«بالالار جىلى» اياسىنداعى ءىس-شارالارعا 48,3 ملرد تەڭگە بولىنگەن, دەپ حابارلايدى Egemen.kz. بۇل تۋرالى بۇگىن ءوزىنىڭ Facebook پاراقشاسىندا قر پرەمەر-ءمينيسترى ءاليحان سمايىلوۆ جازدى.
ۇكىمەت باسشىسىنىڭ ايتۋىنشا, بالالار مەرەكەسىنە سايكەس كەلگەن بۇگىنگى ۇكىمەت وتىرىسىندا مەملەكەت باسشىسىنىڭ جارلىعىمەن جاريالانعان «بالالار جىلىن» وتكىزۋ ماسەلەسى تالقىلانعان.
«بيىل «بالالار جىلى» اياسىندا كوپتەگەن ءىس-شارالار جوسپارلانىپ, جۇزەگە اسىرىلۋدا. بۇل ماقساتقا مەملەكەتتىك قازىنادان جالپى سوماسى 48,3 ملرد تەڭگە ءبولىندى. ولاردىڭ بارلىعى ناقتى ورىندالۋى ءتيىس. ەڭ باستىسى – بالالارىمىزدىڭ قاۋىپسىزدىگىن قامتاماسىز ەتۋ», دەپ جازدى پرەمەر-مينيستر.
سونداي-اق ول وبلىس اكىمدىكتەرىنە الەۋمەتتىك جاعىنان از قامتىلعان وتباسىلاردىڭ بالالارىن ساۋىقتىرۋ شارالارىمەن قامتۋدى, ولاردىڭ جازعى دەمالىستا بوس ۋاقىتىن پايدالى وتكىزۋ ماسەلەسىنە كوڭىل ءبولۋدى تاپسىرعانىن دا اتاپ ءوتتى.
پرەمەر-ءمينيستردىڭ ايتۋىنشا, اۋىلدىق جەرلەردە سپورت الاڭدارى مەن بالالاردى دامىتۋ ورتالىقتارى جابدىقتالۋى ءتيىس.
«دەنساۋلىق ساقتاۋ مينيسترلىگى شالعاي ەلدى-مەكەندەردەگى بالالاردىڭ دەنساۋلىق جاعدايىنا سكرينينگتىك جانە ستوماتولوگيالىق تەكسەرۋلەر جۇرگىزۋ ءۇشىن جىلجىمالى مەديتسينالىق پۋنكتتەردىڭ جۇمىسىن ۇيىمداستىراتىن بولادى», دەدى ۇكىمەت باسشىسى.
سونىمەن قاتار بالالاردىڭ قۇقىعىن ساقتاۋعا, ەكسكۋرسيالىق-تانىمدىق ءىس-شارالار ۇيىمداستىرۋعا, ولاردى ءتۇرلى ۇيىرمەلەرمەن جانە سەكتسيالارمەن قامتۋعا قاتىستى بىرقاتار تاپسىرمالار بەردى.
اليحان سمايلوۆتىڭ جازباسىندا بارلىق ءوڭىر اكىمدەرى «بالالار جىلىنا» ارنالعان ءىس-شارالاردىڭ ورىندالۋىن جەكە باقىلاۋىندا ۇستاۋى تيىستىگى دە ايتىلعان.
«ادامنىڭ ءبىر قىزىعى – بالا دەگەن» دەپ اقىنىمىز اباي ايتقانداي, بالالاردىڭ ءبىلىم الىپ, ولارعا جان-جاقتى قامقورلىق جاساۋ, قۇقىقتارىن قورعاۋ – مەملەكەتتىڭ ماڭىزدى مىندەتى. سوندىقتان كەشەندى ءىس-شارالاردىڭ بارلىعى مەنىڭ تۇراقتى باقىلاۋىمدا بولادى», دەدى ءاليحان سمايىلوۆ.
ايانا توعانبەك