گرەكيا استاناسى – افينادا ارتىستىك جۇزۋدەن الەم كۋبوگىنىڭ سۋپەرفينالى اياقتالدى. جەرگىلىكتى «سپيروس لۋيس» سۋ سپورتى ورتالىعىندا وتكەن ءدۇبىرلى دودادا الەمنىڭ 23 ەلىنەن كەلگەن ەڭ مىقتى دەگەن 137 سپورتشى شەبەرلىك بايقاستى.
مادەنيەت جانە سپورت مينيسترلىگىنە قاراستى سپورتتى دامىتۋ ديرەكتسياسىنىڭ مالىمەتى بويىنشا, جارىستىڭ العاشقى كۇنى تەحنيكالىق باعدارلامادا ونەر كورسەتكەن قازاقستاندىق سپورتشىلار 2 جۇلدەگە قول جەتكىزسە, كەلەسى كۇنگى جارىستا وسى يگى ءداستۇردى لايىقتى جالعاستىرىپ, تاعى 3 رەت تۇعىر بيىگىنە كوتەرىلدى.
بايراقتى باسەكەنىڭ ءبىرىنشى جارىس كۇنىندە تەحنيكالىق باعدارلامادا ۇزدىك ۇشتىكتىڭ قاتارىنان كورىنگەن قازاقستاننىڭ قىزدار كومانداسى (8 سپورتشى) ەركىن جاتتىعۋدا ناتيجەسىن جاقسارتا ءتۇستى. بۇل جولى «موانا» انيماتسيالىق فيلمىندەگى Vaiana انىنە ونەر كورسەتىپ, كۇمىس جۇلدەگەر اتاندى (81,5333 بالل). يزرايل قۇراماسى 1-ءشى, سلوۆاكيا 3-ورىنعا جايعاستى. وسىدان ءبىراز كۇن بۇرىن اۋستراليادا ۆيرتۋالدى فورماتتا وتكەن جارىستا تورەشىلەر ءبىزدىڭ سپورتشىلارعا ءدال وسى باعدارلاما (ول كەزدە دە جەرلەستەرىمىز Vaiana انىنە بيلەگەن ەدى) ءۇشىن 79,6000 ۇپاي بەرگەن بولاتىن.
ەدۋارد كيم مەن جاكلين ياكيموۆا جۇبى تەحنيكالىق جاتتىعۋىنا Chicago فيلمىندەگى All that Jazz ءانىن تاڭداپ, شەبەرلىكتەرىن پاش ەتتى. ناتيجەسىندە, تورەشىلەردەن 78,2740 ۇپاي الىپ, قولا جۇلدەگە يە بولدى. بۇل سىندا يسپانيالىق ەمما گارسيا مەن پاۋ ريبەس توپ جارسا (83,3138 بالل), كۇمىس جۇلدەگە امەريكالىق كلاۋديا كولەتتي مەن كەننەت گودە يەلىك ەتتى.
سونىمەن قاتار ەرلەر اراسىنداعى جەكەلەي سىندا ەدۋارد كيم 2019 جىلعى «ەۆروۆيدەنيا» جەڭىمپازى دۋنكان لوۋرەنستىڭ Arcade انىنە ونەر كورسەتىپ, قولا جۇلدەگە يە بولدى. بيىل العاش رەت ەل نامىسىن وسىنداي ۇلكەن جارىستا قورعاعان ەدۋاردتىڭ «ماحاببات تاريحى» دەپ اتالاتىن باعدارلاماسىنا تورەشىلەر 74,8478 بالل بەردى. ال كوماندالىق سىندا قازاقستان قۇراماسى ولەنا ۋتايدىڭ «تابيعات ءۇنى» مۋزىكاسىن تاڭداپ, بار شەبەرلىگىن كورسەتە الدى. ناتيجەسىندە, اقش پەن يزرايلدەن كەيىنگى 3-ورىنعا تۇراقتادى.
فينالدىڭ سوڭعى كۇنى ارالاس كوماندالاردىڭ ەركىن كومبيناتسيا سايىسىندا قازاقستان (10 سپورتشى) «يسپان ءبيى» نومەرىمەن قولا مەدالعا قول جەتكىزدى (80,8000). جارىس قوجايىنى گرەكيا قۇراماسى التىن, يزرايل كۇمىس مەدال جەڭىپ الدى.
بۇل سۋپەرفينالدا 4 التىن, 1 كۇمىس جۇلدەسى بار يسپانيا سپورتشىلارى جەڭىسكە جەتسە, اۋستريا قۇراماسى – ەكىنشى (4 التىن), اقش – ءۇشىنشى (2 التىن, 3 كۇمىس, 4 قولا) ساتىدان كورىندى. قازاقستان قۇراماسى 1 كۇمىس, 4 قولا جۇلدەمەن 8-ورىنعا تابان تىرەدى.