17 مامىردا بريۋسسەل قالاسىندا (بەلگيا) ەۋروپالىق وداققا مۇشە 27 ەلدىڭ اۆياتسيالىق بيلىك ورىندارى باسشىلارىنىڭ قاتىسۋىمەن ەۋروپالىق وداقتىڭ ۇشۋ قاۋىپسىزدىگى جونىندەگى كوميتەتىنىڭ وتىرىسى ءوتتى, دەپ حابارلايدى Egemen.kz.
وندا قازاقستاننىڭ ازاماتتىق اۆياتسيا سالاسىنداعى احۋال جانە ۇشۋ قاۋىپسىزدىگى جونىندەگى ەسەبى تىڭدالدى.
قر يدم ازاماتتىق اۆياتسيا كوميتەتىنىڭ توراعاسى تالعات لاستاەۆ باستاعان, قۇرامىندا قر يندۋستريا جانە ينفراقۇرىلىمدىق دامۋ ءمينيسترىنىڭ كەڭەسشىسى ازات بەكتۇروۆ, «قازاقستاننىڭ اۆياتسيالىق اكىمشىلىگى» اق باس ديرەكتورى كاتالين رادۋ, قر بەلگياداعى ەلشىلىگىنىڭ جانە «ەير استانا» اۋە كومپانياسىنىڭ وكىلدەرى بار قازاقستاندىق دەلەگاتسيا قازاقستاننىڭ ۇشۋ قاۋىپسىزدىگى سالاسىنداعى ىلگەرىلەۋى مەن قابىلداپ جاتقان شارالارى تۋرالى باياندادى.
سونداي-اق قازاقستاندىق تاراپ حالىقارالىق ازاماتتىق اۆياتسيا ۇيىمىنىڭ (يكاو) اۋديتورلارىنىڭ يكاو-نىڭ ۇيلەستىرىلگەن ۆاليداتسيالىق ميسسياسى (ICVM) شەڭبەرىندە تاۋەلسىز تەكسەرۋى تۋرالى حاباردار ەتتى, وندا قازاقستان ۇشۋ قاۋىپسىزدىگىن قامتاماسىز ەتۋ دەڭگەيىن 74% - دان 84% - عا دەيىن ارتتىردى, بۇل ورتاشا الەمدىك كورسەتكىشتەن 15% - عا جوعارى.
ەۋروپالىق وداقتىڭ ۇشۋ قاۋىپسىزدىگى كوميتەتىنىڭ مۇشەلەرى قازاقستان قول جەتكىزگەن ناتيجەلەردى جوعارى باعالادى جانە قازاقستاننىڭ ۇشۋ قاۋىپسىزدىگى دەڭگەيىن ارتتىرۋ جونىندەگى كۇش-جىگەرىن قولدادى.
قازىرگى ۋاقىتتا قازاقستاندىق اۋە كومپانيالار ءۇشىن ەۋروپا ەلدەرىنە ۇشۋعا شەكتەۋلەر جوق ەكەنىن اتاپ ءوتۋ قاجەت.
قازاقستانداعى اعىمداعى ۇشۋ قاۋىپسىزدىگى جاعدايىنىڭ رەسمي باعاسىن ەۋروپالىق وداق اعىمداعى جىلدىڭ ماۋسىم ايىنىڭ باسىندا جاريالايدى.