قازىناشىلىق – ەل ەكونوميكاسىنىڭ دامۋىنا تىكەلەي اسەر ەتەتىن, مەملەكەتتىك قارجىنى ءتيىمدى جانە ورنىقتى باسقارۋعا جاۋاپ بەرەتىن سالا. بۇل قىزمەت باستاپقىدا ءاربىر باسقارۋ سالاسىنداعى كىرىستەر مەن شىعىستاردىڭ اشىقتىعى مەن باقىلاۋىن قامتاماسىز ەتۋ ءۇشىن قۇرىلعان. ويتكەنى بارلىق مەملەكەتتىك ورگاندى قاجەتتى اقشالاي قاراجاتپەن قامتاماسىز ەتۋ – ماڭىزدى ءىس. ول ءۇشىن بۋحگالتەرلىك ەسەپ, كىرىستەر مەن شىعىستاردىڭ بىرىڭعاي بيۋدجەتتىك سىنىپتاماسى سەكىلدى ەسەپ-قيساپتىڭ ءبارى قازىناشىلىق نورمالار مەن ستاندارتتارعا ساي بولۋعا ءتيىس.
ەلوردالىق قازىناشىلىق دەپارتامەنتى كىرىستەر مەن شىعىستار بويىنشا بيۋدجەتتى كاسسالىق اتقارۋ جۇمىستارىن ىسكە اسىرا وتىرىپ, بيۋدجەت قۇرالدارىن ماقساتتى پايدالانۋ ءۇشىن اقشا اعىنىنىڭ قوزعالىسىن وڭتايلاندىرادى, بيۋدجەتتىك قۇرالداردى ۇيلەستىرۋدى جانە ولاردى ءتيىمدى پايدالانۋدى قامتاماسىز ەتەدى, بيۋدجەتتىك زاڭنامانى ازىرلەۋگە قاتىسادى جانە ونىڭ ورىندالۋىن باقىلايدى.
مەملەكەتتىك قازىناشىلىق – مەملەكەتتىك بيۋدجەت ساياساتىنىڭ جانە بيۋدجەت سالاسىنداعى رەفورمالار كەشەنىنىڭ نەگىزگى بولىگى. بۇل سالا قارجى رەسۋرستارىن زاڭعا سايكەس ۇزدىكسىز, قۇزىرلى باسقارۋدى قامتاماسىز ەتەدى. سول سەبەپتى قازىناشىلىق جۇيەنىڭ فۋنكتسيونالدىق قىزمەتى ۇنەمى جەتىلدىرىلىپ, قازىناشىلىق تەحنولوگيالاردى ستاندارتتاۋ جانە وڭتايلاندىرۋ شارالارى تۇراقتى جۇرگىزىلىپ تۇرادى.
قازىناشىلىق جۇيەسى قىزمەتىنىڭ نەگىزگى ءمانى – مەملەكەتتىك مەكەمەلەردىڭ قاشىقتان بيۋدجەتتى اتقارۋ جانە وسىعان قاتىستى قانداي دا ءبىر وپەراتسيالاردى وتكىزۋ بويىنشا ەسەپتەردى جاساۋىندا. بۇل قىزمەت اۆتوماتتاندىرىلعان رەجىمدە جۇرگىزىلەدى, ياعني قازىناشىلىق جۇيەنى پايدالانۋشىدان قۇجاتتاردى قابىلداۋ-تاپسىرۋ, تولتىرۋ جانە باقىلاۋ مەملەكەتتىك ورگان قىزمەتكەرلەرىنىڭ قاتىسۋىنسىز جۇرگىزىلەدى. سونىمەن قاتار قازىناشىلىق قىزمەتكەرلەرى اراسىندا وڭدەلگەن قۇجاتتاردى تاراتۋ دا اۆتوماتتاندىرىلعان. بۇل ءبىر جاعىنان قۇجاتتاردى وڭدەۋ پروتسەسىن جەدەلدەتسە, ەكىنشى جاعىنان جەمقورلىقتى بولدىرماۋعا سەپتىگىن تيگىزەدى. سوندىقتان قازىناشىلىقتىڭ اۆتوماتتاندىرىلعان اقپاراتتىق جۇيەسى ۇنەمى جەتىلدىرىلىپ كەلەدى.
