قازاقستان تاريحىنىڭ اجىراماس بولىگى سانالاتىن ءار ايماقتىڭ تاريحىن زەرتتەپ-زەردەلەۋدىڭ ماڭىزى زور. بۇل رەتتە جاستار تۋعان ەلىنە, جەرىنە ادال قىزمەت ەتكەن تۇلعالاردىڭ ءومىرىن ۇلگى تۇتۋعا مىندەتتى. سونداي تۇلعالاردىڭ ءبىرى – قازانعاپ بي ساتىبالدى ۇلى.
قازانعاپ ساتىبالدى ۇلى (1771-1856 جج.) – قازاقتىڭ اتاقتى باتىرى مالايسارىنىڭ ۇزەڭگىلەس دوسى بايداۋلەت باتىردىڭ شوبەرەسى (كەيبىر دەرەكتەر بويىنشا – نەمەرەسى), باسەنتيىن ەلىنىڭ توبە ءبيى. اتاقونىسى – پاۆلودار وبلىسىنا قاراستى وسى كۇنگى جولقۇدىق اۋىلىنىڭ ماڭىنداعى رەبروۆكا دەگەن ەلدى مەكەن, قىستاۋى ەرتىس پەن اقسۋ وزەنى بويىنداعى جەرلەر, ال جاز جايلاۋى ەكىباستۇز-قالقامان القابىنداعى قىر مەن «اقكول-جايىلماعا» جاقىن «شۇرىق», «سارىقامىس» دەگەن وزەندەردىڭ بويىندا.
قازانعاپ ساتىبالدى ۇلىنىڭ شەشەن, ساياسي قايراتكەر عانا ەمەس, سونىمەن قاتار مال شارۋاشىلىعى مەن ەگىن شارۋاشىلىعىمەن دە اينالىسقان ءىرى كاسىپكەر ءھام حالىققا جاناشىر, دەمەۋشى بولعانىن تاريحي دەرەكتەر ايعاقتايدى. قازانعاپ ساتىبالدى ۇلى قازىرگى پاۆلودار وبلىسىنىڭ لەنين كەنتىندە مەدرەسە سالعىزىپ, قازاق جاستارىنىڭ ءبىلىم الۋىنا قولعابىس تيگىزگەن ەكەن.
ايتپاعىم, قازانعاپ ءبيدىڭ كەرەكۋ-باياناۋىل ءوڭىرىنىڭ دامۋىنا, كوركەيۋىنە ەڭبەگى سىڭگەنىن ەسكەرىپ, حالقىنا ادال قىزمەت ەتكەن ازاماتتىڭ ەسىمىن حالىق جادىندا ماڭگىلىككە ساقتاپ قالۋ ءۇشىن, اتاقونىسى ەرتىس وزەنىنىڭ سول جاعىنداعى پاۆلودار وبلىسىنىڭ اقسۋ اۋدانىنا قاراستى جەرلەر (سونىڭ ىشىندە لەنين كەنتى) بولعانىن ەسكەرە وتىرىپ, لەنين كەنتىنە قازانعاپ بي ساتىبالدى ۇلىنىڭ ەسىمى بەرىلسە, بۇگىنگى ۇرپاقتارىنىڭ بابالارى الدىنداعى ءبىر پارىزى ورىندالعان بولار ەدى.
ماحمەت دەمەسىنوۆ,
پاۆلودار قالاسىنىڭ قۇرمەتتى ازاماتى