بۇگىندە ەلىمىزدىڭ ءار ايماعىندا ستۋدەنت جاستارمەن كەزدەسۋلەر ۇيىمداستىرىلىپ, مەملەكەت باسشىسىنىڭ باستاماسىمەن جۇزەگە اساتىن كونستيتۋتسيالىق رەفورما كەڭىنەن ءتۇسىندىرىلىپ ءجۇر. وسىنداي باسقوسۋلار كەزىندە ەڭ ءجيى قويىلاتىن سۇراقتىڭ ءبىرى – «جاڭا قازاقستاننىڭ كوشباسشى جاستارى قانداي بولۋى كەرەك؟» دەگەن ساۋال.
كوشباسشى جاستار – كەز كەلگەن مەملەكەتتىڭ بولاشاعى. ولاردىڭ جاستىق شاعى ەلدىڭ دامۋىنا, گۇلدەنۋىنە ۇلەس قوساتىن ماڭىزدى ۋاقىت بولىپ سانالادى.
شىعىس امىرلەرىنىڭ ءبىرى ءال-فارابيدەن: «ۇستاز, مەنىڭ مەملەكەتىمنىڭ بولاشاعى قانداي كۇيدە بولماق؟» دەپ سۇراعاندا عۇلاما: «ەلىڭنىڭ بولاشاعىن بىلگىڭ كەلسە, ماعان جاستارىڭدى كورسەت, سونان سوڭ ايتىپ بەرەيىن», دەگەن ەكەن. سوندىقتان ەلدىڭ قانداي بولاتىندىعىن جاستارعا, ياعني بىزدەرگە قاراپ بىلەدى. كوشباسشى جاستار ەلىنىڭ بولاشاعىنا الاڭداپ, «قايتسەم ەلىمدى كوركەيتەم؟» دەگەن ماقساتتى الدىنا قويسا, ەڭ ماڭىزدىسى وسى.
بۇگىندە ەلىمىزدە كوشباسشىلىق جاساپ جۇرگەن جاستار جەتەرلىك. الايدا وكىنىشكە قاراي, ولاردىڭ اراسىندا كوشباسشىلىق قاسيەتتەرىن قوعامعا جات, تەرىس باعىتتا پايدالانىپ جۇرگەندەر دە بارشىلىق. ال بىزگە تارتىپكە باس يگەن, بىلىكتى, باتىل, ويى ۇشقىر, ۇيىمداستىرۋشىلىق قابىلەتى جوعارى, ەل الدىندا ەركىن سويلەي الاتىن, ەلىن سۇيەتىن پاتريوت, كەلەشەك ۇرپاق ءۇشىن الاڭدايتىن, قازاق ەلىنىڭ بولاشاعىن جاسايتىن كوشباسشى جاستار كەرەك. مەملەكەت تاراپىنان وسىنداي جاستارعا باعىت-باعدار بەرىپ, قولداۋ كورسەتىلسە, سول بۋىننىڭ ارتىنان ەلىمىزدىڭ تالاي وسكەلەڭ ۇرپاعى ىلەسەتىنىنە تولىق سەنەمىن.
ومىردەن ءوز جولىن تابا الماي اداسىپ, ءتۇرلى تەرىس باعىتتاعى توپتارعا قوسىلىپ قىلمىسقا, قۇقىق بۇزۋشىلىقتارعا بارىپ جۇرگەن جاستارعا پسيحولوگيالىق, الەۋمەتتىك تۇرعىدا كومەك كورسەتۋدىڭ, ولاردى دۇرىس باعىتقا جەتەلەۋدىڭ ءمانى زور. قازىرگى قوعامنىڭ جەگى قۇرتىنا اينالعان جەمقورلىققا جاستاردى قارسى تۇرۋعا ۇندەۋ دە نازاردان تىس قالماۋى قاجەت. وسى تۇرعىدان كەلگەندە جاڭا قازاقستاندى ءارى قاراي دامىتۋعا, مەملەكەتتىك ىستەرگە جانە تولىققاندى ساياساتقا ارالاسۋ ءۇشىن «جاستار – كوشباسشى» ۇيىمىن قۇرۋدى ۇسىنامىن. ويتكەنى كوشباسشى جاستاردى قولداۋ مەن سەنىم ارتۋ ماڭىزدى. بىزدەر, قازاق ەلىنىڭ جاستارى اتا-بابالارىمىز اڭساعان وسىنداي بەيبىت كۇنىمىزدى جانە تەڭدەسى جوق تاۋەلسىزدىگىمىزدى باعالاي بىلەيىك, سوندا عانا كەلەشەك ۇرپاققا كەڭ بايتاق جەرىمىز بەن قازاقى بولمىسىمىزدى, سالت-ءداستۇرىمىزدى, جاقسى ىستەرىمىزدى امانات ەتىپ قالدىرامىز, ول ۇرپاقتان ۇرپاققا جالعاسۋى ءتيىس.
اقمونشاق قۇرالبەك,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى