پارلامەنت ءماجىلىسىنىڭ توراعاسى ەرلان قوشانوۆ ەلورداداعى N110 رەفەرەندۋم ۋچاسكەسىندە داۋىس بەردى, دەپ حابارلايدى Egemen.kz.
پالاتا سپيكەرى ەرلان قوشانوۆ تا ەلوردا تۇرعىندارىمەن بىرگە كونستيتۋتسيالىق رەفورماعا بايلانىستى ءوتىپ جاتقان رەسپۋبليكالىق رەفەرەندۋمدا ءوز تاڭداۋىن جاسادى. N110 رەفەرەندۋم ۋچاسكەسى كوميسسياسىنىڭ توراعاسى زامير سەرىكوۆتىڭ ايتۋىنشا, مۇندا 2818 ادام داۋىس بەرۋشى رەتىندە تىركەلگەن.
ء«بىزدىڭ ۋچاسكەگە تاڭعى ساعات 7.00-دە ون شاقتى ادام كەلىپ داۋىس بەرۋدى باستادى. قازىرگى قارقىنعا قاراعاندا ساعاتىنا 50-100 ادامنان كەلىپ جاتىر. العاش بولىپ داۋىس بەرگەن ءۇش ادامعا سىيلىق تابىستادىق. جەرگىلىكتى, حالىقارالىق بايقاۋشىلار دا تاڭعى ساعات 7.00-دەن باستاپ جۇمىستارىنا كىرىستى», دەدى ز.سەرىكوۆ.
ايتا كەتەيىك, وسىدان تۋرا ءبىر اي بۇرىن پرەزيدەنت قاسىم-جومارت توقاەۆ 5 ماۋسىمدا رەسپۋبليكالىق رەفەرەندۋم وتكىزۋ تۋرالى جارلىققا قول قويعان ەدى.