گازعا قوسىلۋ جەڭىلدەيدى

بۇگىندە رەسپۋبليكانى گازداندىرۋ ما­ڭىزدى ماسەلە ەكەنى انىق. اسىرەسە نۇر-سۇل­تان قالاسىن, قاراعاندى, اقمولا وبلىس­تارىن جانە سولتۇستىك وڭىرلەردى گازدان­دىرۋعا ەرەكشە ءمان بەرىلگەن. سوندىقتان تۇتىنۋشىلاردى گازعا قوسۋ پروتسەسىن جەدەلدەتۋ ماقساتىندا تەحنيكالىق شارتتاردى الۋعا ارنالعان قۇجاتتار سانىن قىسقارتۋ جۇرگىزىلۋدە.

بۇعان دەيىن تۇتىنۋشى ورتالىقتان­دى­رىلعان گازبەن جابدىقتاۋعا قوسىلۋ ءۇشىن 8 قۇجات جيناۋى قاجەت ەدى. البەتتە, بۇل قوسىلۋ پروتسەسىن ايتارلىقتاي كەشىكتىردى. ەندى تۇتىنۋشىعا تەك 4 قۇجات قانا قاجەت. اتاپ ايتقاندا, ءبىرىنشى قۇجات – نىسان يەسىنىڭ جەكە باسىن كۋالاندىراتىن قۇجاتتىڭ كوشىرمەسى (جەكە تۇلعالار ءۇشىن), كۋالىكتىڭ كوشىرمەسى نەمەسە قىزمەتتىڭ باستالعانى تۋرالى حابارلامانىڭ كوشىرمەسى (جەكە كاسىپكەر ءۇشىن), مەملەكەتتىك تىركەۋ (قايتا تىركەۋ) تۋرالى انىقتاما (زاڭدى تۇلعالار ءۇشىن). ەكىنشى قۇجات – جەر ۋچاسكەسىنە تىركەلگەن قۇقىقتار (اۋىرتپالىقتار) تۋرالى مالىمەتتەر نە جەر ۋچاسكەسىنە قۇقىق بەلگىلەيتىن قۇجاتتار. ءۇشىنشى قۇجات – نى­ساننىڭ ورنالاسۋ سىزباسى. ءتورتىنشى قۇجات – كوپقاباتتى ۇيلەردى گازداندىرۋ كەزىندە شيكى گازدى تۇتىنۋعا, تاماق دايىن­داۋعا, جىلىتۋعا, جەلدەتۋگە, اۋا باپ­تاۋعا, ىستىق سۋمەن جابدىقتاۋعا ارنالعان گيدراۆ­ليكا­لىق ەسەپتەۋلەر (زاڭدى تۇلعالار ءۇشىن).

بۇل ءۇشىن تابيعي مونوپوليالاردى رەتتەۋ كوميتەتى مەملەكەتتىك اپپاراتتىڭ قىزمەتىن بيۋروكراتياسىزداندىرۋ بويىنشا شارالاردى جۇزەگە اسىرۋدا. سونداي-اق ەلىمىزدىڭ گازداندىرىلعان وڭىرلەرىنىڭ تۇرعىندارىن گازعا قوسۋدى ىنتالاندىرۋ ماقساتىندا ءتيىستى قۇقىقتىق اكتىلەرگە وزگەرىستەر ەنگىزۋ بويىنشا جۇمىستار جۇر­گىزۋدە. ونىڭ ىشىندە تەحنيكالىق شارتتاردى الۋ ءراسىمىن وڭايلاتۋدا.

جوعارىدا اتالعان وزگەرىستەر گازعا قوسى­لۋ بارىسىندا تەحنيكالىق شارتتار العان كەزدە قۇجاتتار سانىن قىسقارتۋعا مۇم­كىندىك بەرەدى. بۇل شارا ادامدارعا جەڭىل­دەتىلگەن تارتىپپەن تەحنيكالىق شارتتار الۋعا جانە اعىمداعى ماۋسىم بارىسىندا ۋاقىت پەن اقشانى ۇنەمدەي وتىرىپ, گازعا جىلدام قوسىلۋعا جول اشادى. وسىلايشا, حالىقتىڭ گازعا تەز كوشۋىنە ىقپال ەتەدى.

بۇگىنگى تاڭدا بۇيرىق جوباسىن جەكە كاسىپكەرلىك سۋبەكتىلەرىنىڭ اككرەديتتەلگەن بىرلەستىكتەرىمەن جانە مۇددەلى مەملەكەتتىك ورگاندارمەن كەلىسۋ جۇرگىزىلۋدە. سونداي-اق حالىقتى گازداندىرۋ تۇرعىنداردىڭ جايلىلىعىنا عانا ەمەس, قورشاعان ورتاعا تىكەلەي قاتىسى بار ەكەنىن اتاپ وتكەن ءجون.