«جەمقورلىق قوعام ومىرىندە, اسىرەسە مورالدىق-ەتيكالىق احۋالعا جاعىمسىز اسەر ەتەتىندىكتەن ونى بارىنشا قابىلداۋعا كەلمەيتىن جاعدايلار تۋدىرۋ قاجەت» دەگەن كەلەلى مىندەتتەردى ەسكەرە كەلە, سىبايلاس جەمقورلىققا قارسى كۇرەس باستى باسىمدىق رەتىندە قازىناشىلىق دەپارتامەنتىنىڭ جۇمىسىندا ەرەكشە كورىنىس تابۋدا. سونىڭ ءبىر دالەلى رەتىندە مەملەكەتتىك مەكەمەلەردەگى قارجى- لىق قۇجاتتارعا ادامي فاكتوردى بارىنشا ارالاستىرماۋعا مۇمكىندىك بەرەتىن ەلەكتروندى قۇجاتاينالىم – «قازىناشىلىق-كليەنت» اقپاراتتىق جۇيەسىن اتاپ وتۋگە بولادى.
نۇر-سۇلتان قالاسى بويىنشا قازىناشىلىق دەپارتامەنتىندە سىبايلاس جەمقورلىققا قارسى كۇرەس جۇمىستارى جۇيەلى تۇردە جۇرگىزىلەدى. اتاپ ايتقاندا, قۇقىق بۇزۋشىلىقتاردى بولدىرماۋ ماقساتىندا مەملەكەتتىك قىزمەت جانە جەمقورلىققا قارسى ءىس-ارەكەت تۋرالى زاڭنامالاردى ءتۇسىندىرۋ, سىبايلاس جەمقورلىقتىڭ الدىن الۋ ءىس-شارالارى تاقىرىبىندا دارىستەر مەن سەمينارلار وتكىزىلەدى. اتالعان ءىس-شارالار – جالپى اتقارىلعان جۇمىستىڭ ازعانتاي بولىگى عانا.
جىل سايىن قازىناشىلىق ورگاندارى ارقىلى قارجىلىق قۇجاتتاردىڭ وراسان زور اعىنى, ياعني ناقتىلى اقشالاي قاراجاتتىڭ «كوشكىنى» وتەتىندىگىن ەسكەرسەك, بيۋدجەتتىڭ نىسانالى ءارى ءتيىمدى قولدانىلۋىن باقىلاۋدى باستى نازاردا ۇستاۋ, ەل قاراجاتىن شاشاۋ شىعارماۋ قازىناشىلىق قىزمەتكەرلەردىڭ ەل ەكونوميكاسىنا قوسقان سۇبەلى ۇلەسى دەپ بىلەمىز.
ەلدىڭ دامۋى ءاربىر ازاماتتىڭ قاجىرلى ەڭبەگىنە, وتانسۇيگىشتىگىنە كوپ بايلانىستى. وتانىنىڭ وركەندەۋى ءۇشىن قازىناشىلارىمىز دا بارىن سالىپ, ادال ەڭبەك ەتىپ كەلەدى. ولار – حالىق مۇددەسى ءۇشىن قىزمەت ەتەتىن, ەل بولاشاعىن بارىنەن بيىك قوياتىن بىلىكتى دە كاسىبي ماماندار. ارىپتەستەرىمىزدىڭ قازاقستاننىڭ گۇلدەنىپ كوركەيۋى ءۇشىن قالتقىسىز ەڭبەك ەتىپ, ءالى تالاي شىڭدار مەن مەجەلەردەن كورىنەتىنى ءسوزسىز.
ەلوردالىق قازىناشىلىق دەپارتامەنتى جەمقورلىقتىڭ الدىن الۋ مەن ونىڭ كورىنىستەرىمەن كۇرەسۋگە, سىبايلاس جەمقورلىققا قارسى ءتارتىپتى كۇشەيتۋگە جانە ءوز قىزمەتىندە ءتارتىپتى نىعايتۋ جولىندا ءالى تالاي جۇمىس اتقاراتىنىنا سەنەمىز.
باعدات قاليجانوۆ,
قارجى مينيسترلىگى قازىناشىلىق كوميتەتى نۇر-سۇلتان قالاسى بويىنشا قازىناشىلىق دەپارتامەنتىنىڭ باسشىسى