قازاقستان سىرتقى ىستەر مينيسترى ەرلان ىدىرىسوۆ پەن ۇلىبريتانيا سىرتقى ىستەر ءمينيسترىنىڭ ءبىرىنشى ورىنباسارى بارونەسسا سايدا ۆارسي ەكىجاقتى قارىم-قاتىناستىڭ ءارى قاراي دامۋ بولاشاعىن, سونىمەن قاتار, بىرقاتار حالىقارالىق وزەكتى ماسەلەلەردى تالقىعا سالدى.
اڭگىمەلەسۋشى تاراپتار ەكىجاقتى قاتىناستىڭ بەلسەندى دامۋ ەرەكشەلىگىن اتاي وتىرىپ, وعان 2013 جىلعى شىلدە ايىندا ۇلىبريتانيا پرەمەر-ءمينيسترى دەۆيد كەمەروننىڭ قازاقستانعا جاساعان ساپارى مەن سول ايدا قازاقستان پرەزيدەنتى نۇرسۇلتان نازارباەۆتىڭ لوندوندا بريتاندىق ۇكىمەت باسشىسىمەن وتكىزگەن كەزدەسۋلەرى ەلەۋلى قارقىن بەرگەنىن اتاپ كورسەتتى.
ە.ىدىرىسوۆ پەن بارونەسسا ۆارسي ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسيانىڭ جۇمىسىنىڭ ماڭىزدىلىعىن اتاپ ءوتتى. وعان ارنايى جۇمىس توپتارى مەن قازاقستان-بريتانيا ساۋدا-ونەركاسىپ كەڭەسى كىرەدى. ساۋدا-ەكونوميكالىق قارىم-قاتىناس ەكى ەلدىڭ ەكىجاقتى ىقپالداستىق كەشەنىنىڭ نەگىزى بولىپ تابىلادى. قازاقستان كەدەن كوميتەتىنىڭ مالىمەتتەرىنە سايكەس, 2013 جىلى ەكى ەل اراسىنداعى تاۋار اينالىمى 2,1 ملرد. اقش دوللارىن قۇراعان (ەكسپورت – 1,5 ملرد., يمپورت – 0,6 ملرد.). ۇلىبريتانيا – قازاقستان ەكونوميكاسىنا ينۆەستيتسيا سالۋدان ءۇشىنشى ەل (نيدەرلاند پەن اقش-تان كەيىن). قازاقستان ۇلتتىق بانكىنىڭ مالىمەتتەرىنشە, قازاقستان ەكونوميكاسىنا قۇيىلعان تىكەلەي بريتاندىق ينۆەستيتسيا كولەمى 2005 جىل مەن 2013 جىلدىڭ قىركۇيەك ايى ارالىعىندا 10 ملرد. اقش دوللارىن قۇراعان.
ۇكىمەتارالىق كوميسسيا اياسىنداعى كەلەسى كەزدەسۋلەر مامىر ايىندا استانا ەكونوميكالىق فورۋمى شەڭبەرىندە استانادا جانە قازان ايىندا ءداستۇرلى قازاقستان بيزنەس-فورۋمى شەڭبەرىندە لوندوندا وتەدى دەپ كۇتىلۋدە.
ال ءسىم-دە وتكەن كەلىسسوزدەر بارىسىندا تاراپتار د.كەمەروننىڭ استاناعا ساپارى كەزىندە ۋاعدالاسىلعانىنداي ۆيزالىق رەجىمدى ءارى قاراي جەتىلدىرۋ مەن قازاقستاندىقتار ءۇشىن بريتاندىق ۆيزانى الۋ پروتسەدۋراسىن جەڭىلدەتۋ ءماسەلەلەرىن تالقىعا سالدى. سونداي-اق, ە.ىدىرىسوۆ پەن بارونەسسا ۆارسي قازاقستان مەن ۇلىبريتانيانىڭ قۇقىقتىق سالالارداعى ىنتىماقتاستىعىنىڭ بولاشاعىن قاراستىردى. سونىمەن قاتار, كەزدەسۋدە قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنە تۇراقتى ەمەس مۇشەلىككە سايلانۋعا جاساپ جاتقان قادامدارى تۋرالى ءسوز بولدى.
حالىقارالىق كۇن تارتىبىنە توقتالا كەلە, ە.ىدىرىسوۆ پەن بارونەسسا ۆارسي ۋكرايناداعى جاعدايدى, يران يادرولىق باعدارلاماسىن, سونداي-اق, پرەزيدەنتتىك سايلاۋ مەن حالىقارالىق كواليتسيانىڭ نەگىزگى اسكەري كۇشتەرىن 2014 جىلدىڭ سوڭىنا دەيىن ءوز اۋماعىنان شىعارۋ ۇدەرىسى اياسىنداعى اۋعانستانداعى ماسەلەلەرگە قاتىستى پىكىر الماستى.
كەلىسسوزدەر ناتيجەسىندە اۋعانستاننان بريتاندىق اسكەرلەردى ءتيىمدى الىپ شىعۋدى قامتاماسىز ەتۋ جانە اسا ماڭىزدى ۇلىبريتانيانىڭ جۇكتەرىن قازاقستان اۋماعى ارقىلى تاسىمالداۋ ءۇشىن قاجەتتى ەكىجاقتى قۇجاتتارعا قول قويىلدى.