پەتروپاۆلدا رەسپۋبليكالىق اباي-ماعجان وقۋلارىنىڭ وبلىستىق كەزەڭى اياقتالدى. وعان وبلىس مەكتەپتەرىنەن 3-11 سىنىپ وقۋشىلارى اراسىنداعى 150-دەن استام شاكىرت قاتىستى. 11 نوميناتسيا بويىنشا سايىسقان بالالاردىڭ ءجۇزى بال-بۇل جانىپ, جۇلدەلى ورىندار الۋعا دەگەن ىنتالارى زور بولدى. بۇل نوميناتسيالاردان باسقا «اباي جاققان ءبىر شىراق» اتتى باستاۋىش سىنىپ وقۋشىلارىنا ارنالعان ءبىر نوميناتسيا دا بولدى. وندا 1-4 سىنىپتىڭ بالدىرعاندارى اباي ولەڭدەرىن جاتقا ايتۋدان جارىستى.
بيىلعى بارىس جىلىن مەملەكەت باسشىسى قاسىم-جومارت توقاەۆ «بالالار جىلى» دەپ اتاعانى ءمالىم. اتالعان ءىس-شارا وسى جىلدا جاس ورەندەردىڭ ساناسىنا قازاق دانالىعى مەن ونەرىنىڭ كوركەمدىگىن ءسىڭىرۋ, اقىل-ويىن دارىتۋ ماقساتىندا ۇيىمداستىرىلعان ەكەن. سوندىقتان ءىس-شارا وبلىستىڭ بارلىق تۇكپىرىندەگى مەكتەپتى قامتىپ, ساحناعا بارلىق اۋىل-قالا مەكتەبىنىڭ ونەرپاز ۇلاندارىن شىعارىپ وتىر. مادەني ءىس-شاراعا قۇتتىقتاۋ ءسوزىن ايتقان وبلىستىق ءبىلىم باسقارماسىنىڭ باسشىسى ءنازىر جاشىبەكوۆ بۇگىنگى ورەندەردىڭ ۇلتتىق ادەبيەت پەن ونەرگە جاقىنداي تۇسۋىنە اباي مەن ماعجاننىڭ اقىل-ويى كەمەل, كوركەمدىگى كەلىسكەن, تانىمى تەرەڭ پوەزياسى مەن قاراسوزدەرىنىڭ ورنى بولەك ەكەنىن اتاپ ايتتى.
وسىدان ءارى كوركەم كۇي ويناپ تۇرعان ساحناعا سايىسقا قاتىسۋشىلاردى ونەرلەرىمەن قۇتتىقتاعان بىرنەشە ءانشى-كۇيشى شىقتى. سونىڭ ىشىندە اباي اتىنداعى مامانداندىرىلعان مەكتەپ-گيمنازياسىنىڭ مۇعالىمى مايرا ۋداشكەقىزى مەن ونىڭ شاكىرتى زارينا شوراەۆا ماعجاننىڭ «سۇيەمىن» ولەڭىنە جازىلعان ءاندى ورىندادى. ال 1-2 سىنىپتاردىڭ ءتورت بالدىرعانى ابايدىڭ جىل مەزگىلدەرىنە ارناعان ءتورت ولەڭىن وقىدى.
سايىسقا شىعارىلعان نوميناتسيا اتاۋلارى دا ەرەكشە. ولار ەكى اقىن پوەزياسىنىڭ ءبىراز قىرىن قامتىعان. اتاۋلارىن ايتار بولساق, «ولەڭ ءسوزدىڭ پاتشاسى, ءسوز ساراسى», «كوڭىلىم ءاندى ۇعادى», «جۇيرىكتەن جۇيرىك وزار جارىسقاندا», «اباي قاراسوزدەرىنىڭ دانالىعى», « ۇلىلار الەمى», «جاسىنان وقۋ وقىپ, ونەر قۋعان», «ولمەيتۇعىن ارتىنا ءسوز قالدىرعان» جانە ت.ب. م.قوزىباەۆ اتىنداعى سقۋ قازاق ءتىلى مەن ادەبيەتى كافەدراسىنىڭ مەڭگەرۋشىسى, پروفەسسور جانباي قادىروۆ باستاعان قازىلار القاسىنا جەڭىمپازداردى انىقتاۋ وڭاي بولعان جوق. جەكەلەگەن نوميناتسيالار بويىنشا «دارىندى بالالارعا ارنالعان ء«بىلىم-يننوۆاتسيا» ليتسەي-ينتەرناتىنىڭ 10-سىنىپ وقۋشىسى نۇرلان ادىلەت, ەسىل اۋدانىنداعى بۇلاق مەكتەبىنەن ايگەرىم تولەباي, ءا.دوسمۇحامبەتوۆ اتىنداعى گيمنازيا-ينتەرناتىنان التىناي ەرەجەپوۆا, №25 ورتا مەكتەپتەن ديانا جولامان, م.ايتحوجين اتىنداعى №1 ورتا مەكتەپتەن انگەلينا اراكەلوۆا, اباي اتىنداعى مەكتەپ-گيمنازيادان بەكزات باعدات, بەكسەيىت ورتا مەكتەبىنەن اسپەت تۇرسىنباەۆالار جەڭىمپاز دەپ تانىلدى.
ال اتالارىنىڭ ولەڭدەرىن جاتقا وقۋ بويىنشا 1-4 سىنىپ بالدىرعاندارى اراسىنان جاسمينا احمەتوۆا, ەلنۇر وڭداسىن, ەرداۋلەت كارىباي, ارۋجان قاجىمۇرات ۇزدىك شىقتى. وبلىستىق كەزەڭدە ۇزدىك شىققاندار ەندى رەسپۋبليكالىق كەزەڭگە دايىندالاتىن بولادى.
پەتروپاۆل