نۇر-سۇلتان قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى ەلەنا گارتماننىڭ ايتۋىنشا, جىل باسىنان بەرى ەلوردادا 72 ادام تاماقتان ۋلانعان, دەپ حابارلايدى Egemen.kz.
«ەلوردادا قوعامدىق تاماقتانۋ وبەكتىلەرىندە تاماقتان ۋلانۋ جاعدايلارى جيىلەدى. بۇنىڭ سالدارىنان 72 ادام زارداپ شەكتى. ونىڭ ىشىندە جاسى 14-كە تولماعان 3 بالا بار. كۇن رايىنىڭ جىلىنۋىنا بايلانىستى تاعامدى دۇرىس ساقتاماۋدىڭ سالدارىنان ۋلانۋ جايتتارى بايقالدى. تاماقتان ۋلانۋ بەلگىلەرىنىڭ ينكۋباتسيالىق كەزەڭى 30 مينۋتتان 24 ساعات ارالىعىندا بايقالۋى مۇمكىن. دەگەنمەن, كوپ جاعدايلاردا ۋلانۋ بەلگىلەرى 2-6 ساعات ارالىعىندا ايقىن كورىنەدى. ناۋقاستا جۇرەك اينۋ, قۇسۋ, ديارەيا ء(ىش ءوتۋ), السىزدىك, ۇيقى قاشۋ, اسقازان نەمەسە ىشەك اۋرۋى, باس اۋرۋى, دەنە قىزۋىنىڭ كوتەرىلۋى سياكتى بەلگىلەر پايدا بولادى. جالپى سىرقاتتانۋدىڭ كەزەڭى ادام اعزاسىنىڭ جاسىنا جانە جالپى جاعدايىنا, باكتەريالاردىڭ نەمەسە توكسيندەردىڭ الۋان تۇرىنە, قابىلدانعان تاماق مولشەرىنە بايلانىستى. ەرەسەكتەرگە قاراعاندا كىشكەنتاي بالالاردا اۋرۋ اعىمى الدەقايدا اۋىر تۇردە وتەتىنىن اتاپ ءوتۋ قاجەت», دەيدى مامان.
سونداي-اق ول تاماقتان ۋالانعان جاعدايدا وزدىگىنەن ەم جاساۋ قاۋىپتى ەكەنىن ەسكە سالدى.
«وسىعان بايلانىستى, ەلوردانىڭ سانيتارلىق-ەپيدەميولوگيالىق باقىلاۋ دەپارتامەنتى تۇرعىنداردى ءوزىن-ءوزى ەمدەۋمەن اينالىسپاۋعا, ەمدەۋ كۋرسىن تاعايىنداۋ جانە ىقتيمال اسقىنۋلاردى بولدىرماۋ ءۇشىن دارىگەرگە ۋاقتىلى جۇگىنۋگە شاقىرادى», دەيدى ەلەنا گارتمان.