قىرعىزستان پرەزيدەنتى سادىر جاپاروۆ «ەل ءۇمىتى» (ەل ۋمۋتۋ) حالىقارالىق ستيپەندياسىنىڭ جاڭا باعدارلاماسىن اشۋ تۋرالى جارلىققا قول قويدى, دەپ حابارلايدى Egemen.kz كابار اقپارات اگەنتتىگىنە سىلتەمە جاساپ.
«باعدارلاما الەمنىڭ 100 جەتەكشى ۋنيۆەرسيتەتىنىڭ بىرىندە ماگيستراتۋرا مەن دوكتورانتۋراعا تۇسكەن جاس قىرعىزستاندىقتاردى شاكىرتاقىمەن قامتاماسىز ەتۋدى قاراستىرادى. بيىل ازىرگە 50 شاكىرتاقى بولۋدەن باستايمىز دەپ شەشتىك. شاكىرتاقى مولشەرى تاڭدالعان ۋنيۆەرسيتەتكە بايلانىستى, بىراق ماكسيمۋم 50 مىڭ اقش دوللارىن قۇرايدى. تەحنيكالىق جانە ينجەنەرلىك سالالارعا باسىمدىق بەرىلەدى, بىراق, ءسىز ەكونوميكا جانە گۋمانيتارلىق عىلىمدارعا دا ءوتىنىش بەرە الاسىز», دەلىنگەن قىرعىز پرەزيدەنتىنىڭ جارلىعىندا.
ەسكە سالا كەتەيىك, 2005 جىلى قازاقستاندا «بولاشاق» باعدارلاماسى جاريالانىپ, جىل سايىن 3 مىڭ جاس جانە تالانتتى قازاقستاندىقتار الەمنىڭ جەتەكشى وقۋ ورىندارىندا ءبىلىم الۋعا مۇمكىندىك الدى.
وسى جىلدار ىشىندە 11 مىڭنان اسا قازاقستاندىق «بولاشاق» باعدارلاماسىمەن بىلىمدەرىن جەتىلدىردى.