى. ايماقتا وبلىستىق, قالالىق جانە اۋداندىق رەفەرەندۋم كوميسسيالارىنا قارايتىن 735 سايلاۋ ۋچاسكەسى جۇمىس ىستەپ جاتىر. بۇل كوميسسيالاردىڭ قۇرامىندا 4,5 مىڭ ادام بار. وبلىستىق رەفەرەندۋم كوميسسياسى توراعاسىنىڭ ورىنباسارى ءاسيا دۋانباەۆانىڭ ايتۋىنشا, بۇگىن وبلىستىڭ شامامەن 550 مىڭنان استام تۇرعىنى ءوز تاڭداۋىن جاساۋى كەرەك, دەپ حابارلايدى Egemen.kz
قوستاناي قالاسىنداعى №10 ورتا مەكتەپتە ورنالاسقان سايلاۋ ۋچاسكەسىنە العاشقىلاردىڭ ءبىرى بولىپ جۇماعاليەۆتار وتباسى كەلىپ داۋىس بەردى. سايلاۋ ۋچاسكەسىنىڭ ەسىگى اشىلىپ, ەلىمىزدىڭ ءانۇرانى شىرقالىپ بىتكەن سوڭ, ەرلى-زايىپتى زەينەتكەرلەر بىردەن داۋىس بەرۋ جاشىگىنە قاراي بەتتەدى.
ء«بىز بالا-شاعامىزدىڭ, نەمەرەلەرىمىزدىڭ جارقىن بولاشاعى ءۇشىن داۋىس بەردىك. ءبىز پرەزيدەنتتى قۇرمەتتەيمىز, وتە بىلىكتى باسشى جانە ەرتەڭگى كۇن ەلىمىزدى جاقسى وزگەرىستەر كۇتىپ تۇر دەپ سەنەمىز. ءبىز وسى ۋاقىتقا دەيىن بىردە-ءبىر ساياسي ناۋقاننان تىس قالعان جوقپىز», دەيدى جۇكەن جۇماعاليەۆ.
داۋىس بەرۋگە ءبىرىنشى بولىپ كەلگەن زەينەتكەرلەرگە شاعىن كادەسىي جاسالدى.
اتالمىش سايلاۋ ۋچاسكەسىندە 2 662 تۇرعىن داۋىس بەرۋشى تىركەلگەن.