نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا بالالاردىڭ شىعارماشىلىعى مەن ءبىلىمىن دامىتۋعا ارنالعان بىرنەشە ورتالىق اشىلعانىن ءمالىم ەتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
قالا اكىمىنىڭ ايتۋى بويىنشا, حالىقارالىق بالالاردى قورعاۋ كۇنىنە وراي ونەر-ءبىلىم, تانىمدىق جانە وقۋ ورتالىقتارى, اۋلالار اشىلدى, سونداي-اق ەلوردانىڭ بارلىق اۋدانىندا فەستيۆالدەر, سپورتتىق جارىستار مەن كونتسەرتتەر ءوتىپ جاتىر.
«ماسەلەن بۇگىن ء«بىلىم-پارك» ونەر-ءبىلىم ورتالىعى (نۇرسايا تك) اشىلدى. وندا بالالار روبوتوتەحنيكامەن, كەمە ۇلگىلەۋمەن, اۆيامودەلدەۋمەن, ۆيدەوگرافيكامەن اينالىسا الادى, سول سياقتى بوكسپەن شۇعىلدانىپ, دومبىرا شەرتۋ مەن شاحمات ويناۋدى ۇيرەنە الادى. ء«بىلىم پاركىندەگى» ساباقتار تەگىن, بالالار وعان وقۋشىلار سارايىنىڭ سايتى ارقىلى جازىلا الادى. بۇدان بولەك وقۋشىلار سارايىنىڭ (ب.مومىش ۇلى كوشەسى, 5) بوس تۇرعان ورىندارىن پايدالانا وتىرىپ, قىزمەتىن ايتارلىقتاي كەڭەيتتىك. وندا «SANA» كرەاتيۆتى ءبىلىم بەرۋ ورتالىعى مەن «TANYM» كرەاتيۆتى تەحنولوگيالار ورتالىعى اشىلدى. بۇل ورتالىقتاردا بالالارعا باعدارلامالاۋ جانە كومپيۋتەرلىك گرافيكا دارىستەرى وتەدى. ال ويىن بارىسىندا بالالار قاجەتتى ءبىلىم مەن داعدىلاردى, اسىرەسە روبوتتاردى باعدارلامالاۋدى, لوگيكالىق ويلاۋدى دامىتۋدى جانە ت.ب. تەز ەستە ساقتايدى. ال ساباقتارى تەگىن وتكىزىلەدى», دەپ جازدى التاي كولگىنوۆ.
سونداي-اق ەلوردا اكىمى كەزدەسۋ سوڭىندا تۇلەكتەرمەن, حالىقارالىق جانە رەسپۋبليكالىق وليمپيادالاردىڭ جەڭىمپازدارىمەن اڭگىمە ءوربىتتى. كوماندامىز جىل سايىن رەسپۋبليكالىق وليمپيادالاردا «ۇزدىك وليمپيادالىق كوماندا» اتاعىنا يە بولىپ كەلەدى. بيىل ءبىزدىڭ كوماندا رەكورد ورناتىپ, 93 جۇلدەلى ورىنعا يە بولدى. مۇنىڭ ءبارى – ۇستازداردىڭ, مەكتەپ وقۋشىلارىنىڭ جانە ولاردىڭ اتا-انالارىنىڭ تىنىمسىز ەڭبەگىنىڭ جەمىسى ەكەندىگىن اتاپ ءوتتى.
«مەملەكەت باسشىسى وسى جىلدى بالالار جىلى دەپ جاريالادى. وسكەلەڭ ۇرپاققا جاعداي جاساۋ بويىنشا ءتيىستى جۇمىستار جۇيەلى ءجۇرىپ جاتىر: مەكتەپتەر سالامىز, ۇستازداردىڭ جالاقىسىن ارتتىرامىز, تانىمدىق جانە وقۋ ورتالىقتارىنىڭ جەلىسىن كەڭەيتەمىز.
حالىقارالىق بالالاردى قورعاۋ كۇنىمەن قۇتتىقتايمىن! ءاربىر وتباسىعا, ءار بالاعا زور دەنساۋلىق, تابىس جانە اماندىق تىلەيمىن!», دەپ جازدى ەلوردا اكىمى.
ايانا توعانبەك