قوستانايدا ورتتەن زارداپ شەككەن وتباسىلار سانى كوبەيە ءتۇستى, ولارعا بارلىق قاجەتتى كومەك كورسەتىلىپ جاتىر, دەپ حابارلايدى Egemen.kz قالا اكىمىنىڭ ءباسپاسوز قىزمەتىنە سىلتەمە جاساپ.
«قوستاناي قالاسىنداعى نابەرەجنايا كوشەسىندە 12 تۇرعىن ءۇي, شارۋاشىلىق نىساندارى, 3 جەڭىل كولىك پەن 1 جۇك كولىگى ورتەنىپ كەتتى. بۇل جايت قالا كولەمىندەگى توتەنشە جاعداي ەسەبىنە جاتقىزىلدى. تج سالدارىن جويۋ بويىنشا قالالىق شتاب پەن كوميسسيا وتىرىستارى ءوتتى. مەملەكەتتىك ورگاندارعا زارداپ شەككەندەرگە جىلدام كومەك كورسەتۋ جونىندە تاپسىرمالار بەرىلدى», دەپ حابارلادى قالا اكىمدىگى.
ورتەنگەن م ۇلىكتىڭ باعاسىن ەسەپتەۋ ماقساتىندا جەدەل كوميسسيا قۇرىلىپ, وعان تاۋەلسىز ساراپشىلار تارتىلدى. كوميسسيا قورىتىندىسىن قىسقا مەرزىمدە شىعارۋ مىندەتتەلدى.
«قازىرگى مالىمەتتەر بويىنشا 13 وتباسى زارداپ شەكتى. ولاردا 13 كامەلەتكە تولماعان بالا بار, ونىڭ 7-ەۋى – وقۋشى. ادامداردى ۋاقىتشا ورنالاستىرۋ ءۇشىن «درۋجبا» ساۋىقتىرۋ ورتالىعى دايىندالىپ, كەشە كەشكە وعان 5 ادام جايعاستىرىلدى. قاجەتىنە قاراي, ياعني قالالىق شتابقا جۇگىنەتىندەر بولسا, تاعى دا جىبەرىلەدى. ادامدار تاماقپەن قامتاماسىز ەتىلىپ جاتىر. العاشقى كومەك رەتىندە ءار وتباسىنا 200 مىڭ تەڭگەدەن بەرىلدى», دەپ تولىقتىردى اكىمدىك.
قالالىق ەڭبەكپەن قامتۋ جانە الەۋمەتتىك باعدارلامالار بولىمىنەن زارداپ شەككەن وتباسىلاردىڭ ارقايسىسىنا 70 اەك كولەمىندە ءبىر رەتتىك جاردەماقى بولىنەدى.
ايانا توعانبەك