پارلامەنت سەناتىنىڭ سپيكەرى ماۋلەن اشىمباەۆ قازاقستاندىقتاردى وتان قورعاۋشى كۇنىمەن قۇتتىقتادى, دەپ حابارلايدى Egemen.kz.
«قۇرمەتتى دوستار!
بارشاڭىزدى وتان قورعاۋشى كۇنىمەن جانە قازاقستان قارۋلى كۇشتەرىنىڭ قۇرىلعانىنا 30 جىل تولۋىمەن قۇتتىقتايمىن!
ايبىندى ارميا جانە انتىنا ادال جاۋىنگەر – ەلىمىزدىڭ تىرەگى, ەلدىگىمىزدىڭ كەپىلى. مەملەكەتتىلىكتىڭ مىزعىماس قامالى سانالاتىن وسى ەكەۋى مىعىم بولسا, بەيبىت اسپان مەن تۇراقتى دامۋ قامتاماسىز ەتىلەدى. سوندىقتان ساپ تۇزەگەن ساربازدارىمىزعا جۇكتەلەر مىندەتتىڭ جۇگى قاشاندا اۋىر.
قازىرگى تاڭدا مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن ارميانى دامىتۋ جانە ونىڭ جاۋىنگەرلىك تيىمدىلىگىن ارتتىرۋ باعىتىندا اۋقىمدى جۇمىس قولعا الىنىپ جاتىر. بۇل – قوعامنىڭ كەشەگى «قاڭتار وقيعاسىنان» كەيىنگى تالاپ-تىلەگىنە جانە بۇگىنگى گەوساياسي سىن-قاتەرلەرگە جاۋاپ رەتىندە جاسالعان ماڭىزدى قادام. وسى باعىتتاعى جاڭا باسىمدىقتار اسكەرىمىزدىڭ الەۋەتىن كۇشەيتىپ, ايبارلى ارميا قالىپتاستىرۋعا تىڭ سەرپىن بەرەتىنى ءسوزسىز.
ءبىز باتىر بابالارىمىزدىڭ بۇگىنگى ءىزباسارلارى ەرلىك رۋحىن ءاردايىم اسقاق قالپىندا ساقتايدى دەپ سەنەمىز. وتان قورعاۋ دەگەن ابىرويلى مىندەتتى ارقالاعان ازاماتتارىمىزدىڭ مارتەبەسى بيىكتەي بەرسىن. قارۋلى كۇشتەرىمىز قۋاتتى, ەل ىرگەسى بەرىك بولسىن!
مەرەكەمەن قۇتتىقتاي وتىرىپ, ءار وتباسىنا قۋانىش, بەرەكە, اماندىق تىلەيمىن. تاۋەلسىز قازاق ەلى جاساي بەرسىن!».