● قازاقستاندا كاسىپكەرلەرگە الداعى اپتادان باستاپ جەڭىلدەتىلگەن نەسيە بەرىلەدى. بۇل كەشە ۇكىمەتتىڭ شاعىن جانە ورتا بيزنەس جوبالارىن ۇلتتىق قوردان قارجىلاندىرۋ جوسپارىن بەكىتكەنىنەن كەيىن انىقتالدى. ەلباسىنىڭ ۇيعارىمىمەن ەندى بۇل ماقساتقا 100 ملرد. تەڭگە كولەمىندە قارجى بولىنەتىن بولدى.
● ەلىمىزدە بيىل ماشينا جاساۋ ءوندىرىسىنىڭ كولەمى 1 ترلن. تەڭگەگە جەتەدى. ورتالىق كوممۋنيكاتسيالار قىزمەتىنىڭ بريفينگىندە قازاقستان ماشينا جاساۋشىلار وداعىنىڭ اتقارۋشى ديرەكتورى تەمىرلان التاەۆ مۇنىڭ وتكەن جىلعىدان 200 ملن. تەڭگەگە كوپ ەكەنىن ايتتى.
● قازاقستان مەن وزبەكستان اراسىنداعى قارىم-قاتىناس نىعايا تۇسپەكشى. مۇنىڭ جايىن بايانداپ بەرگەن پارلامەنت سەناتىنىڭ دەپۋتاتى يكرام ادىربەكوۆ بۇگىندە ەكى ەل شەكاراسىنان كۇنىنە 2 مىڭعا جۋىق ادامنىڭ ءوتىپ تۇراتىنىن ايتا كەلىپ, ەكى ارالىقتا ەندى كەڭەيتىلگەن ارىپتەستىك قارىم-قاتىناستىڭ ورناعالى تۇرعانىنا, ونىڭ بولاشاققا باعىتتالعان ءبىرىنشى شارت بولاتىنىنا توقتالدى.
● قازاقستان حالقىنىڭ 65,5 پايىزىن قازاقتار قۇرايدى. بۇل تۋرالى بۇگىن ستاتيستيكا اگەنتتىگىنىڭ باسشىسى ءاليحان سمايىلوۆ ءمالىم ەتتى.
«جىل باسىنداعى دەرەكتەرگە سايكەس قازاقستان حالقىنىڭ 65,6 پايىزىن قازاقتار, 21,5 پايىزىن ورىستار قۇراپ وتىر», دەدى ول. ونىڭ اتاپ وتۋىنشە, ەلىمىزدىڭ سولتۇستىك وڭىرلەرىندەگى قازاقتار سانى تابيعي ءوسىم مەن كوشى-قون ەسەبىنەن ارتىپ كەلەدى.
● وڭتۇستىك قازاقستانعا ەكى مىڭ دۋاداق جەتكىزىلدى. بىرىككەن اراب امىرلىگىنەن ارنايى رەيسپەن اكەلىنگەن بۇل قۇستار قىزىل كىتاپقا ەنگەن. جاقىن ارادا بۇلاردىڭ ەكى ءجۇزى ماڭعىستاۋ وبلىسىنا جىبەرىلسە, قالعانى بەتپاقدالادا ۇشىرىلادى.
● اقتاۋدا اۋىل شارۋاشىلىعىن دامىتۋ ماسەلەسى تالقىلاندى. وبلىستاعى ۇلتتىق كاسىپكەرلەر پالاتاسىنىڭ ماماندارى ايماقتا سالانىڭ كەنجەلەپ كەلە جاتقانىنا نازار اۋدارىپ, ءبىر توپ شارۋا قوجالىعىنىڭ يەلەرىمەن وزەكتى ماسەلەلەر جونىندە پىكىر الماستى.
24KZ, BNews.kz, Nur.kz, Egemen.kz حابارلارى بويىنشا دايىندالدى.