الماتى قالاسىنداعى قازاق سپورت جانە تۋريزم اكادەمياسىندا كونستيتۋتسيالىق رەفورمالاردى ءتۇسىندىرۋ ماسەلەلەرىنە ارنالعان «جاڭا قازاقستان» يدەياسى: بەتبۇرىستىق نىسانا» تاقىرىبىندا دوڭگەلەك ۇستەل ءوتتى.
دوڭگەلەك ۇستەل جۇمىسىنا الماتى قالاسى ءماسليحاتىنىڭ دەپۋتاتى, جوعارى وقۋ ورىندارىنىڭ وكىلدەرى, كوللەدج ديرەكتورى, پرورەكتورلار, كافەدرا مەڭگەرۋشىلەرى, جاستار ءىسى جونىندەگى كوميتەتىنىڭ باسشىسى, اكادەميانىڭ پروفەسسور-وقىتۋشىلار قۇرامى قاتىسىپ, رەفەرەندۋمنىڭ ماڭىزى جايلى ويلارىن ورتاعا سالدى.
جيىندا رەفەرەندۋمعا قاتىستى تىڭ ويلار ايتىلدى, ءسوز العان سپيكەرلەر جاڭا قازاقستاندى بىرگە قۇرۋعا شاقىردى. دۇنيەجۇزىلىك پاراليمپيادالىق ويىنداردىڭ جۇلدەگەرى, اكادەميا تۇلەگى, الماتى قالالىق ءماسليحاتىنىڭ دەپۋتاتى سەرىك ەسماتوۆتىڭ پىكىرى جيىنعا شاقىرىلعان ستۋدەنتتەردىڭ نازارىن اۋداردى. ويىن بالاسى كەزىندە پويىزدىڭ استىنا ءتۇسىپ كەتىپ, ەكى اياعىنان بىردەي ايىرىلعان سەرىكتى تاعدىرى سىندىرا المادى. ورتا مەكتەپتى بىتىرگەن سوڭ وسى اكادەمياعا وقۋعا قابىلداندى, كوڭىلدى تاپقىرلار كلۋبىنىڭ مۇشەسى رەتىندە ءتۇرلى ءىس-شارالاردى ۇيىمداستىردى, دۇنيەجۇزىلىك پاراليمپيادالىق ويىنداردىڭ جۇلدەگەرى اتاندى.
رەفورما قوعامدى دەموكراتيالاندىرۋدىڭ شىنايى قادامى ەكەنىن ايتقان س.ەسماتوۆ ساياسي ناۋقاننىڭ ىرگەلى وزگەرىستەرگە جول اشاتىندىعىن, ازاماتتاردىڭ مەملەكەتتىك باسقارۋعا نەعۇرلىم كەڭ قاتىسۋىن كوزدەيتىن, حالىقتىڭ قولداۋىمەن ەلىمىزدىڭ جاڭا ساياسي جۇيەگە كوشۋىنە بارىنشا ىقپال ەتۋگە باعىتتالعانىن ايتتى. «رەفەرەندۋم بيلىك ءۇشىن ەمەس, حالىق ءۇشىن كەرەك. جاڭا قازاقستان – ادىلەتتىلىك ەرەجەلەرى قالىپتاسقان قوعامى بار مەملەكەت. 2019 جىلى ايتىلعان «حالىق ۇنىنە قۇلاق اساتىن مەملەكەت» تۇجىرىمداماسىنىڭ ومىردەگى, پراكتيكالىق كورىنىستەرىنىڭ ءبىرى وسى – رەفەرەندۋم. كونستيتۋتسياعا ەنگىزىلگەن وزگەرىستەر مەملەكەتتىك باسقارۋ جۇيەسىن ترانسفورماتسيالاۋعا, پارلامەنتتىڭ ءرولىن كۇشەيتۋ, حالىقتىڭ ەلدى باسقارۋعا قاتىسۋىن كەڭەيتۋ, ازاماتتاردىڭ قۇقىقتارىن قورعاۋدىڭ كونستيتۋتسيالىق تەتىكتەرىن كۇشەيتۋ ءتارىزدى ىرگەلى وزگەرىستەرگە جول اشادى», دەپ اتاپ ءوتتى س.ەسماتوۆ.
الماتى