اقمولا جانە پاۆلودار وبلىستارىندا ءۇي جانۋارلارىنا جاسالعان زەرتحانالىق زەرتتەۋلەر كەزىندە پاراگريپپ-3, نودۋليارلىق دەرماتيت, كونتاگيوزدى پلەۆروپنەۆمونيا, پاستەرەللەز, ۆيرۋستىق ديارەيا جانە اۋسىل سياقتى اۋرۋلار انىقتالعان جوق. بۇل تۋرالى اۋىل شارۋاشىلىعى مينيسترلىگى حابارلادى.
اۋىل شارۋاشىلىعى مينيسترلىگىنىڭ ۆەتەريناريا بويىنشا ۇلتتىق رەفەرەنتتىك ورتالىعى وسى جىلدىڭ 14 قاڭتارىندا قاراعاندى وبلىسىندا اۋسىل وشاعىن تىركەگەنى ەسىمىزدە. كوپ ۇزاماي شەت اۋدانى كيىكتى اۋىلدىق وكرۋگى اكىمىنىڭ شەشىمىمەن شارۋا قوجالىعىنا كارانتين قويىلىپ, بايلانىستا بولعان بارلىق جانۋار جويىلدى. سونداي-اق دەزينفەكتسيالاۋ جۇمىستارى جۇرگىزىلدى.
تيىسىنشە, مينيسترلىكتىڭ ۆەتەريناريالىق باقىلاۋ جانە قاداعالاۋ كوميتەتى جانۋارلاردىڭ دەنساۋلىعىن قورعاۋ جونىندەگى دۇنيەجۇزىلىك ۇيىمعا اۋسىل اۋرۋى تۋرالى دەرەۋ حابارلادى. وسىعان بايلانىستى دۇنيەجۇزىلىك جانۋارلار دەنساۋلىعىن قورعاۋ ۇيىمى ۆاكتسينالاۋسىز اۋسىل بويىنشا سالاماتتىلىق مارتەبەسىن توقتاتتى, ال يمپورتتاۋشى ەلدەر (رەسەي, قىتاي, بەلارۋس جانە ت.ب.) قازاقستاننان ءتىرى جانۋارلاردى, جانۋارلاردان الىناتىن ونىمدەر مەن شيكىزاتتى ەكسپورتتاۋعا قاتىستى شەكتەۋ شارالارىن ەنگىزدى. بۇل قازاقستاندىق ەكسپورتتاۋشىلاردىڭ ءلوببيىنىڭ جوقتىعىن كورسەتتى.
«مينيسترلىك جەرگىلىكتى اتقارۋشى ورگانداردىڭ ۆەتەريناريالىق قىزمەتى اۋىل شارۋاشىلىعى قۇرىلىمدارىنىڭ ۆەتەريناريالىق دارىگەرلەرىمەن بىرلەسىپ, اۋسىل بويىنشا جاعدايدى تۇراقتاندىرۋدى قامتاماسىز ەتۋ ءۇشىن جۇمىس جۇرگىزدى. رەسەيدىڭ ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەتىنىڭ حاتتارىنا سايكەس, بيىل ءساۋىر ايىنان باستاپ قازاقستان اۋماعىنان تاعامدىق كوللاگەن ءوندىرۋ ءۇشىن ءىرى قارا مال تەرىلەرىن اكەلۋگە رۇقسات ەتىلدى. سونىمەن قاتار ۆەتەريناريالىق باقىلاۋ جانە قاداعالاۋ كوميتەتى ەپيزووتيالىق ساۋلىقتى ساقتاۋ ءۇشىن قازاقستاننىڭ ورتالىق ايماعىندا اۋىل شارۋاشىلىعى جانۋارلارىن ۆاكتسينالاۋ تۋرالى شەشىم قابىلدادى. بۇل تۋرالى دۇنيەجۇزىلىك جانۋارلار دەنساۋلىعىن قورعاۋ ۇيىمىن حاباردار ەتتى», دەلىنگەن ۆەدومستۆونىڭ حابارلاماسىندا.
ايتا كەتۋ كەرەك, جانۋارلار اۋرۋى تۋرالى كۇدىك تۋىنداعان جاعدايدا ۆەتەرينارلىق قىزمەتتەر اككرەديتتەلگەن زەرتحانالاردا زەرتتەلەتىن بيولوگيالىق ماتەريالدىڭ سىنامالارىن الادى. اقمولا جانە پاۆلودار وبلىستارىنان كەلگەن اۋرۋ جانۋارلارعا زەرتحانالىق زەرتتەۋ ناتيجەلەرىنە سايكەس ينفەكتسيالىق رينوتراحەيت ورناتىلدى. ناتيجەسىندە, شەكتەۋ شارالارى ەنگىزىلىپ, قازىر قاجەتتى جۇمىستار جۇرگىزىلىپ جاتىر. زەرتتەۋلەردىڭ ناتيجەسىندە پاراگريپپ-3, نودۋليارلىق دەرماتيت, اۋسىل, كونتاگيوزدى پلەۆروپنەۆمونيا, پاستەرەللەز جانە ۆيرۋستىق ديارەيا سياقتى اۋرۋلار انىقتالمادى. جالپى, ەلىمىزدە اۋسىل بويىنشا ەپيزووتيالىق جاعداي تۇراقتى.