ىرعىز اۋدانىنىڭ ەكى اۋىلىنا گاز بەرىلەدى

بيىل اۋداندا كوپتەگەن الەۋمەتتىك نىساندار سالىنىپ جاتىر. ولاردىڭ قاتارىندا قۇرىلىسى باستالعان  سەگىز پاتەرلى ەكى قاباتتى قوس ءۇي  بار.  قۇرىلىس ەلدى مەكەنىندەگى  50 ورىندىق بالاباقشاعا كۇردەلى جوندەۋ جۇمىستارى جۇرگىزىلىپ جاتىر.  ال, 1978 جىلى سالىنعان اۋداندىق بالالار مەن جاسوسپىرىمدەر سپورت مەكتەبى كۇردەلى جوندەۋدى قاجەت ەتەدى. بۇل تۋرالى سپورت مەكتەبىنىڭ جاتتىقتىرۋشىلارى ءوڭىر باسشىسىنا حابارلادى. مۇندا  800 بالا 13 سپورت تۇرىمەن اينالىسادى. بىراق جارتى عاسىردان بەرى جوندەۋ كورمەگەن عيمارات ابدەن توزعان,  زاماناۋي سپورت جابدىقتارى دا جوق.  ءوڭىر باسشىسى عيماراتتى  جوندەۋ جۇمىستارىنا قارجى بولۋگە قولداۋ كورسەتۋدى تاپسىردى. 

اۋدان ىشىندەگى ماڭىزدى جولدار قاتارىنداعى  «ىرعىز-قۇتيكول» اۆتوكولىك جولىن جوندەۋگە وبلىستىق ءماسليحات دەپۋتاتتارى سوڭعى سەسسيادا  330 ميلليون تەڭگە قارجى بولگەن بولاتىن. بۇل تاسجول دا سالىنعالى جوندەۋ كورمەگەن, اسىرەسە كۇز بەن كوكتەمدەگى جاۋىن-شاشىندا جول سازدانىپ, اۋىل تۇرعىندارىنىڭ قاتىناسىنا  قيىندىق تۋدىراتىن.

قۇتيكول ەلدىمەكەنىندە 1102 تۇرعىن بار. بيىل جىلدىڭ سوڭىنا دەيىن اۋىلعا گاز قۇبىرى تارتىلادى دەپ كۇتىلۋدە. قازىر اۋدان ورتالىعىنان تارتىلعان قۇبىر جەلىسى اۋىلدىڭ شەتىنە كىرىپ تۇر. ەندى اۋىلىشىلىك جەلىنى قوسۋ كەرەك. وسى جوبا «اۋىل – ەل بەسىگى» مەملەكەتتىك باعدارلاماسى ارقىلى قارجىلاندىرىلادى. جوبا بيۋدجەتى 795 ميلليون تەڭگە. كۇزگە دەيىن قۇتيكولگە گاز قۇبىرى تارتىلسا, قۇرىلىسى 2023 جىلعا جوسپارلانعان نۇرا اۋىلىنا دا گاز جۇرگىزۋدى بيىل جەدەلدەتۋدى تاپسىردى ءوڭىر باسشىسى.

ايتا كەتۋ كەرەك, قۇتيكول مەن نۇرا اۋىلدارىنىڭ اراسى جاقىن, نۇراعا گاز جۇرگىزۋ جوباسى 63 ميلليون تەڭگەگە جوبالانعان.

قۇتيكول اۋىلىنا اۋدان ورتالىعىنان اۋىز سۋ قۇبىرى دا تارتىلۋدا.

«سۋ دەبەتىنە بايلانىستى ماسەلە بار, قازىر سۋ ىرعىز اۋىلىنىڭ وزىنەن كەلەدى. سوندىقتان ۇڭعىمانى وسى جەردەن بۇرعىلاۋ كەرەك. گەولوگيالىق بارلاۋ جۇمىستارىن جۇرگىزگەن ءجون. باستىسى - سۋ بار. بۇل سۇراقتى 2-3 جىل ىشىندە شەشەمىز دەپ ويلايمىن», دەدى وڭداسىن ورازالين قۇتيكول ەلدى مەكەنىنىڭ تۇرعىندارىمەن كەزدەسۋىندە.

 اقتوبە وبلىسى.