اقتوبەدە ويناۋعا كەتىپ, ۇيىنە ورالماعان بالا ەسكى ەلەۆاتوردىڭ استىق ساقتايتىن رەزەرۆۋارىنان تابىلدى. قازىر ول اۋرۋحانانىڭ جانساقتاۋ بولىمىندە جاتىر, دەپ حابارلايدى Egemen.kz.
وقيعا كەشە بولدى. اقتوبە قالاسىنداعى جانقوجا باتىر كوشەسىندە تۇراتىن 9 جاستاعى بالا اۋلادان شىعىپ, ويناپ كەتكەن. كەيىن اتا-اناسى پوليتسياعا قوڭىراۋ شالعان. 102 نومىرىنە حابارلاما ساعات 23:31-دە تۇسكەن. بىردەن ىزدەستىرۋ جۇمىسى باستالدى.
«پوليتسيا قىزمەتكەرلەرى كەشەندى ىزدەستىرۋ شارالارىن جۇرگىزىپ, بالانىڭ بولۋى مۇمكىن جەرلەردى قاراپ شىقتى. كامەلەتكە تولماعاندار ءىسى جونىندەگى پوليتسيا ينسپەكتورلارى ەلەۆاتور عيماراتىن تەكسەرىپ, تەرەڭدىگى 10 مەتر بولاتىن رەزەرۆۋاردان تاپتى. جاعدايى وتە ناشار بولدى. پوليتسيا قىزمەتكەرلەرى مەن قۇتقارۋشىلار بالانى رەزەرۆۋاردان كوتەرىپ شىعاردى. كامەلەتكە تولماعان بالا بالالار اۋرۋحاناسىنىڭ جانساقتاۋ بولىمىنە جاتقىزىلدى. اقتوبە وبلىسى پد اتا-انالاردان بالالاردى قاراۋسىز قالدىرماۋدى سۇرايدى. بالالارعا قۇرىلىس الاڭدارى مەن قاراۋسىز قالعان عيماراتتار اۋماعىندا ءجۇرۋدىڭ ەرەجەسىن ۇيرەتۋ كەرەك. اتا-انالار بالالارىنىڭ قاي ۋاقىتتا, قاي جەردە جۇرگەنىن باقىلاۋى قاجەت», دەدى وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.
اقتوبە وبلىستىق بالالار اۋرۋحاناسى باس دارىگەرىنىڭ ورىنباسارى ساعيدوللا دوسماعامبەتوۆتىڭ ايتۋىنشا, تۇندە اۋرۋحاناعا جەتكىزىلگەن بالانىڭ جاعدايى اۋىر.
«بالانى جەدەل جاردەم بريگاداسى ەس-ءتۇزسىز جەتكىزدى. ونى بىردەن جانساقتاۋ بولىمىنە جاتقىزىپ, نەيروحيرۋرگ, تراۆماتولوگ, حيرۋرگ جانە رەانيماتولوگ قارادى. توڭىپ قالعان. كت-عا تۇسىرگەن سوڭ دياگنوز قويىلدى. جابىق باس-مي جاراقاتىن العان. بىرنەشە سۇيەگى سىنعان. بۇيرەگى زاقىمدانعان. جامباس سۇيەگى سىنعان. بالانىڭ جاعدايى اۋىر. جاساندى تىنىس الۋ اپپاراتىنا قوسىلدى», دەپ حابارلادى وبلىستىق دەنساۋلىق ساقتاۋ باسقارماسىنان.