بيىلعى ءساۋىر-مامىر ايلارىندا ۇلتتىق قاۋىپسىزدىك كوميتەتى جانە ونىڭ اۋماقتىق دەپارتامەنتتەرى زاڭسىز اينالىمنان, ونىڭ ىشىندە «قاڭتار وقيعالارى» كەزىندە ۇرلانعان قارۋدى تابۋ بويىنشا جەدەل-ىزدەستىرۋ ءىس-شارالارىن وتكىزدى, دەپ حابارلايدى Egemen.kz.
«زاڭسىز اينالىمنان بارلىعى 61 قارۋ, 13 گراناتا جانە 1170 وق-ءدارى تاركىلەندى. اتالعان فاكتىلەر بويىنشا سوتقا دەيىنگى تەرگەۋ امالدارى جۇرگىزىلىپ جاتىر», دەلىنگەن قر ۇقك مالىمەتىندە.
اتاپ ايتقاندا:
- الماتى وبلىسىندا «بايكال» تاپانشاسى, 2 مىلتىق, 10 گراناتا جانە ءارتۇرلى كاليبرلى 104 وق جاسىرىلعان ورىن تابىلدى.
- جاپپاي تارتىپسىزدىككە قاتىسۋشىلاردان 3 بىرلىك قارۋ مەن 109 وق-ءدارى تاركىلەندى.
- «ماكاروۆ» تاپانشاسىن ساتۋ كەزىندە ءوڭىردىڭ قىلمىستىق وكىلى ۇستالدى.
ونىڭ تۇرعىلىقتى جەرى بويىنشا «قاڭتار وقيعاسى» كەزىندە تالدىقورعان قالالىق پوليتسيا باسقارماسىنان ۇرلانعان تاعى ءبىر تاپانشا تاركىلەندى.
- الماتى قالاسىندا جاپپاي تارتىپسىزدىككە قاتىسۋشىلاردى, سونىڭ ىشىندە پرەزيدەنت رەزيدەنتسياسىنا شابۋىل جاساعانداردى ۇستاۋ بارىسىندا «گلوك» ماركالى تاپانشا مەن 29 وق, تەگىس ۇڭعىلى 3 مىلتىق تاركىلەندى.
- تەرگەۋدەگى «قازاقستاندىق» ۇيىمداسقان قىلمىستىق توپتىڭ مۇشەلەرى ءوز ەركىمەن 39 بىرلىك قارۋ, قاتتى دىبىس شىعاراتىن 1 گراناتا, 1 بروندى ساۋىت جانە 98 وق تاپسىردى.
- پوليتسيا ورگاندارىمەن بىرگە «قورعان» اڭشىلىق دۇكەنىنەن قارۋ ۇرلاۋعا قاتىسى بار ءوڭىر تۇرعىندارى ۇستالدى. ءتىنتۋ بارىسىندا ولاردىڭ تۇرعىلىقتى جەرى بويىنشا وپتيكالىق نىسانا, تەگىس ۇڭعىلى وقپەن جابدىقتاۋعا ارنالعان ستانوك, سونداي-اق «ASG» سترايكبولعا ارنالعان مىلتىق الىندى.
- جامبىل وبلىسىندا «كالاشنيكوۆ» اۆتوماتى, رەۆولۆەر, «سايگا» كارابينى جانە 328 وق-ءدارى جاسىرىلعان ورىن تابىلدى.
- قىزىلوردا وبلىسىندا «كالاشنيكوۆ» اۆتوماتى, «ماكاروۆ» تاپانشاسى, «بورز» تاپانشا-پۋلەمەتى, «سايگا» كارابينى, «ف-1» گراناتاسى جانە 59 وق-ءدارى جاسىرىلعان ورىندار انىقتالدى.
- شىعىس قازاقستان وبلىسىندا پوليتسيا دەپارتامەنتىمەن بىرگە جاسىرىن جەردەن 1 شولاق مىلتىق, 1 «رگ-42» گراناتاسى, 168 وق-ءدارى جانە 1 بروندى ساۋىت الىندى.
- تۇركىستان وبلىسىندا پوليتسيا ورگاندارىمەن بىرگە «موسينا» ماركالى مىلتىق تاركىلەندى.