پەتروپاۆل قالاسىنىڭ تۇرعىنى مارات نىعىمەتوۆ 54 جاسىندا قالاداعى بايىرعى سپورت مەكتەپ-ينتەرناتىنا ءتۇسىپ, بيىل بىتىرگەلى وتىر. قازىر سولتۇستىك قازاقستان وبلىسىنىڭ وليمپيادالىق رەزەرۆىنىڭ مەكتەپ-ينتەرناتى اتالاتىن بۇل وقۋ ورنى جاتتىقتىرۋشى-وقىتۋشى ماماندارىن دايارلايدى.
بۇل وقۋدى تامامداعاندار بالالار مەن جاسوسپىرىمدەرگە ارنالعان سپورت سەكتسيالارىن جۇرگىزە الادى. م.نىعىمەتوۆكە وسىنداي ديپلوم كەرەك بولعان سوڭ جاسىنىڭ وتكەنىنە قاراماي بالالارىنان دا كىشى جاستارمەن قاتار كۇندىزگى وقۋدىڭ ۇستەلىنە وتىرعان. وقۋشىلار تۇگىلى مۇنداعى مۇعالىمدەردىڭ ءوزى – ماكەڭنىڭ بالالارىنداي. العاش قۇجاتتارىن تاپسىرۋعا كەلگەندە شىنى ما, ءازىلى مە دەپ سەنبەي, كەيىن وبلىستىق ءبىلىم باسقارماسىنان رۇقسات الىپ قابىلداعان ەكەن.
م.نىعىمەتوۆتىڭ اڭگىمەسى سەنىمدى, «ادام جاسىنا قاراماي كەز كەلگەن كەدەرگىنى باعىندىرا الادى, مەن سونى دالەلدەمەكپىن» دەيدى. جاسىنان سپورتتىڭ كوپتەگەن تۇرىمەن اينالىسقان ەكەن. سونىڭ ىشىندە كاراتەدەن قارا بەلبەۋ يەسى اتانىپتى. بوكسپەن, ۆولەيبولمەن, فۋتبولمەن دە اينالىسقان. ء«ۇيىمىزدىڭ جانىنداعى ستاديوننان كۇنى بويى شىقپاي, كەز كەلگەن سپورت تۇرىمەن اينالىسا بەرەتىنمىن. سول ادەت ومىرىمدە ءالى دە قالماي كەلەدى. قازىر گىر كوتەرۋمەن دە اينالىسامىن. 24 كيلوگرامدىق ەكى گىردى ءار قولىممەن 50 رەت كوتەرە الامىن», دەيدى ول.
جەكە ءومىرى تۋرالى ماكەڭ جارىلىپ ايتا قويمايدى. تەك تسەلينوگراد قالاسىندا تۋىپ, اكە-شەشەسى اجىراسقان سوڭ اناسىمەن بىرگە التى جاسىنان پەتروپاۆلعا كوشىپ كەلىپ, تۇرىپ جاتقانىن عانا ايتتى. وقۋدى ەڭسەرۋى تۋرالى ايتقان مەكتەپ-ينتەرنات ديرەكتورىنىڭ ورىنباسارى و.وستافەيچۋك ۇلگەرىمى جامان ەمەس ەكەنىن جەتكىزدى. تەك بيىل عانا كوپ ساباقتى جىبەرگەنى ءۇشىن شاكىرتاقىدان قاعىلىپتى.
كوللەدجدى بىتىرگەن سوڭ م.قوزىباەۆ اتىنداعى ۋنيۆەرسيتەتتىڭ دەنە تاربيەسى فاكۋلتەتىنە ءتۇسۋ ويى دا بار ەكەن. ءوزى جاسىنىڭ ۇلعايىپ قالعانىن ءتىپتى اۋىزعا دا المايدى. ءبارى دە وعان ءالى الدا سياقتى. مىنە, پەتروپاۆلدا وسىنداي وپتيميست ادام ءومىر ءسۇرىپ جاتىر. ونىڭ ءىسى ۇلگى مە, جوق پا, ونى اركىم وزىنشە باعالار, ەڭ باستىسى, ول جاسقا قاراماي ادام اعزاسىنىڭ ءتوزىمدى بولا الاتىنىن دالەلدەپ جاتىر.
پەتروپاۆل