«استانا» حالىقارالىق قارجى ورتالىعىنا قاراستى Tech Hub جانە تمد ەلدەرى مەن شەتەلدىك ستارتاپتاردى Mastercard حالىقارالىق تولەم جۇيەسى Mastercard Sustainable Banking Challenge بايقاۋىنا قاتىسۋعا شاقىرىپ وتىر. بۇل تۋرالى اتالعان ورتالىقتىڭ ءباسپاسوز قىزمەتى حابارلادى.
بايقاۋدىڭ ماقساتى – قازاقستاندىق بانكتەرگە ۇزدىك قارجىلىق-تەحنولوگيالىق ۇجىمدارمەن ناتيجەلى ىنتىماقتاستىقتى قۇرىپ, تۇراقتى بانكينگتى دامىتا وتىرا ESG-تاۋەكەلدەردىڭ (ەكولوگيالىق, الەۋمەتتىك جانە كورپوراتيۆتىك باسقارۋ ساياساتى) كەڭ سپەكترىن باسقارۋعا جاردەمدەسۋ. ونىڭ باستى باعىتتارىنا قارجىلىق ينكليۋزيۆتىلىك, اتاپ ايتقاندا قارجىلىق ساۋاتتىلىقتى ارتتىرۋ, ءوزىن ءوزى جۇمىسپەن قامتىعاندار مەن جەكە كاسىپكەرلەر ءۇشىن ءتيىمدى شەشىمدەر ازىرلەۋ, سونداي-اق كومىرتەگى ءىزىن باقىلاۋ, قاعازسىز بانكينگ, كليەنتتەردىڭ ەكولوگيالىق جاۋاپكەرشىلىگىن ارتتىرۋدى كوزدەيتىن «جاسىل» بانكينگ پەن ىشكى ۇردىستەردى اۆتوماتتاندىرۋ مەن كيبەرقاۋىپسىزدىكتى كۇشەيتۋدى قاراستىراتىن ىشكى تۇراقتى دامۋ سالاسى جاتادى.
«قارجى تەحنولوگيالارى داعدارىستان كەيىنگى كەزەڭدە تۇراقتى جانە ينكليۋزيۆتى ورتانى قالپىنا كەلتىرۋگە كومەكتەسەتىنىنە سەنىمدىمىز. ورنىقتى دامۋدىڭ قازىرگى جانە ۇزاق مەرزىمدى مىندەتتەرىن ىسكە اسىرۋدا قارجى سالاسىنىڭ ماڭىزى زور. مۇنى رەتتەۋشى ورگاندار, تۇتىنۋشىلار, ينۆەستورلار جانە تۇتاستاي قوعام جاقسى ءتۇسىنىپ وتىر. بۇل اسىرەسە ەكولوگيا, كليماتتىڭ وزگەرۋى, كورپوراتيۆتىك باسقارۋ جانە الەۋمەتتىك جاۋاپكەرشىلىك, اشىقتىق جانە ەسەپتىلىك, قارجىلىق قىزمەتتەردى ۇسىنۋداعى تەپە-تەڭدىككە قاتىستى. سوندىقتان بيىل وسى باعىتتاردى قولدايمىز دەپ شەشىم قابىلدادىق. بايقاۋدا قىزىقتى ۇسىنىستار بولاتىنىنا ءۇمىت ارتامىز», دەدى Mastercard حالىقارالىق تولەم جۇيەسىنىڭ ورتالىق ازياداعى باس ديرەكتورى رافال ترەپكا.
وتاندىق بانك سەكتورىنداعى يننوۆاتسيالاردى دامىتۋ – احقو-نىڭ Tech Hub قىزمەتىنە كىرەتىن باسىم باعىتتاردىڭ ءبىرى. بۇل رەتتە اتالعان ورتالىق Mastercard-پەن بىرلەسىپ بايقاۋ وتكىزۋگە قۋانا كەلىستى.
«اتالعان بايقاۋ تۇراقتى بانكينگ جانە ESG-باستامالار سالاسىنداعى شەشىمدەرگە ارنالعان. وسى سالا ءبىزدىڭ نارىقتا قارقىندى دامىپ كەلەدى. ءسوزسىز, بۇل ەلىمىزدىڭ ورنىقتى دامۋىنا وڭ ىقپال ەتەدى. وسىنداي ماڭىزدى سالانى بەلسەندى قولداعانى ءۇشىن Mastercard پەن بايقاۋدىڭ سەرىكتەس بانكتەرىنە ريزاشىلىعىمىزدى بىلدىرەمىز», دەدى احقو Tech Hub توراعاسىنىڭ ورىنباسارى بەكجان مۇتانوۆ.
احقو-عا قاراستى Tech Hub سەرىكتەس بانكتەر تاڭداعان باعىتتارعا سايكەس شەشىمدەردىڭ تەحنولوگيالىق سكاۋتينگىن (اشىق يننوۆاتسيالىق ستراتەگيانىڭ ءبىر بولىگى رەتىندە ۇلكەن پايدا اكەلەتىن, تەحنولوگيالىق ماسەلەلەردى شەشىپ ءونىمدى ازىرلەۋگە, ءوز رەسۋرستارىن وڭتايلاندىرۋعا, جاڭا سەرىكتەستەر تاۋىپ, رەۆوليۋتسيالىق تەحنولوگيالارعا جول اشۋعا كومەكتەسەتىن ەلەمەنت) جۇرگىزىپ, بانك وكىلدەرى جانە Mastercard ساراپشىلارىمەن بىرگە ۇزدىك ستارتاپتاردى ىرىكتەيدى. ونىڭ ناتيجەسىندە ۇزدىكتەر قازاقستان نارىعىندا جاڭا كليەنتتەردى تابۋعا مۇمكىندىك الىپ, ءوز ونىمدەرىن ەركىن ساۋدالايتىن بولادى.
بايقاۋعا قاتىسۋشىلار Mastercard-تىڭ قولداۋىمەن جارىستىڭ ءبىر نەمەسە بىرنەشە سەرىكتەس بانكىمەن (10 مىڭ دوللار سوماسىنا دەيىن) قاناتقاقتى جوبانى ىسكە قوسۋ مۇمكىندىگىنە يە بولادى.