پارلامەنت سەناتى توراعاسىنىڭ ورىنباسارى اسقار شاكىروۆ رەفەرەندۋمعا كەلگەن تۇركىتىلدەس ەلدەر پارلامەنتتىك اسسامبلەياسى ميسسياسىنىڭ بايقاۋشىلارىمەن كەزدەستى Egemen.kz.
سەناتورلار د.نوكەتاەۆا مەن ە.مامىتبەكوۆ قاتىسقان كەزدەسۋ بارىسىندا تۇركپا-نىڭ قۇرىلۋى مەن دامۋىنا ءوز ۇلەسىن قوسقان ەل رەتىندە قازاقستان وسى ۇيىم اياسىنداعى پارلامەنتارالىق ىنتىماقتاستىققا زور ماڭىز بەرەتىنى اتاپ ءوتىلدى.
مەملەكەت باسشىسىنىڭ باستاماسىمەن قولعا الىنعان كونستيتۋتسيالىق رەفورمانىڭ نەگىزگى ماسەلەلەرى, سونداي-اق ونى جالپى رەسپۋبليكالىق رەفەرەندۋمعا شىعارۋدىڭ ماڭىزى تۋرالى حالىقارالىق بايقاۋشىلار جان-جاقتى حاباردار ەتىلدى.
«قازىرگى كونستيتۋتسياعا ەنگىزىلەتىن, قازاقستاننىڭ بارلىق ازاماتتارىنا ادىلدىك پەن تەڭ قۇقىعىن قالپىنا كەلتىرۋدى, تەجەمەلى جانە تەپە-تەڭدىك جۇيەسىن بيلىكتە ورنىقتىرۋ مىندەتىن كوزدەيتىن ەرەجەلەر «جاڭا قازاقستاندى» قۇرۋدى ىسكە اسىرۋعا باعىتتالعان. بۇل دەموكراتيانى دامىتۋعا جانە باسقارۋدىڭ سۋپەرپرەزيدەنتتىك تۇرىنەن ارىلۋ ءۇشىن ماڭىزدى ءارى قاجەتتى شارت», دەدى پالاتا توراعاسىنىڭ ورىنباسارى.
الداعى رەفەرەندۋمدا كونستيتۋتسياعا ەنگىزىلەتىن وزگەرىستەر قازاقستان حالقىنىڭ تالاپتارى مەن ۇسىنىستارىنا نەگىزدەلگەنى اتاپ ءوتىلدى.
كەزدەسۋگە تۇركىتىلدەس ەلدەردىڭ پارلامەنتتىك اسسامبلەياسىنان تۇركيا ۇلى ۇلتتىق جينالىسىنىڭ دەپۋتاتى رەجەپ شەكەر, قىرعىز رەسپۋبليكاسى جوگوركۋ كەنەشىنىڭ دەپۋتاتى چولپون سۇلتانبەكوۆا, ازەربايجان رەسپۋبليكاسى ميللي ءماجىلىسىنىڭ دەپۋتاتى حيكمەت ماممادوۆ, تۇركپا باس حاتشىسى مەحمەت سۋرەيا ەر قاتىستى.